愛丁堡詠春：發瘟詠春多的是

 我說十個詠春九個流已經十分客氣，真係堅嘅，咪得幾個，發瘟詠春多的是。唔好以為我踩低人哋、提高自己，等自己開班搵到食，呢啲呃人嘅陰騭錢，無謂賺，我係靠投資搵食，堅詠春也輪不到我呢啲垃圾詠春人，我自己一把年幾，帶著衰殘嘅身體等死吧！

這個招數要有效，第一，一定係側身捆手，正身捆手係冇用㗎，個架都散晒。第二，要攻守同步，擋完才打，蚊都瞓囉。第三，側身就用低側橕，打脛骨位置即可，要快及最短距離。第四，「捆手側撐」在木人樁法已有，練開嘅招數一定最熟練及有效，何必畫蛇添足？

又有的詠春師傅玩連招，霹靂啪啪十分好睇！問題係真正嘅對手會跟足你預定嘅劇本嗎？你知道根本唔會，根本係做俾人睇，就好似一些武術表演，連招數十個回合，而且速度極快，唔識功夫嘅人，以為好勁，知道內情嘅人，就知道不過是表演，大家夾好晒，好像功夫電影一樣，但放在實戰，等於自殺。

詠春黐手訓練，本意就是要隨機應變，因應不同場景用不同手法應付，避免練死招，偏偏有人卻為了增加效果，吸引眼球，增加流量，如果真係咁掂，世界拳王、終極皇者…應該有一個席位，偏偏一個都冇，就正好証明今日詠春界做緊嘅事係跟真實搏擊背道而馳，個個師傅，懶到隻豬咁，體能差到你唔信，氣功喎，咪唔使郁咁多咁快，慳水慳力，有的更嫖妓為樂，食煙、飲酒，無惡不作，如果你都信這些人有搏擊能力，或者教到你有搏擊能力，唔係你天真，而係你真係無知、白痴！嗰個師傅心跳率高過40嘅懶鬼，都無謂浪費時間金錢跟他學了。（當然我也曾經無知、白痴過，才能講出這番話）

真正詠春有實力嘅人，對詠春嘅熱愛，係非比尋常，從不計較別人眼光，從不計較付出，如果論威武，確係比唔上其他功夫，因為詠春係「女人拳」，在武術界睇低不知幾多年，人們只知「硬橋硬馬真功夫」，對詠春拳毫不了解，直至在街頭戰打出名堂，才改變人們嘅觀感，有些曾經學過這門功夫，但已經轉學其他功夫嘅人，立刻變成詠春師傅，巿場需要，自然會帶動經濟。

早年，曾經因為黐手跟招允系某師傅認識，佢告之以前在大旗嶺，朝朝被霹靂啪啪聲攪醒，唔係嗰啲衰野，佢話原來被我師傅炒醒，晨咁早打木人樁，痴X線！真係一個狂人，某師傅自問比不上，要為詠春瘋狂嘅人，才有成就，就好像健身界嘅「亞落輸華申力家」，佢好色亂攪關係成為垢病，但佢以前嗰個完美嘅body，真係前無古人，後無來者！

瘋狂詠春係極罕有，發瘟詠春周街都係，這就是客觀嘅事實。