IB投資系列：扭盡六壬，要找出英國投資出路

 大不列顛是稅務最繁瑣的地方之一，經過一次稅務年度，報一次稅，甚麼都唔使做，因為已經消耗所有，又怎有能力再戰江湖呢？

如果轉做英國IB，美股ETF全部冇得玩，甚麼VOO、QQQ⋯⋯都沒有，只能用歐洲或英國產品代替，手續費高、發行量低、流通量細，一句講晒：嘥氣。

至於「即日鮮」（短炒）又冇得玩，因為賣出股票30日內買回，會觸發bed and breakfast，每年報稅計算極其困難，極端情況如股票蝕賣，股價繼續跌，三十日內低位渣貨，佢會計你低位價作為你蝕賣成本，變相話你賺錢要交稅，人地已經蝕錢，仲要交稅，都唔知甚麼道理。

英國政客係為了阻止人避稅，用盡每年免稅額，但唔係隻隻股票再買回一定有著數，分分鐘越買越蝕，投資最重是有一個自由環境，作出有效部署，才能有利可圖，倘若好像某些地方為了托巿，作出窗口指導，只買不賣，外國投資者仲唔借機散貨咩！

至於「埃沙」ISA免稅投資戶口，每年得兩萬鎊（約20萬港紙），就算你投資好叻，一年有10%回報，好未！一年得2萬港紙，平均每月得千多元，在英國根本無法生存。又冇槓桿，又冇短炒，又要買垃圾ETF，又有固定月費，點搵到食呢？

至於點差交易Spread betting，類似牛熊証的投資衍生工具，跟証劵行對賭，可買升或跌，只要估中就贏，估錯就輸，屬於賭博，由於政府已向發行商收取稅款，故這類衍生工具賺錢並不需要交稅（但要証明這收入並非唯一收入），不過這類投資七成都係輸錢，莊家永遠係贏家，因為佢唔需要賭，有人買升，有人買跌，空出的部分可購買巿場產品做對沖，佢只需收你槓桿手續費已經穩贏。

（以前D人成人話過大海跟何生對賭，做人唔好咁天真，賭場是一門生意，有人賭就唔會輸，冇人賭才會輸。）

我已經扭盡六壬，用盡所有辦法扭轉逆數，祈望找到大不列顛投資之道。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。