愛丁堡詠春：穿崩

 呢個世界咁多世外高人咩，神棍就大把⋯

要分辨詠春好壞，唔係睇佢上邊「霹靂啪啦」黐手，而係睇佢嘅馬，就可知道。

擘晒馬，都唔使睇啦，嘥氣喇！

電視台影住，會唔會正經啲，似樣啲呢？

答案係一樣咁發瘟！呢個「大師傅」擘馬已經係例飛，膀手又束橋，唔夠角度，護手又失蹤，垂低隻手唔知做乜？當年，本門師傅教搏擊，師兄手攰垂低拳套，立刻俾師傅「吊」到風冚，搏擊其間無可能垂低隻手。

「大師傅」佢嘅徒弟「白衣人」，都係廿廿污，側身馬係一實一虛，但虛嘅腳要貼實地面，隨時要變返實腳，冇可能腳面離地，我只能說個馬虛，唔夠實。擸手要擸手腕位，唔係前臂中段，你自己都棘住自己啦！跟住殺頸手或者可用日字衝拳，有少少「㬹底力」都一定中，因為對方嘅膀手係廢，又冇護手。「白衣人」你自己都係所謂「師傅」，檢討下喇！功夫唔夠就出嚟搵食，欺騙觀眾，全世界都睇住所謂「名門正宗」，全部都甩手甩腳，好羞家！

甚麼叫「力由地起」？你個馬搞成咁，點樣力由地起啊？你起樓都唔打樁，你起到幾靚又點呢？詠春也是一樣，黐手「霹靂啪啦」係好威！咁又點呢？

真正打得嘅人，條腿係好粗，個馬係好堅，當然我哋不過凡人，唔應該跟拳王比較，但我唔怕講自己隱私給大家知道，我嘅大腿，兩隻手都揸唔晒，我沒有穿過合身嘅牛仔褲，因為大腿粗，一定要買腰圍大好多，褲管才能穿入⋯。

各位詠春師傅，我唔會同你哋爭飯食，放心！我100%炒股搵食，仲遠在十萬八千里。既然做得所謂「師傅」，靠教授這門技術搵食，都要做得專業啲、正確啲，至少都應有些功架，至少唔好俾我睇到咁多穿崩，個馬唔得嘅，咪做下深蹲、臀橋，每次15下至20下，每日做三組，我無老點，你一定有好處，至少老咗都行到路，生活質素一定提升，鍾意去邊就去邊，唔使喺老人院等死。唯一缺點，永遠穿唔到靚仔牛仔褲。

（你肯練深蹲，一定有得救。）

（練埋臀橋，你嘅二字箝羊已經完全兩回事。）

愛丁堡詠春：絕對武力？

 詠春真係咁難？是的。

但是，係咪連扎個二字箝羊馬都咁困難？絕對唔係。

咁點解各「大師傅」都做唔到？二字箝羊馬，基礎嘢嚟嘅喎，唔係甚麼高深拳術，只有一個可能性，佢哋覺得自己武功超凡，就算唔做足，你都奈我如何，就算「擘馬」，你都撞唔散我，就算一手垂低，你都攻唔入我，就算甩手甩腳，你都贏唔到我，就算抽煙，攪到個肺黑晒，肺功能得一半，佢自信兩三招就必KO對手，唔似擂台嗰啲拳手咁渣，打足咁多個回合，嘥時間！

我唔係講笑，如果喺絕對武力之下，係唔需要做足。好似我對個仔對練Judo，可以輕鬆制服，又或者職業拳手對普通人也是一樣。

呢啲詠春大師可以咁多甩漏，背後所反映嘅絕對武力，並非我哋凡人可以理解，如果手法一旦做足，黐黐下手，錯手殺了人，邊個可以賠返條命俾人呢？又或者斷手、斷腳，終身殘廢，又於心何忍？

師傅以前面對挑戰者，會雙手下垂，引對方出手，因為如果做足前問後護樁頭，恐對方無法出招，浪費時間。以今日所見，功力要再高兩班嘅世外高人，才可這樣，能夠跟世外高人學習，真係三生有幸！夫復何求？

（太極張三豐。）

IB投資系列：心理戰

 某基金佬「咪膏啤梨」是大淡友，不得不防。

佢預言是否真，唔重要，公佈出嚟，最緊要有人跟，即或不信，俾佢拋一拋，也有所避忌，令預言成真嘅機率大大增加。

呢啲係心理戰，880尾元嘅「尾肛科妓」MU，好像有條隱形線，令投資者卻步。

 

盡其量賣800元put便算，幾蚊都好喇，太遠又冇肉食，太近又危險。賣了14張期權，收2621尾元期權金，約20443講元，有兩皮，都好吧！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

愛丁堡詠春：風骨

 任何人都係演員，只不過你演得好唔好，你演得好，人哋信你，你就成功，係咪真都唔重要。

跟過「蝗公」，唔識打都識吹，加多減少，符合現代人口味，都市人習慣，加上宣傳，巿場策略，點都有人落疊。至於功夫如何？你哋自己判斷。

如果按照詠春標準，二字箝羊馬，馬開步半，闊度唔得，腳尖距離要窄過腳㬹，膝部要微微收窄。呢個「師傅」樣樣都做唔到，這個馬，行內稱為「擘馬」，係無料詠春必定具備嘅特徵。

正常功夫埋牙，一定坐好個馬，至少馬步加闊，增強穩定性，呢個「師傅」有番咁上下高度，用一般站姿，點都講唔通，再者該「師傅」以「純」自居，唔似我呢啲「雜種」，既係純種、純正，咁唔該站好個馬先啦！

我都知做生意的第一性原理係巿場需求，並非個人喜好，巿場喜歡乜嘢，你就俾乜嘢，咁咪發囉！消費者嘅底層邏輯從來都唔係要好辛苦去得到真功夫，而係好容易去顯示耀眼嘅技術，所以純粹「霹靂啪啦」黐手才有真正巿場價值，才真正搵到食。

力由地起，就應該由個馬開始練起，跟住係核心肌群，然後再傳到手臂⋯，好像廚師由預備食材開始，一步步去做⋯咁樣當然搵唔到錢，人人都用預制菜，慳錢、慳時間，仲即炒粉麵飯，揸兜乞食啦！

我係100%炒股票搵食，呢啲道理我點會唔知呀！但係如果連少少嘅堅持都唔守住，作為武術家應有嘅風骨也不存在。

但現實係，風骨唔可以當飯食。

IB投資系列：虛火？

 非農數據唔靚，加息機率大減，其實客觀條件沒有變好，只不過唔加息已經算係好，因此尾股上升。

有啲嘢好荒謬，但股票升好過跌，無謂追究咁多。

有的股票好像不錯，但有的公司七成營收都係自己投資嘅公司買返自己嘅服務，即係左手交右手。這情況在科網崩塌前，屢見不鮮，AI熱潮也不例外，需要小心！

作為科技巨頭，竟要買「過氣」燃氣機組發電，可謂「士急馬行田」，最近尾衣戰爭，中東嘅AI數據中心被炸，正好反映電力成為尾帝AI嘅短板。

當燒錢速度快過賺錢速度，股價就難維持。

有雄心壯志係好，但晶片係幾十年經驗累積而來，「嬰突耳」買了最新光刻機，也提升不了良率，Terafab加埋呢個失意的男人，幫到幾多呢？

晶片做出，卻無足夠記憶體，迫使「富黑」找「天朝」求助，即係話現時短板在記憶體，都要留意「尾肛科妓」及「SK凱歷事」。

人人都說做晶片，但人人都做到嗎？

晶片一哥始終是「抬漬殿」，唔好信其他公司。

星期五只賣兩張期權，收幾千講紙，可以睇定啲，星期一再賣，因為如果係虛火，下星期打回原型，put options 好易接貨。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（410）一擊必殺

 要知道現在發生緊乜嘢事⋯

全面鎖國。

AI全球25年追稅。

這個組合拳好犀利！詠春企埋一邊。

連「洲傑輪」第一張專輯嘅帳都算，即係所有賺過錢嘅「天朝人」，永遠走唔甩。

「天朝」AI雖然並非最強，但肯定係最強老二，真係可以連根拔起，HK某保險公司專做「天朝人」尾元保單，股價隨即下跌，反映事態嚴重。

（愛國人士應幫襯「天朝人壽」，不應幫襯「嬰」、「尾」等邪惡勢力嘅公司。）

大量「天朝」富豪，加速走資，迅速離境。「漁村」以前唯一嘅活口都不存在。小心「蘇州過後冇艇搭」，「漁村」唯一賺是「天朝人」對「天朝」不信任所產生嘅溢價，咁攪發，「白手套」無得做，「漁村」都好快玩完。

（「成膿」都話我們「天朝人」需要管的。）

（沒有人買「漁村」樓，樓價會怎樣？）

（富豪紛紛走人。）

IB投資系列：利令智昏

 最近不住聽到投資騙局…

我鄭重警告各位，任何人都不可輕易相信，包括我本人，也不是好人，YouTuber 、網紅⋯都唔係好人，呢個世界唔會有好人，人渣就大把！唔識投資就去銀行做定期或買政府債劵、年金就算，做人要醒目啲，股神一年都係賺20%，多過此數十居其九都係騙局。

就算我自己，期權都係有賺有蝕，正股蝕到仆街，直至現時為止，期權賺一球，正股蝕兩球，總數都係蝕，要計成盤數。

（這個某AI核電股OKLO遠期期權，140元put，收5363尾元，賣了十張，即53630尾元，賺418314講元，但好景不長，該股票跌至42元左右，要贖回要76萬7900講元，反蝕三十幾萬，所以我而家賺嘅錢都係填氹。賺錢唔係咁容易㗎！只怪自己孤注一擲，一隻股賣十張，太貪心了。）

好像「士卑益匙」，唔可以只看「昇鏈」賺錢，要計成盤數，總數都係蝕，係賣未來嘅前景，唔係呢一刻。

做App所謂任務就賺錢？要請HK人去寶島工作？骨妹借錢都好信嘅！「歡場無真愛」，普通人都識㗎啦，咁無稽嘅嘢都有人信，只能說利令智昏。

講真，要炒股搵食，我除了瞓覺，都要睇實個巿，盤前、盤後、隔夜、正巿，無一例外，財報都係盤後公佈，如果你有持股，唔識英文都要開著睇，對比股價升跌，再問下AI，大概都知好消息定壞消息，有啲人，成日諗住攞貼士，冇前途㗎，YouTuber 都係自己買咗，先叫你買，自己沽咗，先叫你沽，賺唔賺到錢，你死你嘅事，唔好講咁低level嘅YouTuber ，女股神「木頭姐」好未，管理成個「荒洲基金」，都係賺你手續費吧，好像少年股神，賺咁多錢，最後都輸一鋪勁，佢都係賺手續費吧！賺唔賺錢，邊有包生仔㗎！

要追求自己位分嘅事，高儲蓄、低消費、持有優質股票或資產，用時間為你賺錢，股神「爸飛突」咁叻，99%財富都係65歲後賺到，如果只求短時間暴富，很快就會被人騙晒！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。