玩遊戲有外掛，一定冇得玩…
世界就係咁屈機㗎喇！要升就升，要跌就跌，期權一定失晒預算，因為人人預佢跌巿，突然間出超必殺技，全部割韭菜！死未！
如果我冇估錯，這個情況仍然會Chok來Chok去，你以為跌，就升，你以為升，就跌，你一有槓桿，Chok下Chok下就一定死，因為資產一跌至保証金，劵商一定打靶，無仇報！就算你未打靶，你長期冇收入，你都要死！
所以生存之道，遠離「賭場」，你唔玩佢就整你唔死，雖然佢將全人類作煉成陣，全人類都要死，但唔會即刻死，係陰乾陰乾咁死，溝淡貨幣，越來越唔值錢，不住通脹，等你有返工、冇放工，一生一世做奴隸，「天朝」已經九九六了…不過過程需時，你有充足時間去思考及部署。
第二，避免槓桿，就算唔贏錢，都唔會輸突，你去賭場兌換了一千元籌碼，輸盡都係一千元，你唔會死，好像去郵輪，我兌了錢俾「歪芺」，輸晒就算，just for fun，我當去機鋪或冒險樂園玩遊戲。但如果你借了「貴利」，你想唔死都難，孖展槓桿也是一樣。
第三，預留充足生活費用，以前一年就夠，但政局不穩要再鬆一點，尤其佢哋使出「滯脹」牌，經濟差，但物價反貴，令你嘅緩衝減少，必要時啟動「省電」模式，食平啲、買少啲，上一次股災，我都要使出「重出江湖」，有手有腳，去到邊度都唔會餓死！
免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。
沒有留言:
張貼留言