IB投資系列：聾蝦炒股？

 現在炒股，當然係炒AI熱潮，但真正炒緊啲乜嘢？AI有五大層面：能源、晶片、基礎設施、模型、應用端。

好似尾國淘金熱，真正發達嘅人係邊個？固然係淘到金嘅人，但萬中無一，最醒目嘅商人，從來不是淘金，而係賣鏟、牛仔褲。AI也是一樣，AI係燒銀紙，邊個成功，真係冇人知？賣晶片、賣能源似乎係較穩陣，因為原理就好似淘金熱時，賣鏟、賣牛仔褲嘅商人，你淘唔淘到金唔關我事，但賣工具、設備一定賺錢。

但股票之道，唔係咁簡單，好嘅股票可以令你蝕錢，壞嘅股票一樣可以令你賺錢，關鍵係價錢，買貴了嘅野，即使好，你一樣蝕錢，反之亦然。我哋凡人普遍係資訊差，對於掌握資訊嘅人，賺錢係容易嘅事。

沒有掌握資訊，即使曾經風光，也會一次過嘔凸！

我哋係低奴，一定要有自知之明。最近有股風氣，叫人裝「聾蝦」，只要用AI就可掌握一切，預早知道啲基金佬講過甚麼說話，預早知國際大事，預早部署，就可發達云云⋯⋯。

你發唔發達就唔知，但要買新電腦、裝「聾蝦」，操作用Token，費用一定不會少。跟淘金熱完全係同一個劇本，AI投資多，但付費嘅人卻極少，這就是「天朝」有公司免費幫人裝「聾蝦」嘅因由，呢個世界唔會有無緣無故嘅愛，也唔會有無緣無故嘅恨，你是否賺錢，冇人會care，但佢哋一定care自己是否賺錢。

最後結論，你本來炒股賺錢，有冇裝「聾蝦」，你都繼續賺錢。你本來炒股蝕錢，有冇裝「聾蝦」，你都好大機會繼續蝕錢。因為AI只是輔助，並非全權負責，亦無人敢讓其自動運作。普通人用免費AI諮詢一下資訊，已經足夠。

（有問題，問AI，已可知道答案，作出部署。）

（聽AI分析，至少都係數據，數據唔會呃人，問題係你點理解這些資訊，作出合適部署。某一些所謂「大師」，信佢一成雙目失明。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。