大不列顛駕車前部署

 雖然我早早已是無業遊民，但漁村最後一個月，許多事仍要急著辦埋。

去大不列顛，漁村車牌可以照用一年，但最終也要換大不列顛牌，如果係新牌冇所謂，如果係舊牌，一定要申請駕駛執照細節証明，否則大不列顛只會按你張牌的日子來決定牌齡，一張牌十年，未到期的牌，得幾年牌，當你得幾年牌齡，新牌仔，保險就貴了。

運輸處預約係沒有這個選項，焗你晨早去排隊攞籌，「久濃」辦事處八時已有人，記住排駕駛執照那條隊，九時開閘，分批取籌，在23-26號櫃位再排，九時十五分辦理，九時二十三分俾160元攪掂。漁村行政效率數一數二，如果有得預約更省時。（大不列顛冇得比）

去到大不列顛，不必急著駕車，等埋個簽證半年，轉埋大不列顛車牌都未遲，因為保險差很遠，有大不列顛車牌加咁多年牌齡，冇俾人扣分停牌，加埋咁上下年幾，差很遠的。正所謂：「財不入急門」，何必急呢？不過以防萬一，我也申請埋國際車牌，真係急著要用車，租車公司也受我玩。

不急著駕車，租住大不列顛也要預早部署，住址要就腳，步行可帶小朋友返學、去超市購物，或近巴士站、輕鐵站等。

（大不列顛住宅永遠不可能跟漁村比較，漁村落樓直入商場，這個屋宛步行可去Tesco、麥當奴，最重要免駕車送小朋友返學，不過13分鐘，冇車也可接受。）

（「北極熊」國禁運燃料至歐洲，駕電車是不二選擇，Honda E續航力有限，但玩味甚強，沒有倒後鏡，突出來是攝錄鏡頭，靠車內畫面顯示，而且有三腳插頭，可駁拖板為屋內供電，如果在晚間電費平時充電，日間用電，不失為省錢好方法，不過Honda E續航已不夠，又要分電俾屋企使用，行唔通的。有馬屍黑的power wall，方為正路。）