熊巿已現，唔飲星巴克，飲茶記咖啡

 昨日星落五丈原，悲傷之情，慘過諸葛升天。不過路仍要走，唔飲「星巴克」四十餘元咖啡，可以飲「牛奶冰室」買件包加八元的咖啡，做人應該能屈能伸，沒有路是行不了。

(我唔熟咖啡，但一試都知龍與鳳，40元、8元怎會冇分別呢？美式咖啡原來就是double espresso的溝淡版，試過就知了。）

倘若爆倉，一早就爆了，冇仇報，槓桿投資中，低於保證金要求，便強制斬倉，係咁先。正所謂：「出得黎行，預咗要還」，槓桿投資是借錢投資，最大損失是Total loss。

倘若守得住，根據以往經驗，大熊巿後，三幾個月，個巿一定反彈，但亦有兩次一沉不起。沒有人有預知能力，大家都係估估下。

故此，投資應小心謹慎，投資有盈利及實力的公司，避免只有空洞概念，未有實質成果及盈利的公司，槓桿投資也要避免用盡倍數，保留更大緩衝，避免股巿下跌，觸及保證金。

（文章只屬個人分享，沒有任何投資建議）

（諸葛亮最後一次北伐，病死於五丈原。一生的心願，盡成泡影，唐朝詩人杜甫的詩「蜀相」，「出師未捷身先死，長使英雄淚滿襟」，實令人感慨！）