最近知道一個消息…
有人持三球（300萬）移英三年，使剩幾十萬回流…
如果識投資，過去借日圓買美元賺息差，每月肯定有一萬，仲未計炒美股賺嘅錢，根本不成問題。
如果唔識投資股票，買英國樓，唔使交租，兩夫婦工作，丈夫全職，老婆兼職，千幾、二千鎊肯定夠，仲有錢儲蓄，如果自住樓買得平，有剩錢，分分鐘夠首期，有工作借到「魔技」，供多間都得。
按照我自己實際運作，早前20個月也用了一球，每月開支兩萬五，20個月已50萬，車19萬幾，加加埋埋，係要一球。由於許多是一次性費用，車根本冇需再買，五年IHS及申請費用，以此推斷三年約需球半（150萬）足矣！
用得三球，肯定係富貴版移民，出街食飯次數會否過多？子女是否入讀私立學校？夫婦有冇積極工作呢？明知自己並非投資能手，三球不能食過世，有冇部署好六年使費如何分配？
如果子女讀私校，每月兩皮，住嘅地方就不像公校要跟校區，可選平一點區域，租金每月一皮，不買車、不養車、撘巴士、踏單車，不外出吃飯，47便士麵包、加55便士沙甸魚罐頭，或者搽牛油，或者煎蛋，2升奶都係2鎊，廿蚊港紙當水飲都得，家庭開支皮半足矣，每月四皮半，一年54萬，三年咪球半攪掂。
如果三球收五厘息，一年收15萬，平均每月有12500元，丈夫一人工作賺皮半，子女免費讀公校，夠生活了，六年入藉後，本金三球絲毫無損，仲可以反攻Hong Kong，分分鐘仲可買到樓添！
其實有錢移英係絕對優勢，要唔成功，基本好難，要敗家到咁，除非平均每月使八萬，36個月使了兩百八十幾萬，洗腳唔抺腳，去邊度都死。
沒有留言:
張貼留言