詠春就係咁麻煩，識又未必教到你，唔識更加教唔到你，點解一門功夫咁不濟？因為創拳嘅人唔係由零開始，已經有相當基礎及功力，因此留傳下來嘅教材，沒有基礎訓練，佢叫你放鬆啲，就假設你拳太猛太勁，無法做到細膩動作，但今日玩得詠春，都係文職人士為主，好坦白講，我當年做了地盤工作，也無力返武館了。
因此整套拳沒有基礎功力訓練，小念頭已經當你練咗個馬，因此好多詠春友個馬根本唔得，輕則變了「實用詠春拳」嘅平衡馬，但沒有坐馬屈膝135度，重則變了擘馬，配合埋身體後傾，形成經典嘅搏擊自殺組合。
有些傑出嘅詠春門人，大部分都係帶技投師，「標指王」已學龍型魔橋，「念頭王」已學太極，「講手王」已學拳擊及經常街頭搏擊等，已經有充足基礎，學了詠春，自然得心應手，如虎添翼。倘若得張白紙，俾你加對翼，也不過貓犬添翼，對搏擊實力增加有限。
詠春門人啲馬唔得，跟下盤功夫唔得有密切關，沒有經過傳統功夫或空手道嘅扎馬訓練，始終都差少少。佢哋修正嘅時機，要等到學六點半棍要用棍馬，才練到少少，馬已經擘慣晒，改不了，師傅又求求其其，自己都其心不正，都係擘晒馬，怎要求徒弟呢？乜嘢叫力由地起啊？咁唔係騙子係乜嘢啊？
有心去學好詠春，或者任何功夫，先要執好個馬，最有效率嘅方法唔係練傳統嘅四平大字馬，而係以下我所推介嘅動態方法：
第一：深蹲
如果你年輕，我建議負重深蹲（去健身室），好像我以前學空手道咁，扎了四股立，後面要站立一人在你馬上，咁先為之合格，當你個馬能負荷一個人以上，搏擊有了基礎，就好像打了地基，起樓就冇問題啦！
第二：臀橋
上面嗰個訓練，女仔可能怕腿粗，這個訓練，男女均可，女仔線條靚，男仔表現好，臀部肌肉訓練跟深蹲互相協同，整套下盤功夫就完成了。
學功夫要有功法先得，教唔到呢啲嘅，跟佢學都係浪費時間！下盤唔得，仲想有乜嘢好結果呢？
沒有留言:
張貼留言