大不列顛有人耍詠春，應是首都「淪噸」嘅「糖人街」但我睇唔到甚麼亮點…
我都成日咁講，格鬥要計好多野，男、女、種族、身材、磅重、年齡、肌力、體能、格鬥訓練、性格等等。
假設所有條件相若，則手法嘅優劣就係勝負嘅關鍵，但這個世界從來都沒有公平，同一年幾進入學校，有的明顯較強壯，有的明顯較瘦弱。有的明顯記憶力較好，甚麼書都讀得很好，甚至攞奬學金，有的好似我咁低B，幾努力都係得個吉。
學功夫，某程度只不過好似讀書唔得去補習，盡可能扭轉這個平衡，唔代表真係可以，除非上述嗰啲條件唔係差太遠。遇著勤力嘅天才，你係完全冇得玩！
所以我經常說單單學黐手冇用㗎！你要在各項條件都跟別人接近才有得玩，體能、肌力係最基本，當然要比較職業拳手、業餘拳手，係冇得打，這是事實，不必爭拗。
你訓練徒弟去到業餘拳手嘅水平，佢咪可以有機會打敗業餘拳手，道理好簡單，但絕大部分教頭都做唔到，因為九成都係戲子，扮做師傅呃學費，又或者已經係第二代、第三代戲子，自欺欺人嘅地步已經去到登峰造極，我唔可以話佢有心呃人，因為佢自己都呃埋自己，以為自己係得，以為咁握拳握到錯晒都可打倒人，以為食煙食到肺功能咁差仲有戰鬥力，呢嗰唔係天真，係無知！
所以如果某一派系操到勁fit，即使手法有甩漏，我唔可以話佢唔打得，因為基礎雄厚，身高、手長、力大，獲勝機率更大，「盲拳打死老師傅」也是這個意思。
以前韓信可以「明修棧道，暗渡陳倉」，至諸葛亮北伐已經不可能成功。韓信可以「致之死地而後生」，馬謖卻失敗失街亭。以前，霍斯格雷斯可單憑巴柔，奪得三次終極格鬥冠軍，今日要具備攻擊技及摔鎖技，才有機會。
天朝功夫，有很多神秘色彩，初期仲可以呃下人，或甚真打可以「出其不意、攻其不避」，但今日條橋已經穿晒啦，資迅發達下，所謂嘅優勢也不存在，反而實實在在嘅身高、手長、拳重，才真真正正佔據優勢，有時咁諗飛㬹咪飛㬹囉，真正打得嘅人，有冇詠春都贏，反之奀挑鬼命、食煙食到肺功能得幾成，有人搶你嘢，跑兩步都冇氣去追，任你黐手玩到識飛都冇用，打得嘅，仍然係打得，唔打得嘅，仍然唔打得，詠春只會錦上添花、如虎添翼，並不能雪中送炭，使唔使咁執着呢？
沒有留言:
張貼留言