愛丁堡詠春：執迷不悟

 我哋用普通常識common sense去判斷，免得有人說這不過係某一系詠春嘅偏見。

某些詠春說小念頭嘅雙前撳手係用作雙掌攻擊敵人腹部。倘若對方係正常人垂直咁站立，你嘅掌要打敵人腹部，手指扭斷都未打到，對麼？除非此人並非垂直站立，而係後傾，好似後傾詠春咁樣，才能成立。

雙佛手同一時間殺頸，唔係唔得，但你要兩人身高相若，而兩人與你嘅距離又相同，又剛巧進入你手嘅攻擊距離，機率極低，拍戲就可以。

雙頂手或叫雙提手用屈曲腕去攻擊下顎，真係好方法麼？一不小心手腕也受傷，正常搏擊只會用上擊拳（下勾拳），詠春用摌頸手（橫掌）。

如果唔識功夫，唔識詠春，被人促住隻手，都想用脫手解決。詠春概念好簡單，促人與被促，也是一樣，大家都冇了一隻手，大家都佔不到便宜，不過如果你一脫手，就二對一，人家反而多隻手，自己陷入危險。

（「蝗公」早已指出某些詠春「來路不明、其名不正」，如果人們仲係執迷不悟，咁都冇辦法啦！）

愛丁堡詠春：緣木求魚

 外國有些人稱「講手王」翻譯成The king of talking hand，我雖然英文水皮，也知道極不準確，以前人用講手，只不過怕招惹麻煩，其實更準確應是：The king of street fighter。

如果真係以用力奧妙而言，可能「念頭王」嗰水會更精湛，但如果以真實打鬥計，「講手王」這水有實戰作為較正，可行性是較高，當然走咗樣就另計喇！

事實上好多已經走晒樣，我呢啲人無情無義，「綜獅」死前嘅遺作都說三道四，更力言師傅、師伯都唔會放過，我好簡單嘅啫，當你在詠春界有一定輩分時，如果你嘅身體已經唔能夠support你完成準確嘅動作，便不應在公開場合公開展示，一則傷了自己嘅威名，二則免得有人借這些錯動作，作為自己正宗嘅憑據。

（正所謂「獻醜不如藏拙」，年幾大，做唔到，咪做唔到囉！）

（以前怎樣威武，咪永遠留在記憶吧！）

老咗走樣，都係無可奈何，大眾要求下去表演，也是無心之失，但更多是濫竽充數，亂咁噏當秘笈。

小念頭有所謂「雙撳手」，真係為咗雙掌擊敵人腹部？

有所謂「雙拂手」，真係為咗同步攻擊左右兩側敵人嗎？

有所謂「雙頂手」或叫「雙提手」，真係要用雙腕攻擊麼？

有所謂「脫手」，真係為咗脫去敵人嘅牽制？

如果根據上述咁解拳，你期望會練到甚麼詠春拳呢？只會係緣木求魚吧！

愛丁堡詠春：日字衝拳

 「鄉講」嘅詠春主要係「孽聞綜獅」所傳，除了血緣詠春嘅「孽種」、「孽政」、「爐民敢」之流，主要是詠春四大天王：「標指王-涼廂」、「尋橋王-烙妖」、「念頭王-隨上填」、「講手王-蝗唇涼」，我們成日話乜嘢系，就係指跟邊條水。

所有人，我也不用正名、真名，明就自然明，唔明就唔需要明，沒有甚麼演算法，入到嚟睇係緣份，鍾意就睇唔鍾意就Get out，係咁多，流量對我冇意義，最重要啲股票得唔得，亂噏發噏風，都係打發時間，抒發感受。

師伯「瘟鑫涼」師傅原本跟「涼廂」師傅嗰水，但因為教法較傳統保守，後來轉投「蝗唇涼」師傅，以其體系較靈活及主動，我們作為後輩，稱為師公，亦稱為「蝗公」，這個詠春體系亦稱為「蝗系」。「瘟師伯」將自己所學武功跟詠春整合，改為「實用詠春拳」，仍舊用詠春套路，但手法、名稱、動作跟傳統詠春不同，跟他們黐手就好像跟左勾拳手對陣，一不適應就會極速敗陣。

「瘟系」嘅拳係「斜45度拳」、不盡㬹，我唔知咁叫是否適合，因為打橫嘅拳叫「四字拳」Horizontal Punch，打直嘅拳叫「日字拳」Vertical Punch，「瘟系」這種拳，極埋㬹，借用肩胛、背肌嘅力，㬹底好重，利在力，不得不防。

本門用傳統日字衝拳The Wing Chun Punch，用腕㬹發力，打盡㬹，注重變化，打直嘅拳跟問手一樣，轉變任何手法都係最快，詳情應在「問手理論」解釋過，這種拳，比唔上「瘟系」拳咁埋㬹，利在變，因為改變競爭條件等於搬龍門，超屈機。

（「塵師傅」（右）所教嘅，就是「實用詠春拳」，以前在「瘟師伯」武館已係助教，武功高強。這個動作，傳統詠春叫膀護手，「瘟系」稱護膀手，因為護手更重要，膀手是水平式，僅僅膀住對手橋手便算，要留意佢嘅護手，翻手很快，記住手黐住嘅，已經管住，隻眼要睇住未黐嘅手。）

愛丁堡詠春：反噬

 我想整個武林、整個詠春，只有我咁唔識大體，甚至連本派宗師也不放過，直斥其非，但我自己已經保底，指出身體有病嘅情況係冇可能展示完美嘅詠春拳，我只不過以此駁斥一些跟足宗師死前動作，自視正統嘅荒謬。就算我自己嘅師傅、師伯，我也唔會放過，唔係我無情無義，只過面對詠春咁高要求嘅拳術，年老體弱就是一個死症，根本冇可能跟精壯時候嘅精準、細膩，相提並論，佢哋最終都會被詠春反噬。

早前當有人說師伯嘅詠春冇咁勁、動作冇精壯時咁精準之類的話，我總會第一時間反駁，說這是遊刃有餘，唔使去到咁盡已可解決問題。今日，我也不得不承認，人老咗，冇計㗎！就算你叫藍球技術最好嘅「咪膏阻噸」落場跟現役NBA球星打一場，也是不可能。就是拳王泰臣也打不贏網紅拳手，也是同一道理。

既然人老咗，詠春拳也會走樣，咁一定要找年輕力壯嘅展示才公平。

以此觀之，某些所謂「大師傅」，問題早早存在。左邊「大師傅」嘅護手都係公整，沉㬹落膊，也不貼身，是好的。但右邊「大師傅」，擸手衝拳，拳向天，明顯唔係進攻，作狀打橋，雙方也有後傾，問題早已存在。

點解早期詠春已經走樣？最簡單講法，樹大有枯枝，只不過詠春枯枝特別多，九成都係。留意許多嫩葉、開花結果者，很多都係帶技投師，有一定武術基礎，甚至食過夜粥，就好像一些接受了醫學訓練嘅醫生，懸壺濟世多年，再經專科訓練，當然如虎添翼，倘若沒有醫學訓練，直接讀專科，都唔會成為專科醫生，只會醫死人，詠春也是一樣，點解個個擘馬？因為冇傳統功夫，下過苦功扎馬三年，下裝肌肉唔夠。點解個個後傾？核心肌群沒有訓練。點解手法走樣？因為沒有較真實嘅搏擊訓練去較正，單單黐手，咪越偏越遠，與真實搏擊已經兩回事了！

以往一些詠春強者仍然永留在我們心裡，隨著今日人類壽命延長，身體跟唔上詠春技術，最終被詠春反噬。

愛丁堡詠春：要有真功夫唯靠自己

 有的人成日會咁講，自己個仔或外甥，點都會將真傳教給他們。問題係佢哋有冇興趣、魄力、潛質去繼承。

好像藍球之神「咪膏阻噸」，佢何嘗希望兒子繼承大統。

無奈兒子資質平平，恨鐵不成鋼⋯⋯

或許「綜獅」確有意佢哋繼承大統，然而有的詠春確實難登大雅之堂⋯⋯

呢個「大師傅」（左）最大問題，肩膊太緊，擸手飛㬹而非沉㬹落膊，你擸人手唔使就人，佢唔立刻膀手就佢死，呢個「大師傅」最喜歡衝拳並非進攻敵人身體而係打橋，係極之壞動作，這次殺頸手好少少，沉㬹殺上去，不過五指化開極難睇，姆指要扣，四指駢合，做戲都要做足先得㗎！

呢個「大師傅」（右）經常嘅壞動作係膀手束橋，要知道膀手要有足夠嘅角度才能發揮果效，細過90度肯定束橋，自欺欺人。另外，護手經常不到位，甚至absent，膀手又唔得，護手又唔得，詠春又冇抗打，咁即係點呀？自殺！自殺喺天台跳落嚟即可，唔使整色整水。

仲有這類詠春仲係「擘馬」加「後傾」，如果一受力，一定向後仆倒，怎會有技擊能力呢？

無可否認，血緣關係是先天優勢，因為父親確實願意無條件將一切傾囊傳授，我也想兒子學詠春，然而佢對Judo更有興趣，我也想兒子學投資，然而每星期俾一鎊叫佢儲錢，卻永遠儲不了，即使儲夠十鎊，我送多一鎊，佢都做唔到，事與願違。何況功夫根本唔係透過血緣去繼承，任你係「迫鹹」、「屍單」嘅兒子，啲波咪一樣咁屎！

移英日記（340）革拉屍歌過聖誕

 「愛叮保」去「革拉屍歌」，駕車約一小時，行高速M9轉M8十分顺暢，第一站當然係「特務酒樓」。

「天朝」點解要全球監控？海外臣民已經落地生根，他們鍾意點樣生活，發表甚麼意見，咪隨他吧！我就好簡單，食野嘅姐，唔係睇佢哋做戲，再者，在地球另一面，相隔十萬八千里，嗌破喉嚨都冇用，慳返啖氣練下詠春仲好！

返到酒店，攞了房，先去游水，冬天游暖水池，十分舒暢，又浸吓熱水按摩池，甚麼關節痛都冇晒了！我哋上了年紀，跑唔到步，因為傷關節，游水係最好嘅運動。

有一張雙人床、一張單人床，大家休息可以舒服。

飲杯野，傾下計。

交換聖誕禮物。

晚餐當然叫餸食飯，曾考慮中國城，最終選了Same Same，馬拉餐廳，小炒好過龍鳳。馬拉華人啲口味與講人一樣，乾炒牛河更是完全複製，好像寫輪眼一樣。

晚上駕車回酒店，泊在停車場，如果泊街，早上八點要駕走，酒店停車場要十幾鎊，泊在停車場8鎊24小時，安安落落。

早上酒店吃早餐，英國被稱為美食沙漠，再加上佢哋早餐流行輕食，求其便算，更加冇野食。

其實人都唔係要求好高，飲杯茶、食個包，其實這種生活，以前「鄉講」已經享有，何必去到十萬八千里外呢？如果人只需飲食就滿足的話。

（仆星day，嘩！咁重口味，「禍講女團」，俾佢嚇一嚇！）

愛丁堡詠春：信制度？信人治？

 詠春師傅盡是阿其那、塞思黑，怎教人失望！我曾經想過一生只需要一種功夫，我不貪心，只需要詠春，卻令我一次又一次失望。中間嘅空窗期，又跟過港隊教練學過跆拳道、空手道，又睇書、睇VCD自學柔道，善長雙手割、肩車、背負投等招，所以我帶個仔學Judo，我係知道教練佢想點，學受身係學摔法做準備，我係可以幫個仔補習Judo，解釋招式嘅方法等…。

「唔做中、唔做保、唔學詠春三代好。」（原文：唔做媒人三代好）我自己身體力行，送自己個仔去學Judo，深知國術唔會有甚麼好野，唔係套功夫唔得，係套制度唔得，國術全睇師傅好壞，空手道、跆拳道、柔道等，全靠制度，任何教練只要看色帶，就知你體能去到邊？要學甚麼？有晒規範。人治好？還是法治好？大家都明㗎啦！

我都係做投資，我都要計機會率，十個詠春九個流，機會率咁低，根本唔值得浪費人生。反觀如果有一隻穩穩陣陣，只要你有心學，一定去到黑帶，將來有機會打MMA或終極格鬥，點解唔揀呢隻優質股呢？這類訓練一定要外人教，因為擂台訓練好hard，可以恨心，也不破壞父子關係。

唔係全心詆毁，係客觀評價，大部分詠春都係廢拉…

（正常詠春，能夠一伏二，就應用最短距離進攻。）

（有的詠春卻反其道而行，先將手返回心臟前方再打出，有幾荒謬，就有幾荒謬，講道理時，不是說直線係最短距離麼？講一套、做一套，自相矛盾。「涼廂」系一生名譽盡毁，「標指王」嘅詠春就係咁仆街麼？）

愛丁堡詠春：詠春師傅都是阿其那、塞思黑

 回想以前閱讀天朝歷史、文學，都係詐騙史，陳勝、吳廣因天雨延期作反，根本係藉口，秦國嘅力役，全部有錢俾，延期只需罰款或力役便可補償，唔會要攞你命迫你作反咁低B，就是今日「泥老闆」身陷囹圄，只要佢認罪悔改，寫悔過書，在鏡頭前認衰，一樣可以保外就醫之類出獄，好像「𡁻加然」之流一樣，你達到政權要求，就保你富貴。

讀文學史，甚麼「文起八代之衰，道濟天下之溺」，全部都係老吹，如果你仕途光明，你會有時間做文學創作嗎？如果我全球有好多間武館，又要巡視業務，又要開Seminer掠水，怎會有時間在網上同你廢噏詠春呢！正正是一事無成、無所事事，才會這樣，當中嘅鬱結，只有自己知道，無人明白，唯有寄情文章，抒發心意！我怎會有「道濟天下之溺」嘅崇高志向，嗰啲仆街師傅做埋啲偷呃拐騙嘅事，就算我唔數臭佢，佢都預咗落地獄。

如果你根本冇能力、魄力去將一個普通人訓練成具備真正搏擊能力嘅詠春拳手，唔係偷呃拐騙又係乜嘢？你以為真正嘅師傅係咁容易做麼？你們不過是演員，扮做師傅，從來都唔係真正嘅師傅！

（拳王泰臣嘅師傅就是真正嘅師傅，師傅一死，佢嘅拳就走晒樣了，未打過一場似樣嘅拳賽。）

佢哋唔係師傅，係阿其那、塞思黑…

扮做師傅都算，也沒有職業道德，hea教、hea做，求求其其，自己也做得差勁，擘馬、飛㬹、後傾…有幾衰，做到幾衰，叫他們做阿其那、塞思黑，已經客氣。

（鬼佬詠春會叻啲麼？I don’t believe that ，我只能說大家啲手法都咁差，佢哋身型、力量有優勢，都會贏嘅，但絕不代表他們做得好，我知道該派詠春級別，黃色已經係九級，「涼亭」都係自封十級化士，九級應該係館長，個轉馬側身馬浮嘅，護手沒有隨著重心轉變而護住心臟，露出破綻，咁嘅詠春拳，食屎喇！全部都係偷呃拐騙，全部都係阿其那、塞思黑！）

（正所謂：「假的真不了，真的假不了」The truth will come to light sooner or later，英文仲清楚明白，我係咪詆毁？所有識詠春嘅人都會知道，除非你們都是同一水平。）

愛丁堡詠春：左堆右砌

 自從「突屍拉」(Tesla) 在「尚凱」生產，讓「天朝」真正學會做車，也沒有專利，你鍾意點抄就點抄，但「髀阿敵」、「少咪」電車可以好過「突屍拉」麼？當然不可能。同樣「涯屍磨耳」(ASML)嘅光刻機係集合全世界最先進科技，融滙貫通而來，再經過「抬跡殿」嘅實踐，將所有數據及經驗再回饋俾「涯屍磨耳」，再改進、再突破，試問高價聘請「涯屍磨耳」嘅工程師，再收購二手舊機、舊零件，即使做出一部光刻機，水準也差很遠，成本卻是天價。

（某地電車，人活生生都燒到變碳，屍骨不存。）

「郷講」好多人識砌機，去深水埗買舊機、舊零件，確實可以砌到一部電腦，但速度、效能、可靠度…怎可與全新型號嘅廠機相提並論，除非你可以買最新嘅CPU、記憶體，最新嘅視象咭、聲效咭。但最新嘅「菜屍」鏡片、最精密嘅零件，你可以買到咩！如果不能，砌出來嘅，不過十幾廿年前嘅光刻老爺機。收購幾十部虧機，才砌到一部老爺機，無辦法量產，也談不上技術突破。

今日嘅詠春都係左堆右砌出嚟，「綜獅」也師承三師，問題係零件從何而來，就是「綜獅」嘅兒子也不例外，在「綜獅」生前沒有認真去學，也沒有興趣去學，到死後才知是寶，可以賣錢維生，可是木人樁法也沒有學，唔通等「綜獅」報夢學番咩，唯有找其他門人學番，投桃報李，對方出書，以「綜獅」兒子之名為佢寫序，互相抬舉作為報答，後來反轉豬肚，互相指責，互揭瘡疤！

（當日曾是孖襟兄弟，出錢出力幫「孽種」。）

（「孽序」清楚說明「涼亭」曾跟「綜獅」學藝。）

（今日已反目成仇，「孽種」卻否認「涼亭」跟過「綜獅」，前言不對後語。）

（閱讀完歐陽修「朋黨論」，明晒！）

詠春從來都不是原創功夫，左堆右砌冇問題，今日嗰套詠春拳跟五枚師太嗰套，已經兩回事，加咗幾多，減咗幾多，已經無從稽考，問題係我哋左堆右砌是甚麼零件，最終係一部落後嘅山寨機？還是頂級嘅光刻機呢？

有的師傅做到但唔識教人，有的講到天花龍鳳但自己卻做不到，有的又說臨死前會講晒所有野你知，潛台詞即係跟到佢死為止，咁嘅師傅快啲去死吧！有的要另外俾錢上特別班才教你堅野，但嗰啲所謂特別班卻遲嚟早走，所教也永遠未入正題，唔知要科幾多水，上幾多個特別班才學到堅野…學詠春真係嘥氣！

我知道自己嘅詠春血統唔純正，終身也得不到認同，但我又何嘗想兜兜轉轉浪費人生呢！

愛丁堡詠春：以弱制強？

 同樣嘅詠春拳，都有好有壞，又或者一個更好。

同樣六點半棍，也有優勝劣敗。

一般人以為第二位師傅較好，因為耍得好睇，但真正利害係第一位師傅，因為佢手門好窄，功力深厚，招招攞命，實而不華，唔算太好睇，但又冇挑剔嘅地方，沒有多餘動作，真正嘅詠春拳就係咁樣，就係咁悶，實用主義為主。

我都講過，如果功力一樣，格鬥空間又有足夠發揮，六點半棍必破八斬刀，因為攻擊距離優勢太明顯。

同樣嘅生態環境也是極無情，大食細，強勝弱，也是不能改變。詠春以弱制強係好浪漫嘅事，但實際出現卻不多。

男必勝女，就算你學了十年空手道也是一樣。

職業拳手必破業餘拳手。之前網紅拳手打敗拳王泰臣，只因拳怕少壯，年青必敗年老。

當然這是普遍情況，如果好似王祖藍咁矮細，一般女性也有打贏嘅機會。「以弱制強」係營銷技巧，真正嘅以弱制強，只不過是相對嘅弱，唔係真係咁弱，好像楚漢相爭嘅帶兵戰力，項羽第一、韓信第二、劉邦第三，劉邦好似好廢，只不過對手太強，一個廢人怎可統一天下？征服異姓王嘅反叛呢？