正所謂：「力不到，不為財」，千里以外買樓投資，風險奇高，每一步都要靠人，買樓、裝修、收租，每一個程序都要收費，倘若管理公司說甚麼壞，要幾百鎊維修，就算明知呃你，你都要俾錢。又或者每一個程序做得唔順，搵樓又慢、買樓又慢、裝修又慢、租樓又慢、追租又慢，趕走租霸又慢…一樣俾佢玩死！
所以要成功投資，一係要有人脈、團隊，一係要人在當地，要睇樓，即時自己睇，有甚麼問題，即時親自解決，每個程序做得順，勉強都有機會賺錢，好似「突屍拉」工廠產能未達預期，馬屍黑都要親到工廠睡幾晚，親自監督，才能解決問題。
BNO講人的優勢，就係人已到，樓是親自過目才買，裝修是親自驗收，有維修，你也確認真假才俾錢維修，放唔到租，或次次有租霸，你都可以了解實情，作出應變，例如，可將單位，執一執，變成特色單位，租俾Airbnb，又或者收番自住，留意buy to let魔技條款是出租，改變用途要通知，否則可能被告及收回單位。
雖然有人說：「有圖有真相」，但如果人不在當地，你怎能知圖片及影片都是真呢？再者即使是真，會不會有缺陷故意影不到？或者有煙味、血腥味、霉味、尿餲味、大麻味，相片、影片是不知道的，如果中伏了，你怪得誰呢？天朝有爛尾樓，大不列顛一樣有。天朝樓名不符實，大不列顛一樣可以這樣，「天下烏鴉一樣黑」。
有冇生意機遇係講供求，人口減少的城巿或國家，樓房就不要想了。大不列顛人口增加，但由於下攔工種多是東歐人擔任，脫歐後東歐人走晒，建屋速度追不上人口增長，樓價自然上升，有劏房就是求過於供的實証，然而通脹嚴重，加息又殺到，對樓價難自然有一定衝擊，投資者需衡量利弊，做足功課，方可作出投資決定。
（文章只屬個人分享，沒有任何投資建議。）
沒有留言:
張貼留言