愛丁堡詠春：練功要付代價

 金庸武俠小說有言：

「欲練神功，必先自宮」講嘅就係要付上非比尋常嘅代價，再留意下一句，「雖然自宮，未必成功」，就講出結果嘅悲歌。

拳王泰臣講得很好，「紀律就是把你所厭惡的事當成你所熱愛的那樣去做」，人人都可熱愛打拳，但克苦嘅訓練卻非人人可以做到或忍受，即使練成，也要睇時機、際遇，容許我咁講，霍斯格雷斯單憑巴柔可以取得多屆終極格鬥冠軍，某程度係當時嘅格鬥家高傲、輕視及無知，今日嘅格鬥家要同時具備攻擊技及摔鎖技，才有機會。

好喇！我講講學詠春嘅代價，要學到好嘅詠春，唔係嗰啲「飛㬹手」，埋㬹功夫一定夠，小念頭嘅「一攤三伏」要做到「絕對埋㬹」，手指嘅中指、手㬹、心臟連成一線，每一下手要合理埋㬹，唔係實用詠春拳下下埋到盡，拳埋到盡就不盡㬹，力不能盡也，斜45度拳已用了轉動，枕手就廢了，練功同做人一樣，去到太盡，就冇彎轉餘地。經年累月嘅訓練，肌肉有記憶，肩胛骨會向內，形成少少寒背，我未至老到不能咬返正，但一旦無意識或放鬆，就會打回原型，長此下去，不會是好事，老咗可能影響呼吸、姿勢等問題。

我要用啲法寶，將肩胛骨拉返正，將雙臂拉番後，可幫助正確姿勢，不過戴了這個約束衣，日字衝拳也打不到，殺頸手、標指手一概出唔到，因為埋唔到㬹，變成了我日鬧夜鬧嘅飛㬹詠春，所以練功唔係咁簡單嘅事，肩膀闊又要埋到㬹，練到咁上下，就會出問題，緊要拉番鬆，肩膊向前要拉番後，確保健康。