我細個嘅時候已經聽到許多人因「倒錢」出現問題，由於小朋友唔理解同音異字，將「賭」視為「倒」，腦中立刻有個影像，有人將一桶桶錢倒入大海，點解有人會咁愚蠢？
長大後當然明白兩字之別，但「賭」跟「倒」分別也不大，因為賭博係高風險、低機率嘅操作，跟買賣細價股、妖股差不多，所以高風險投資都是賭博，也是「倒錢」。
投資都要睇時機，牛巿升多跌少，當然要踴躍參與，熊巿跌多升少，自然要忍下手，現時波濤洶湧，要靜其變，然後可以圖也！切忌輕舉妄動，招致損失！
最近我都有睇投資嘅YouTube ，又要sell這樣，又要sell那樣，由開証劵戶口、VPN、課程、入會課金，再教埋點做YouTube ，如果真係咁掂，要攪咁多花臣野，流量成為主要或相當比例嘅賺錢工具，才會這樣。我細個成日聽老豆講，寫馬經嘅人，如果真係掂，將一萬幾千賭上，已經掂晒，何必賺這些雞碎稿費？電視台又見到「四萬點審大師」，退咗休仲唔搵窿捐，四萬點都未到，竟敢重出江湖，妖言惑眾，真係厚顏無恥！正所謂：「衣食足而知榮辱」，睇嚟條友都唔係好掂！
（信你嗰個最戇居！2024講到宜家，「尾股」都未大冧，「痕指」也未上四萬。）
我今鋪旅居「鄉講」，接觸很多人及事，好多都係表面風光，有一對夫婦以前曾跟我們一起去旅行，今日驚見他們已經爛晒，面書展示仔女大學畢業照，原來只不過表面風光，細細個迫仔女讀書，沒有好好營運個家庭，夫婦關係明存實亡，與仔女關係惡劣，仔女精神也出現問題，想盡快了斷自己，究竟為了甚麼？我哋盡一生努力就係換來這結果嗎？
投資一個家庭、一段關係，也是十分重要。我跟個仔一齊游水、一齊踏單車、一齊返酒店沖涼、一齊打機，佢肯定唔係十優狀元，肯定入不了牛津、劍橋，咁又如何呢？人嘅價值真係要靠這些証明麼？「迫鹹」封爵就真係值得鬆毛鬆翼！神只係睇到左手做善事右手全唔知嗰啲，俾一杯涼水給最細、最唔顯眼嘅弟兄，神才會獎賞。外表風光、裡面爛晒，任你怎封爵、拿督、太平紳士、甚麼慈善基構主席、總理…天國一概冇分。
沒有留言:
張貼留言