IB投資系列：縮骨成富

 對於遙不可及嘅人，我們會羨慕佢哋，好似股神。但對於平凡嘅人，我們會傾向唔會欣賞佢成功，寧願睇佢點仆街，因為人會妒忌，點解佢會成功？我卻失敗呢？如果一班人聚會，我仲記得科網股興起了某些人富起來，他們不住講買邊個樓盤好，我完全沉默，係好冇癮！

這個網誌係小眾去睇，超級富豪根本唔會聽我廢噏，窮到燶也聽不入耳，只有差唔多背景嘅人，才會圍爐取暖，分享點滴，所以都會喜歡睇人點仆街，仆街冇問題，自己學會日後減少仆街才最重要，這個世界並沒有百戰百勝嘅神話，秦滅六國，都係有贏有輸，秦最初派李信滅楚係輸，因為秦王政想用較低成本，20萬兵就想狼吞楚國，做生意個個老闆都係咁縮骨，所以咪仆街，後來王翦要用60萬兵才成功。

正所謂：上得山多終遇虎，賣期權也是一樣，惡夢就是行權，見人仆街最開心！

今期某電車有好消息，AI超級電腦供應鏈由「抬跡殿」分到「衫升」、「嬰突耳」，所以股價上升，雖然我覺得件事流流地，冚世界都知「抬跡殿」在晶片製作領導全球，「衫升」嘅高階晶片良率低，「嬰突耳」自己粒CPU都要外判俾「抬跡殿」，兩個豬隊友如何幫到手？橋唔怕舊，最緊要受，巿場有人信有人跟就可以了，股價上升，看漲期權就要行權。

行權冇問題，最緊要行權價係高於你買入成本價，最多賺少一點，唔好蝕就可以了，325元及327.5元都強制賣了100股，合共沽了200股，股數少了，下星期咪又賣看跌期權，吸納番啲股票，循環不息！

本星期賺差不多三皮，期權金賺差不多一皮，合共差不多四皮。要知道你嘅財富唔係單睇你賺幾多，也要看用幾多。

你賺嘅錢只會用一部份，其他要再投資，才能積少成多，聚沙成塔。你話老闆縮骨才咁富，係有道理嘅！

（以前林伯都係食老麥魚柳包，十分孤寒、縮骨，但上代人就係咁慳出嚟！最終致富。）

（我去完「鄉講」做豪客，返回「愛叮寶」繼續食草吧！自己煎隻蛋，夾份三文治，用得幾多錢。做人要能放能收，唔係下下亂使錢。）

(嬰國嘅咖啡店，「升爸黑」唔多，主要係Costa，我絕不去Costa飲，要飲就自己屋企沖，唔係俾唔起，賺到錢都唔捨得用幾鎊外出飲咖啡，因為覺得太貴、唔值。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。