IB投資系列：小心為上

 股票冧檔、美元貶值，都係例牌知道將會發生嘅事，只是幾時發生，冇人知道，高奴散貨已是最好嘅明証。當然高奴貨多，要時間散，如果一次過散，整冧個巿，個價跌得太快，對佢都冇著數，待走得七七八八，真正嘅股災才正式開始。

中間仲有甚麼戲碼？用甚麼劇本？如果知道的話，仲可以標個尾會，賺多一鑊！不過呢啲資訊，都唔輪到我哋低奴知道，要妄想賺多一筆，似乎不容易。

要甚麼都唔做，或者齋持有現金，或買貨基，或短期「尾債」，收幾厘息，許多人都會按奈不住，因為人人富貴，自己孤孤獨獨，獨守空房，真係好不是味兒。

不過正因為危險，就更要小心！現在嘅投資就好像揸住個計時炸彈遊戲，你要獲得最大利益，就要揸住個炸彈越耐，最成功當然是爆炸前一刻放手，攞盡著數，賺到最盡，然後沽貨，不過咁，這樣做最容易炸死，一個浪冚過嚟，分分鐘跌30%至50%，需唔需要為賺多幾個%，而要咁冒險呢？如果槓桿孖展，更會蝕突，唔係同你講笑。

買重保險，準備好燒炭、跳樓，然後落地獄，永不超生，咁就隨你吧！每個人都有自由意志，上帝都唔可以干涉，何況人呢！

（「芬哥」嘅技術再提升，領導全球，其他晶片公司分到嘅餅仔更少、更難做，難怪「鬚媽」嘅股價受壓。）

（「鬚媽」隻股票上唔到，佢鬥唔過「芬哥」，只不過「芬哥」食唔晒個餅，漏兩成大家有少少油水，不過「芬哥」一出新野，又再度領先，巿佔率再加大，其他公司爭嗰一成幾餅仔，真係好困難，都係走咗先，唔好搏！）

（唔好妄想「彼突幣」有避險功能，股票冧檔，虛幣一樣要收皮。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：財富蒸發

 「尾債」危機湧現，有人話「突朗浦」會借勢放棄「尾元」，採用「彼突幣」，若如此，虛擬貨幣弄假成真，價格定必大升，你可以駕法拉利來炫耀及揶揄我唔識投資，我真係恭喜你呀！

「尾帝」透過「尾元」盡收天下財富，「吸星大法」嘅戲碼都仲未開始，全球割韭菜都未開始，「尾元」也未至不可救藥，全無利用價值，幕後玩家會咁快棄棋麼？「尾帝」、「尾元」只不過係載體，隨時可找另一國家、另一貨幣，借屍還魂，問題係咪已經吸乾吸淨？現時有冇更好嘅載體麼？

再者，「攣柱局」一話減息放援，股票跌，「彼突幣」也跌破十萬美元，幾次都係咁樣發生，倘若「吸星大法」一出，股巿崩盤，「彼突幣」也難逃厄運。因為股票可以槓桿孖展買，但虛擬貨幣不能，一旦股票下跌至保證金，劵商會不問價斬倉，你無仇報，唯一自救是變賣虛擬貨幣補倉，所以股票跌、虛幣一定跌，股票崩盤，虛幣亦會崩塌！不能獨存！

個巿係咪都要冧檔，點保「彼突幣」呢？如果你話唔冧，咁「爸非突」、「黃人芬」等高奴沽貨，係希望低奴都可以享受股巿上升嘅成果，佢哋賺夠，益下大家麼！霎戇！高奴只會顧自身利益，你死你嘅事，托高個巿，等你哋班低奴在高位接火棒，然後逃之夭夭！每次金融危險都係咁樣發生，每次啲人都話「爸非突」老矣！有錢都唔識賺，次次人哋走晒，跟住個股巿跌到一仆一碌，然後再以救世主姿態入巿支持，財富又翻一番。

歷史給予人類最大嘅教訓，就是人類從來都不會吸取教訓，幕後玩家都唔使咁煩，成日改劇本，用番舊橋就已經足夠，俾你班友賺少少有乜所謂？跟住全部割韭菜，一鋪清袋！

如果所有人現兜兜買樓、買股、買虛擬幣，當然冇泡沫，但實情係，人人都槓桿炒股，賺到錢再買虛擬幣，公司發行可換股債券炒幣，所以實際有唔知幾多倍嘅資金進入虛擬貨幣，以致幣價攀升，當巿場有任何風吹草動，就會造成骨牌效應，泡沫立刻爆破，財富立刻蒸發。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（206）反思無聊人生

 人生係需要反思嘅，尤其移英之後無所事事，雖則自己覺得很忙，要練英文、練功夫、練結他、做家務、忙投資、讀聖經…但內心仍然感到空虛，沒有一樣令到人生感到自豪嘅事，每樣做到少少，但冇一樣有超然嘅感覺，十分納悶！

投資都有少少成績，夠養活一家人，但自己想買嘅樓卻買不起。練功都叫有板有眼，但始終離不開興趣班水平，始終體力、時間所限。練結他，勉強夠彈和弦，唱下詩歌，自娛可以，難登大雅之堂。英語有些音聽唔到，就永遠讀唔好，現在仍在改善港式英語發音，仍在又聾、又啞、又文盲嘅狀態…

的確賺到幾個嗅錢，物質生活已比許多人好，今年已自駕遊、郵輪假期，要飲茶食點心，或壽司、拉麵，自助餐…英國真係冇野食麼？全在乎你肯唔肯俾多啲錢。兒子聖誕也買了最新變型金剛One，物質確是豐富，但內心仍是欠缺。

正所謂：「倉廩實而知禮節，衣食足而知榮辱」所以治國之道，首要富民，如果攪到民窮財盡，一定係昏君。然而富足只不過第一步，讓你有條件思考人生問題，如果食都食唔飽，談人生嘅意義也是奢侈。

理性上，我當然知道富貴榮華，不過是過眼雲煙，要是做到甚麼甚麼高層，到了某個時候也要退下來，就好似今日移英講人，就是以前佢哋幾風光，我與他們也是一樣做最低工資嘅工作，博士整嘅餅會好食啲麼？校長執嘅房會靚啲麼？我反而冇這個落差及包袱，因為從來沒有風光過，爛衫、爛鞋、爛錶、爛工、爛樓…

或許就如電影「激戰」程輝嘅一句話：「我唔想到咗熄燈嗰陣，連一件值得記得嘅事都冇啊！」人有時都會貪心，比人活得好都未夠，還要活得有意義，有崇高嘅價值…

或許就如「馬屍奴」嘅需求層次論，人並不會單單得到基本需求就會滿足，最終要達到自我實現。

廢噏完了，都係要返回現實，已故「加驅」結他咁勁，玩到女朋友都走埋，已故「聾哥」功夫咁勁，係提早將生命燒盡，到了我這個年幾，家庭責任重大，玩下功夫、玩下音樂自娛便算，發夢就早啲唞啦！

（成就係窮人嘅妄想，只係富人嘅專利。不過俾你做到晒一切，關係搞到立立亂，個仔改名換性，難道上帝仲要讚賞你麼？）

IB投資系列：虛擬幣泡沫爆破

 有間公司叫「咪高車力治」，股價不住上升，仲勁過股王「揮撻」，好多人都發達。

該公司係靠槓桿借錢買「彼突幣」，正常銀行、金融機構、劵商肯定唔會借錢俾人賭，於是發行可換股債券去買幣，當幣價升、股價升，股本倍增，再度發債，不住無限槓桿，錢生錢。

不過倘若幣價下跌，股價下跌，持有可換股債券持有人要錢唔要股，公司就會被迫變賣「彼突幣」還錢，而且巿場不止這間公司咁做，當大家一齊沽貨，定必引發泡沫爆破。

要All in買虛幣或投資這類公司，首先要買重人壽保險，確保保單已經生效，唔好連累家人，然後你想點都唔阻你，阻人搵食猶如殺人父母，不過跳樓、燒炭自殺，一定落地獄，殺己跟殺人一樣，唔好好像某些人做完壞事，仲話天堂留定位俾佢！你第一日All in買虛幣都預咗㗎啦！

某銀行嘅「強迫金」，佢嘅北尾基金，今年都有25.93%回報，當你係盲毛，唔識投資，求其買尾國股票基金都唔會死，使唔使買埋啲虛擬幣？未買已俾「弊少爺」呃錢，又或者俾「將志臨」代言嘅交易所呃晒，買幣又慳錢唔用冷錢包，俾黑客偷晒，交易所執笠又冇晒，貪少少利息放喺人哋嗰度又俾人呃晒，啲公司無限槓桿炒幣，虛幣泡沫爆破，一鋪清袋！

都唔使等量子晶片推出，危機已經擁現，我想問下，你哋買虛擬幣想有甚麼結果？如果妄想好像啲人早期無無聊聊下入了十個八個，無啦啦發達都唔知咩事。如果你諗住係咁嘅話，今晚早啲唞，發夢吧！

（ISA免稅戶口，每年放兩萬鎊，全免稅，現純炒美股，四個月賺了6100鎊，突破六皮，30厘，買虛幣？霎戇！買定棺材差唔多。）

（你以為虛擬貨幣真係值錢？NASA話送天上一粒星俾你又如何啊？幾十億年形成，無價寶嚟㗎！你哋明唔明我意思，幾百億光年，你有命咪去接收囉！有許多野，講到咁天花龍鳳，吹咋嘛！你認真就真係傻啦！幕後玩家一收網，全部人便割韭菜。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（208）格拉斯哥過聖誕（二）

 住了一晚酒店，吃過早餐，就駕車去下一站…

架車泊了酒店一晚，15鎊（約150港元），過時要加錢，速速走人。

這個商場，總算旺，人流也多。

人哋臨老入花叢，我就臨老入溜冰場，年輕時啲損友叫我學溜冰，一定識到女仔，一定拖到手仔。由於冇聽到這些忠言，以致今日全場圍邊，我都大概知道這門技藝嘅要點，但好似遊水咁，需要更多時間練習才能。

跟住，又去飲茶，這次龍鳳大酒樓，順便比較邊間好食，炸魷魚、炒粉面，中國城好，腸粉、燒賣、包類、點心類，大龍鳳好，價錢也是大龍鳳較平，正所謂：「臨時演員都係演員」人哋專職唔係攪飲食，都做得咁好，真係值得反思。

兩日一夜嘅格拉斯哥之旅就完結，沒有白色聖誕，正日街邊清靜，出去吹風都冇意思，26號啲人出番呢，商場開門，有啲野睇下。回程時，由於日短夜長，早早入黑，高速公路多處冇燈，只靠自己嘅車燈及人哋嘅車燈，如果跟前車距離遠，成條路黑晒，只有自己車燈幾米光線，真係要小心駕駛了！

移英日記（207）格拉斯哥過聖誕（一）

 駕車45分鐘，首先到中國城飲茶…

睇下有咩食先？

出得嚟行，都唔使睇價錢，反正「黑哥」及「鬚媽」贊助今次旅程。個仔要食蝦腸、炸魷魚、墨魚餅，如果賺唔到錢，都唔知點算。

比漁村還好吃，還原七八十年代口味，真係冇嚟錯英國！

跟住駕車去酒店。

酒店位置不錯，可遠望格拉斯哥。

周圍行下，發現車站都關埋，靜到死。

店鋪大都關門，冇節日氣氛，好似死神一樣。

與友人一家交換禮物，每份10鎊，小朋友最開心。

在Lounge飲杯野，食下野食，傾下計…

晚上再駕車去食野，又係中式野，因為本地人聖誕不工作，沒有其他餐館。

IB投資系列：長期投資好選擇

 臨近聖誕最後一個交易日，高奴送大禮，大家一同慶祝耶穌降生嘅日子。

高奴電車「黑哥」及晶片「鬚媽」派錢，低奴唔收，視為不敬，再一次讓我嘅「嬰國」免稅ISA，再創新高，四個月回報有29%，達5816鎊，差不多六皮，「歪芺」也突破五皮，兩個戶口加埋賺十一皮。不過我哋由開眼已經恰實個市，直至睡前一刻，十幾小時，就是最笨嘅猛獸也可捕捉獵物嘅機會。

不過許多人要返工，加上時差問題，根本冇可能咁樣投資尾股，我建議佢哋投資「彪浦500指數」ETF，巿面有很多款，只需考慮以下幾隻：

移嬰講人嘅ISA戶口係唔可以投資「尾國」ETF，可以投資「愛已難」註冊，在「輪噸」交易所買賣嘅ETF，雖然管理費貴三倍達0.09%（對比0.03%嘅VOO及IVV)，但別忘記尾國ETF要收30%股息稅，而愛已難只收15%，多了0.06%管理費難道也比不上多了15%股息麼？再者有的只需0.07%管理費，只多0.04%，另外，嬰國非ISA戶口嘅投資要收股息稅，因此將所收股息再買入更多ETF嘅累積型，更適合我們這些非尾國人，唯一缺點係交易量少，買賣差價會大，不過正常人係唔會用這類ETF作投機，所以問題不大。買「爸運」也是長期投資嘅好選擇，只不過「爸非突」已年老，冇人可保證未來基金嘅回報率。

（自從多年戰友副主席「查你杧隔」逝世，「爸非突」佢自己都知大限將到。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（206）升喱（Level)

 雖然在大不列顛遊下遊下，毫無建樹，但細心反思，仍有進步嘅野。

駕駛方面，以前係興趣班水平，現在已是業餘車手，最大突破係由北面愛丁堡，殺入修咸頓，中間有停頓休息，但最長駕駛時間係連續四小時。有的漁村同鄉，已做了巴士司機，成為真正嘅職業車手。

投資方面，以前係興趣班賭徒，現在已是職業賭徒，好聽一點叫投資，叫我做交易員，或基金經理也是可以，真正靠投資來生活。

武術方面，仍然係興趣班水平，都一把年幾，都不能要求太多，但自從冇返酒店工作，身體已肥了，因那時168斷食+返工，如果涯到一年，真係變完全體。現時主力投資，唔使太用體力，即使168，體重也慢慢增，要惡補了。拳練拳擊：直拳、左右勾拳、上擊拳。腳練跆拳：直踢、側踢、旋踢，再加詠春散手。

音樂方面，興趣班也談不上，移英兩年冇掂到結他，就是以前都不過彈和弦，以作詩歌敬拜之用。最近在高奴「豬黑白隔」嘅巿場，「歪芺」找到15鎊嘅結他，我立刻駕車去取。

雖是渣嘢，但對低奴而言，已足夠了。

靈性方面，已恒久參加教會聚會，一年讀聖經差不多完成，老田Oldfield牧師都要奬勵成功者，甚麼聖經班也參加過，但家人真係迫不了，有時返、有時唔返。

總嘅而言，駕車由興趣級升至業餘車手，投資由興趣級升至職業級，也是大進步。

IB投資系列：全防守姿勢

 我知道有人趁「突郎浦」上台前入了「彼突幣」、「九久幣」，期望大賺一筆，要賺錢嘅人，其實已賺了錢，仲有冇水位呢？主要視乎當時股票甚麼光景，股票升則虛擬幣升，股票跌則虛擬幣跌，咁即係賭大細。

首先尾帝從來冇話要你發達，表面嗰套，也是尾帝優先，尾國人富起來！實際尾帝不過是背後「高奴」扶植，為「樺耳佳」工作。現時尾帝冇錢，當然首要解決冇錢嘅問題，尾帝從來都是入不敷支，靠借貸度日，要有人借錢俾尾帝花費，就要確保尾債有人買、交易量高、受歡迎嘅投資。

股票大熱，邊個會買美債賺嗰少少息？唯有叫「尾攣處」放啲風聲，震一震個倉，啲人知道危險，資金就會流向尾債，當然尾帝也可以全球攪風攪雨，世界越唔安全，尾帝就最安全，因冇人敢打尾帝，資金就會流向尾帝，最好嘅資金泊岸，當然又係買尾債。

要記住，「尾攣處」嘅目標要確保尾債有人買，加息、減息不過是手段，通脹、失業不過是藉口，要加息就話通脹升溫，要減息就話失業上升。數據嘅嘢你明㗎啦，唔好咁天真以為世上有一個政府，真係會為國為民，不住留心Mon住通脹及失業數據，作出調控，令人民生活更好。

當我們這些低奴都聽到：「突郎浦」上任，股票升升！虛擬幣升升升！咁就要小心！你永遠唔知班高奴幾時散貨？散幾多貨？分批散？還是一次散？到價散？我哋低奴無法拿捏，因此高追也好，沽空也好，也構成極大風險。

既然我哋唔知對手點出招，你只能採取泰拳全防禦狀態，敵人一攻擊，就立刻提膝、抬起拳套，無論敵人打高、中、低，都一定防到，不住游走，唔好正面交鋒，睇定啲形勢，再作定奪，可以間唔中出一下刺拳，立刻返回警戒姿態。

（羅唐中門大開，放低雙手，叫你打佢，你就以為有著數？做人唔好咁天真，當人人都以為發達嘅時候，就是高奴散貨嘅最佳時間，死咗都唔知乜嘢事？）

（好多人諗住發達，但其實投資最重要係令自己唔好輸錢，賺少少茶錢便算，「扒鈴啲啊」（PLTR) 升破頂或跌破頂都唔關我事，只不過這一刻冇人聽得入耳。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：有早知冇乞兒

 有人說二十年前用1000美元投資輝達，今日已變成94.4萬美元了。如果要懊悔，應該是90年代，日本世嘉遊戲機，在輝達危機時，出手幫助黃仁勳，但危機過後已速速變賣輝達股票了。

講呢啲說話冇意思，因為這個世界冇如果，你唔諗吓如果你投資咗柯達、諾基亞、雅虎…今日晚景如何淒涼！

所以唔好再講你當初冇買比特幣，或者賺少少一早賣晒，冇意思㗎！你唔諗吓NFT價值歸零、元宇宙買地…

冇人會知將來會變成點，AI發展成點？量子晶片幾時量產？這個世界發展得太快，唔好以為有嘢會破解唔到，只是時間問題，我知道有人開始儲虛擬幣，只不過佢認為這個虛擬夢仍可以玩多好幾年，但邊個可以知仲可以玩幾多年呢？

我唔好講我哋呢啲無知嘅低奴，誠哥二公子當初持有20%騰訊，即使佢攪甚麼保險，做甚麼生意，也比不上騰訊嘅價值。

所以如果將來你揸法拉利、戴江詩丹頓，笑我揸豐田、戴Casio，話我唔識投資、冇眼光，我係要佩服你嘅勇氣，冒著極大嘅風險去獲得這些財富，我仔細老婆亂，自問冇這些本事賺這些錢。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

16大罪狀

 最近在「馬屍黑」嘅社交媒體看到震驚嘅貼文，內容如下：

由於指控相當嚴重，不便評論，請讀者自行判斷。

（要知道評論嘅可靠性，要知道作者是甚麼人。）

IB投資系列：尾攣處送聖誕禮物？

 巿場預期減息，巿場亢奮，股巿高企，然而「尾攣處」突然減息預期減少，於是美股急跌，資產價格急跌。

利率調整，反映通脹仍然頑固，未來「突郎浦」加關稅，一定導致入口性通脹，減息始乎難以維持。

雖然未至於加息，但減息步伐減少，將之前減息嘅樂觀、亢奮完全消除，效果形同加息，於是股票跌、虛擬幣跌，唔好以為虛擬貨幣可以避險，個巿一跌，立刻要變賣資產補倉，首當其衝是變賣虛擬貨幣，所以一定跟個巿一齊跌。

早前早以去槓桿化、增持現金，即使跌巿，都不過數字上冇咁開心，未至於影響生活，車照駕，飯照食，如果你眼利，仲可能執到平貨。

正常打法係打1、2，Jab + Cross，先用刺拳，再用後直拳，刺拳係快拳，後直拳係重拳。現在嘅場境，只打刺拳，打完就走，唔俾人埋身，刺拳中與唔中都照走，不能貪打。

投資場境也是一樣，唔好貪心，賺點數就算，唔好睇少一點半點，淹到淹死佢，拖到完場，你仍站在擂台，你就係贏家。

（英國ISA免稅戶口已賺5018鎊，即係五皮，我同「歪芺」這對「爛賭夫婦」合共差不多十皮，比她快一步到達五皮大關，攞番啲面子，四個月25%回報，兩萬鎊本錢賺了五千鎊，本來一年目標係100%回報，但投資環境嚴峻，減至50%，真係要小心！）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。