IB投資系列：上得山多終遇虎

 網上高手很多，天外有天，人外有人…

如果某YouTuber 被動收入也有27695講元，咁都可以說財務自由，我自問被動收入冇咁穩定，時多時少，因為收息產品有的每月派息，有的每季派，有的一年兩次，有的一年一次，因此單靠被動收入仍是不可靠，要靠主動收入，日日十幾個鐘扱實個市。

主動收入，要不住操盤，其中是賣期權合約，每星期收1000至5000左右講元，一個月約有四千至兩萬，再加上炒炒賣賣，點都夠搵食嘅！

正所謂：「久病床前無孝子，久貧家中無賢妻」，我哋固然要讓自己保持健康，也不能讓自己過份貧窮。

今日賣多3張「末日期權」（即日到期），本星期合共七張，收1228尾元期權金，約9578講元，人窮自然搏一點，未知結果如何？最後「上得山多終遇虎」，某虛幣股375put中招，收巿報369.51，要375價錢買369.51嘅貨，蝕5.49，549尾元，帳面蝕4282.2講元，抵消期權金，賺5295.8講元左右。

做生意有賺有蝕，炒股也是一樣，最緊要圍唔圍到皮，圍到皮，攪得掂，咪繼續，攪唔掂，咪死死地氣去搵工。當被動收入夠生活，達至財務自由，意味資產達至一定水平，低風險收息嘅部分夠大，你唔做任何野都夠生活，就可自由自在，不過這種生活，自己仍未達到。

（我都曾經想過寫文章賺錢，或是YouTube賺錢，拍下詠春片，不過人做得一樣，就做唔到第二樣，就好像使徒要專心傳道，就不能分心去管理飯食，我哋呢啲低奴，能力有限，唔似「馬屍黑」可管理幾間超級公司，仲幫埋政府做野。再者，為這些雞碎錢，「嬰國」報稅係極之麻煩，功夫實在不值得。我既係以投資搵食，就唔使搞咁多花臣嘢，又賣VPN廣告、又推薦人開戶、又「卑創」課金、又開課程教投資、又求人入會、俾like、留言，讓演算法增加流量…炒股要靠呢啲嘢嘅咩？寫網誌，純粹無聊吹水，你鍾意睇就睇，唔鍾意睇就唔睇。活到我這個年幾，唔係應該瀟灑啲咩？）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。