IB投資系列：食得鹹魚抵得渴

 炒得股，預咗三更貧五更富，玩得期權，預咗要強制買貨或強制賣貨。

剛剛星期五，隻「揮撻」NVDA及「扒零T啊」PLTR嘅看升期權，收巿後到價，就必須要行權，乖乖哋將股票按期權約好嘅價錢賣出，如果隻股票勁升，你會覺得唔抵，即使收巿前平倉也無補於事，因為已到價嘅期權，價格已扯高，收嘅期權金抵唔上平倉嘅錢，蝕錢已成定局，倒不如安靜等收巿吧！

我嘅「揮撻」及「扒零T啊」都是賣出看跌期權強制買入，成本價都係220元及175元，我只不過用同等價錢賣出看升權權，股價係無賺，但看跌、看升期權已收期權金，賺到錢就可以。好似搏擊咁，唔需要複雜嘅招數，簡單賺就可以，錢雖然不多，但只要贏多輸少，贏嘅比率只比輸嘅比率多一點，長遠都係贏，就好似賭場一樣，只要有人賭，賭場就一定贏錢。

但要贏嘅比率比輸多一點，關鍵點就唔可以太貪，因為賠率高，輸嘅機率會較大，好像上述兩隻股票，是較正經嘅股票，7日期權收1尾元或以下期權金，行權機會極低，當然也沒錢賺，1尾元，一張合約100股，即100尾元，約780講元，得幾舊水講紙冇肉食，唯有加多減少，或混入不同股票，包括唔正經嘅股票，增加收入。

炒股都係炒嗰啲野，純粹係用甚麼策略及方法，唔識嘅，不問價定投「彪譜500」指數基金即可，正常人會買VOO，因為成交多、差價少，不過如果你沒有其他期權操作，或者移民至「嬰國」，買唔到「尾國」ETF，可考慮「愛已難」上巿那些，手續費高少少，但股息稅只有15%，比VOO少一倍，如果買埋累積型ETF，十年後嘅差距會很大，加上沒有「尾國」遺產稅，講句唔好聽死鬼咗，留低嘅都係一份心意，而唔係負擔。不過現在跟科網股年代不同，頭嗰十隻嘅價值已佔整個指數四成，你以為分散500間公司，實際都係集中嗰幾間，風險仍然存在。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。