移英日記（109）轉能源公司慳錢

 最近許多人都說轉去「八爪魚」能源公司可減費用，對我來說，最緊要係計數，條數計得掂，你咪去，計唔掂，咪按兵不動。

我用了最近的月份及八月做比較，八月是夏天用量，冬天用量應以十二月來計，但因為未到，上年的能源費勁升，又不能作準。經過比較，我用的「郁得」（68.3鎊）跟「八爪魚」（68.61鎊）根本冇分別，價格差距不足一鎊，而且仲係「郁得」較平。

雖然每度電及煤，都係「八爪魚」平，但係standing     charge卻比「郁得」UW 略貴，故此最後價格差不多，除非要多用量，「八爪魚」才有優勢。

要真正慳到錢，要用「八爪魚」浮動價格計劃：

晚間收費特平，至某一時段，零晨一時至一時半，更出現負電費-0.44P，意思係每用一度電，「八爪魚」俾番錢你。

但繁忙時間，每度電43.87P比任何公司都貴。

「商家佬」唔會死錯人，佢地利用經濟學的差別定價，賺取最大利潤。向不同的人收取不同費用，對有電車的人可晚上充電，或時間上較有彈性的人，每日又有心思留意明日每個時段電價，安排時間用電，才有意思，我知道有儍佬為慳錢，零晨才開機洗衫，全日的碗碟，留到零晨開洗碗碟機，電車充電、輔助動力單車充電、手機充電、尿袋充電…無所不用其極！

如果有電車，有賺！有Tesla的Power wall儲電，有賺！住獨立屋，晚上洗衫、洗碗，不會影響到別人，慳到錢！無業遊民或日常生活有極度彈性，非常care用電，慳到錢！如果不屬於上述人士，這間公司跟你也沒關係。

（安裝Power wall並不便宜，這類流動充電池，在負電費時勁充，如果部機唔壞，有機會回本。）