移英日記（103）做「量地」的一日

 冇工作，做「量地」，有更多空間，駕車去老麥買早餐給家人，我早上斷食，無損咁樣做。

（「歪芺」及兒子的早餐，今次做埋外賣佬。）

（加埋VAT消費稅1.61鎊，合共9.68鎊。）

早上得幾度，斷食我不是怕肚餓，而是個身好寒，之前工作，密住做，頂得住，但今日練完拳擊，都覺得寒，局住提早一點食野，始終又唔係明星，要無時無刻keep住身型，健康也是重要。

下午駕車至某弟兄家，三家人一起聚會，談談這裡近況及未來睇法，感恩各人都在適當時候變賣物業來到大不列顛，佢地都在這裡置業，落地生根，只有我仍有顧慮，因為要考慮校區、生活便捷、樓宇類型等因素，仍未有合適放盤。始終花太多錢在物業，是負債，雖然不用交租，但住Flat，屋宛管理費、維修費、保險費也不會少，住House，一切維修自己負責，舊樓問題也不易處理。

雖然我預咗若買了House，要買套鋁架及工具，用番自己撘架佬專業，自己去屋頂清潔、維修，兩層樓算甚麼高度？港珠澳大橋又係咁做，這裡冇足夠勞動力，即使不介意俾錢，也沒有合資格及經驗工人，求其搵條友做到天一半地一半，一肚氣也要俾錢，自己做冇咁嬲。所以大部分人都會自己維修，上網一定學到，除了水、電、煤，一定找人攪，其他一概自助，要學習這種生活模式。