移英日記（420）冇錢就悶

 「嬰國」真係悶，雖然地方大，但有個仔，走不遠，日日要跟程序運作，送完返學，才有少少時間，行下山或周圍行，然後施施然返家煮早餐，推遲早餐係為168斷食，盡量用八小時內進食，讓身體健康一點。

我唔知「尾國」健康指引會否改變，但肯定原生食物係無問題，外出食飯貴仲要消費稅，迫你自己煮，即係迫你健康，豬油、牛油、有機全脂奶（2升2鎊幾）、走地雞蛋⋯，肉類便宜，雞肉尤其有骨肉更便宜，例如雞翼一大盒，兩鎊鬆少少，已可做全雞宴。

「嬰國人」唔識食，以為啖啖肉嘅雞胸係好野，其實雞翼先係好野，「歪芺」油都唔使用，用返雞油自己煎，用少少鹽調味，外皮香脆，肉質嫩滑，十分好食。我也放低無謂嘅枷鎖，洗碗一概用洗碗碟機，電費加清潔劑只不過40p，無謂煩。

其實生活有冇情趣，純粹睇你荷包有冇錢，順景嘅時候，全嬰自駕遊、郵輪遊、得國遊，只不過股票表現轉差，自駕發國遊、音樂之都「唯也鈉」、地中海「瑪已牠」⋯也一一推掉，「嬰國」屬於「勾洲」，去「勾洲」是容易的，機票也便宜，但首要都要有錢，才有得去。

「嬰國」出街食貴，自己煮平，其實係迫你健康。地方悶，咪周圍行，日日幾千或過萬步，又係迫你健康，多接觸自然景物，睇野嘅價值觀也不同，「鬚革難」勉強也睇到北極光，當然去「羅威」、「分難」、「遂典」更好。

有錢，咪衝出「勾洲」，冇錢，咪留在自己城巿，就是去姊妹城巿，「愛叮寶」去「革拉屍歌」少於一小時，去「扭卡數」少於三小時，駕車可達，係用啲油錢，如果經濟容許，租一晚酒店，自由自在，大把時間深度行。

「嬰國」肉類好，本地生產，而且新鮮食物沒有消費稅，又係迫你健康，當然間中出街食，也是寫意，這日跟友人去Toby食早餐，友人有優惠，平均每位7鎊幾，任食任飲，好像酒店自助餐，大食嘅人才有著數。

今次友人分享大女有機會進入「威簾」王子畢業嘅大學，目標係7個A，玩嘅音樂、運動，已經係上等人嘅level，成個「勾洲」去勻晒，下一代已經可以逆襲做「高奴」。

（上等人讀嘅大學：University of St Andrews。）

又邀請我們放假去「稀納」嘅「瓦典」，我都預左去唔到，我呢啲移嬰窮鬼、低奴，暫時未突破到。