愛丁堡詠春：不要將黐手當真打！

 大家都知甚麼是叢林法則，就是格食格、大食小。這法則放諸人類也是一樣，職業拳手剋業餘拳手、業餘拳手剋興趣班拳手、男剋女，這是不能改變嘅定律。

（男打女，怎可能輸？）

詠春確是幫你如虎添翼，但首要條件你要成為老虎，倘若你只是一隻狗、鼠，俾對翼俾你，對你幫助不大。標指王「涼廂」，身型已經贏晒，再加龍型魔橋嘅拳術，就算唔學詠春，打贏佢嘅人也不多，講手王「蝗崇涼」，身型雖然不算高大，但靠著佢嘅拳擊功夫，加上實戰經驗豐富，打交多過食飯，就算唔學詠春，十次都打贏八九次。

好簡單嘅道理，你學得詠春，如果單單純黐手嘅遊戲，一定可以贏拳王播求，但實戰寫包單100%會輸，1%贏嘅機會都無，因為實戰唔係睇你黐手技術高低。

我唔係話黐手呃人，詠春呃人，有了觸感訓練及反應確實係如虎添翼，比單單用眼去判斷優勝，好似我架豐田Yaris，前後有sensor及警示，一定安全啲，但真正掂唔掂？安唔安全？都係靠你嘅駕駛技術及態度去決定。

同樣道理，橋手具備觸感反應，在某些格鬥場景是有優勢，例如近身纏鬥，即使有反應亦趕不上，如果橋手經過黐手訓練，千鈞一髮之間，自己去作出攻防動作，往往會保命，或甚可以反敗為勝。

但首要條件係，要具備與敵人有匹敵嘅搏擊條件，你嘅拳、你嘅腳、你嘅體能、你嘅肌力、你嘅抗打、你嘅技術、你嘅戰意…能夠跟敵人匹敵，那麼你多出嘅觸感反應就是你贏嘅條件了。反之，如果你單有黐手技術，沒有上述嘅條件，唔好妄想會贏了！

如果教你嘅師傅，佢係真正嘅師傅，無可能唔知，我告訴你，所謂嘅「師傅」，九成九都係戲子，沒有例外，只是裝睡嘅人，永遠叫不醒！我在yahoo寫了10年，在google寫了踏入13年了，要醒嘅已經醒了，以前學緊詠春嘅人，今日好多人也醒覺廢棄了，我樂於分享詠春嘅樂趣，但重申，千萬不要將黐手當真打。

（好多人靠詠春搵食，甚至係一生嘅榮耀，阻人搵食，尤如殺人父母，唔敵擋你才奇。「百萬教頭」，但一個拳王都出唔到，究竟教了甚麼？你自己想下喇！）

（有的師傅更有吸煙、酗酒、生活唔檢點等惡習，佢自己身體機能都唔好，何來有心有力教你真功夫？你嘅師傅有冇提靶給你餵招？有冇提靶攪到手痛要捽活絡油？今日仲學功夫嘥時間啦！倒不如睇下股票，贏嘅機率仲大！）