移英日記（328）生活掹掹緊

 我知道許多移嬰講人，生活都「掹掹緊」，更莫說永居、入藉嘅費用。

許多人以前係「中奴」，黎到「嬰國」，個個降格做「低奴」，要知道風光不再，生活使費樣樣都要降格，尤其出街食飯比「鄉講」貴許多，一定要盡用這裡優質嘅食材及大廚房，好好發揮，有啖好食，日子就容易過。

我哋懂得理財、投資，只不過我哋係低奴，試過冇錢，所以即使搵到，都唔敢鬆毛鬆翼，要讓自己有充足抗跌能力，好像有政客說要改BNO 5+1變10+1，對我哋有什麼關係呢？日子係咪都係咁過，不如諗吓你搵唔搵到錢好過啦？

我哋有今時今日，也有貴人相助，想當年，某老弟兄知道我們兩袖清風，話幫我哋投資，俾兩皮佢，「賺就你、蝕就佢」，年年賺一皮，50%回報，做過投資都明，短時間有高回報係可行的，但年年50%回報，根本係送埋錢俾你，幫都幫到盡，要自力更新了。

容許我咁講，許多人仍未醒，要過番以前咁風光嘅生活，咁係冇可能！低奴就係低奴，唔理你以前身份怎樣、職位怎樣、賺幾多錢、有工人…你這裡賺最低工資就係低奴，唔好以為自己係邊個？

飯，你一定要煮硬，家務，你一定要做硬，夫婦互相分工，採購、煮食、洗碗、清潔等等，唔想洗碗，就用洗碗碟機，唔用得幾多電，嬰國人自己都懶惰，許多食物都有簡易操作套裝，調晒味，放入焗爐即可，食多幾次，你都頂唔住要進化，加入鄉講口味調味，再進化，自己由原材料調味，參考埋「涼只零」，善用嬰國食材複製鄉講美食…。

錢，要按住自己能力使用，車可以唔買，租用那些步行15分鐘至巴士站或超巿嘅Flat，或者買架二手單車、滑板車也可以，有錢一點買電力輔助，一樣很方便，在愛丁堡，巴士可買月票，巴士、輕鐵任撘，尤其巿區，好過揸車。識投資就炒美股，唔識就定投標普500指數基金，再唔識就去銀行做定期，將收入兩至三成投資，何愁大事不成？

(新單車都係180鎊，有時減價，有的款式145鎊，已足可代步。買車又要錢，路稅、燕梳、MOT、油錢、維修、保養又要錢，等經濟上了軌道才擁有都未遲。）