愛丁堡詠春：仲有需要學功夫嗎？

 當我嘅投資戶口跌到差不多兩球嘅時候，我嘅投資目標係一年一球，即係50厘，你可知風險有多大？槓桿拉到盡，Call孖展嘅警告一日數次，以小搏大係好浪漫，但從來都不真實。

大衛打敗巨人哥利亞，係靠遠程武器：甩石機弦，唔係埋身搏鬥。咁詠春又靠甚麼？佢仲要埋身，有的功夫更著力用㬹，甚麼「硬爬山」之類，面對高大嘅「鬼佬」，死路一條。

要功夫有競爭力，至少每一個動作、馬步都要比別人好，體能及肌力又唔算太差，身型、體重不是差很遠，咁先有得打。職業拳賽，大家都揸到盡，沒有多餘脂肪，要在同一級重量才有得打，重一磅都唔值得打，「拍灰噢」能夠誇幾個級別都贏，係好犀利！

演算法會自動派片給我⋯

這個叫「涼亭」，詠春派無人不識，系外嘅人覺得佢好威，系內嘅人卻唔覺甚麼，你就明甚麼意思，上一代師傅學術水平較低，有功夫都未必識得教，言不及義，反之，有學識者，識少少就吹到盡，吹到天花龍鳳，甚麼「九節骨發力」？「十一節骨發力」？吹嘅咋嘛，全部都係呃人嘅伎倆！

我年輕時，真想驗証功夫嘅真偽，想蒙面伏擊呢啲所謂嘅「師傅」，如果我呢啲自持勇力都可打贏，一定係假師傅。如果大我廿年都頂得住，倒算不錯。如果可以反勝，甚至技服我，真係大師傅，我俾你十年學費又何妨。可惜這件事，冒險性太高，有刑事責任，始終沒有實行，再者，「用人莫疑、疑人莫用」，嗰啲「師傅」又食煙、又奀挑鬼命，功架又不特別好，唔通真係有氣有力打咩！都係呃飯食！無謂嘥時間！功夫大師就冇，神棍就大把！

我年輕時，睇「涼亭」嘅VHS錄影帶，三十多年前，每盒都要四舊水，夠掠水，全套小念頭都打到出來，跟住買了個大沙包放在宿舍，當時我打出嘅旋踢，同學都叫絕，只不過沙包是放在椅，貼住牆身，並不是用拉爆螺絲吊在天花板，我只能使出右旋踢，被笑「單蹄馬」，當年我想練特別啲嘅野，練「膊打」，即係又名「擔膊」，都練到紅晒⋯

我想講，只要有心學，對住沙包拳打腳踢，功力差極也有限，今日資訊發達，你睇片都可學晒：小念頭、尋橋、標指、八斬刀、六點半棍、木人樁法。跟住拍埋片問AI，有甚麼改善，也一一道出，遲些有Tesla人形機械人，量產後一部車嘅價錢，叫佢日日跟你黐手也可以，AI已是人類智慧嘅總和，甚麼招式得？甚麼係廢招？解釋得清清楚楚。

問題係AI加上機械人，比人類做得更好，你仲需要跟師傅嗎？你仲需要學功夫嗎？那時你去栽種，只為興趣，練功夫，不過為健康吧！打得咁差，無謂喺機械人面前獻醜吧！