IB投資系列：跟高奴搵食

 我哋呢啲低奴，又冇財、又冇勢，要搵到食，唯有依附一些大勢力，正所謂：「良禽擇木而棲，賢臣擇主而仕」，古代亂世要依附一些有能力、魅力嘅群雄，只要佢哋成功，自己也會成功，封侯拜相、富貴榮華指日可待！

今時今日，低奴都係跟高奴搵食，除了幫佢哋打工，投資也要跟佢哋風向。

當漁村最風光嘅時候，邊個聽得明誠哥：「山雨欲來風滿樓」，即使明也不願放棄賺錢嘅機會，最後結果點，大家都知。

股神巴菲特以地緣政治風險為由，勁沽台積電，我都心驚驚，立即跟，不過台海冇事，台積電一飛沖天，都唔關我事，見財化水，因我冇貨。股神都係人，都有估錯嘅時候，都唔可以怪佢。

最近股神入股「刀紋奴」（DPZ) ，股票抽升7.8%至470美元，我在回調至430美元時買入，現在都夠買一個刀紋奴Pizza。

我由起床開眼開始就睇住個股價，接送個仔返學放學又睇，超巿購物又睇，用手機app學英文又睇，食飯又睇，洗碗又睇（如圖）…直至睡前關機。

你學詠春功夫要下苦功，投資也是一樣，古人「書不離手」，我就「機不離手」，大錢就賺唔到，但搵兩餐晏仔仲可以嘅，明日book了酒樓飲茶，英國飲茶唔平，如果唔賺點茶錢點去呢？

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。