IB投資系列：許多人仍未醒

 漁村炒樓炒鋪確曾令許多人致富，不過靠炒樓嘅，都死得七七八八了…

有的人已經負資產，只不過租金仍靠穩，夠俾「魔技」，但這些日子唔會好耐，仍然咁大花筒，一餐飯由二、三千元，減至八百至一千元，就好似臨死前嘅年羹堯，唔知個死字點寫。

我住大不列顛，點解「淪噸」樓咁貴？咁值錢？因為核心區域唔會再發展，保育建築，地方法規限制發展，zone 1、zone 2樓全部有錢佬買，好誇張！反觀「鄉講」特色不再，點樣仲可值咁多錢？炒股都知，冇了護城河及專利，股價想升都難！

做人要勝不驕、敗不餒，炒股投資也是一樣，「花無百日紅，人無百日好」，NBA退役球星點解破產？因為佢哋唔明白球員嘅生命係好短暫，但佢哋使錢仲好像以前倒水咁倒，破產只是遲早問題。

點解「成哥」咁大年幾仲可以睇演唱會？點解「懂見嘩」細過「成哥」咁多，幾年都冇蒲頭？因為「成哥」多年前已經清茶淡飯、勤做運動，零件自然襟用。

健康係咁，投資也是一樣，「好天斬定落雨柴」，賺錢唔用盡，蝕錢就可守得住。以我咁嘅質地，年年換手機，有隻見到世面嘅名錶，也不過分，如果我要做生意，行頭太寒酸，人哋都唔會信你。然而炒股票根本不必見人，沒有必要浪費金錢，如果你部手機舊過我嗰部「埃瘋11」，有資格講財務自由，使錢原則係應使得使，按著自己財務程度，過一個合標準及可持續性嘅生活。

炒股，預咗係三更貧、五更富，早前一日蝕幾皮，今日隔夜及盤前已賺幾皮，我不會因蝕錢就冇飯食，也不會賺到錢就亂咁嚟，我仍是戴幾舊水嘅Casio，食49便士（4.9講元）面包，期權金賺一千幾百或幾千講元，咪拿五舊水飲下茶，永遠都留有餘地，槓桿也不槓盡，永遠都有位走，唔死得！

（今日賣了3張看漲期權，hold住300股唔俾賣，賺五千幾講元，純粹個人分享，並非投資建議，生死各安天命！）

（投資要知風險，有些人唔係普通賭徒，而係超級賭徒，靈魂都賭上了。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。