愛丁堡詠春：醒未呀！

 我知道我成日講詠春唔係太有用，讓許多人唔係好爽，特別係透此搵食或學了多年嘅老屎忽，要面對現實嘅殘酷，我何嘗唔係想逃避或否認，我都係詠春老屎忽，我真係想詠春死麼？

擾流器、定風翼對架車唔會冇作用，但首要條件係你部車係高性能跑車。偵測儀器、Parking sensor、汽車安全係統對架車唔會冇作用，但首要條件係你嘅駕駛技術及態度。

我架車都有偵測儀器，我告訴你大不列顛一接近交通燈，很多會出警示，甚麼條件會提告，緩衝有幾多？我卻不知道，但我肯定，特定時間闖入巴士路，一定影相、收告票，因為我試過，唔見了50鎊。

偵測儀器唔會冇作用，好像係多個人提醒你，永遠係有正面效果，但對比駕駛技術及態度，重要性高下立見。

搏擊，力量係最關鍵。一個公平嘅擂台比賽一定會過磅，而所有參加嘅拳手亦都會過磅前減磅，因為如果你唔減磅，等於越級挑戰。最大問題你所越嗰級嘅拳手都有減磅，咁等於越兩級挑戰，等於自殺。

如果唔跟磅重比賽，有力量、冇技巧都可以贏。

因為力量係關鍵。三國所謂好打嘅名將，如張飛等，關鍵係乜嘢？你估係因為跟了甚麼名師，學了甚麼功夫麼？當然不是，只因為他是富二代，有肉食，有充足蛋白質，身體有肌肉，熊腰虎背，有力量，自然好打。古代人人都係農耕苦力，又有力役、兵役，人人都可「200斤麥子、十里山路、不換肩」，但問題係，食物單一、缺乏營養，唔長肉，奀挑鬼命。

現代人應該點做呢？你肯做運動，無論藍球、足球、跑步，減少打機，已經勝過許多人，跟住吃天然食物、優質蛋白質，減少垃圾食物，又勝過許多人，最後接受拳擊、泰拳、巴柔等較真實嘅搏擊訓練，又勝過許多人，最後參與各種搏擊比賽，爭取經驗，當你經常勝利，有名氣，大型搏擊比賽都會主動邀請你參加，甚至只要肯參加，不論輸贏，就有出場費…

人唔應該追求嗰啲虛無飄渺嘅嘢，靠觸感反應就可成為搏擊高手？唔好咁天真喇！古人可以咁做，只不過資訊有限、知識有限，練無可練，找不到突破位，咪呢啲細微細眼嘅嘢都研究一番，甚麼功夫高手？都係吹嘅咋嘛！就算霍元甲又點呀？遇到大內高手咪一樣「粒水」，盡其量都係興趣班或業餘拳手水平，甚至古代嘅鏢師也比不上，因為鏢師用命嚟搏，若非熊腰虎背、膽識過人、武藝超凡，一早就死了！

裝睡嘅人，永遠叫唔醒。尤其如果嗰個人攞𡁵著數，死都話詠春好勁、打死人。我膽敢同你講：你勁唔勁？好唔好打？跟詠春沒有關係，但不代表詠春無用，好比一架高性能跑車，經過調教，一定如虎添翼，但如果用我架豐田Yaris，請最頂級嘅機械師幫我調較，也沒有甚麼分別，1500cc偈，你想點呢？唔通會快過法拉利咩！