IB投資系列：適當部署，影響未來

 雖然開了英國免稅戶口ISA，但原先嘅IB投資戶口仍要保留，一則ISA每年只可放2萬鎊，仍需要時間轉移。二則投資手續費貴，又限制多多，又冇槓桿。

不過啲錢放在英國銀行，都係四厘左右，我放在Chase活期有3.85%，唔使困死啲錢。

一年3.85%係少，但都要報稅，好像漁村個「獅子」銀行得幾毫子都要報，大不列顛係全球徵稅，真係麻煩，除非你跟外星人做生意，啲錢唔滙入地球，大不列顛法律不適用於宇宙。（外星人就冇喇，邪靈就大把）

作為生意人、投資人，或者你叫我做三流交易員也好，如何將利潤極大化，才是重要。於是我將2萬鎊注入自己嘅ISA戶口，2萬鎊注入「歪芺」嘅ISA戶口，這4萬鎊嘅機會成本就係放在Chase嘅3.85%利息（1540鎊），現在兩個ISA戶口兩日已賺706鎊，要超過1540鎊，easy job！

同樣道理，「強迫金」雖然不能提取，但如果在早期將「忠」、「講」基金，轉移至「勾」、「尾」基金，也有不錯嘅回報，所以不在乎能力，而係你有冇做？點樣做？影響你嘅一生。

平時要多聽多睇不同基金佬、講股佬嘅分享，雖然佢地只反映佢地所代表嘅投行、基金嘅觀點，但當睇晒不同嘅觀點，對大局就有一定嘅掌握。

AI時代，邊個能造出運算能力強嘅GPU，就係贏家，不過唔代表你買了黃仁勳及其表姪女蘇姿丰嘅股票，你就會發達，做人唔好咁天真！

如果你140美元買了黃仁勳嘅Nvida（輝達）、227美元買了蘇姿丰嘅AMD（超微半導體），摸頂入巿，都有排頭痕！反之你用19美元買垃圾晶片股Intel（英特爾），趁佢反彈22美元沽，反而賺超過10%，所以關鍵係你用幾多錢買？幾多錢賣？沒有未來嘅法拉弟未來都有人炒，股票巿場，鹹魚青菜，各有所愛，不過你買好嘅股票，仲可以有點盼望，差嘅股票，一沉百踩，可以永無翻身之日。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。