移英日記（134）每日祈禱爭戰

 稅又報了，車又買了，跟住真係要啟動下一部工作，就係準備Life in UK考試，死做16個模擬試題，只要做熟這試題，考試必無問題。

人唔係求生，而係求意義。這對很多人來說很奢侈，許多人仍活在困難中，日日望「正虎」派錢、減稅…

（「正虎」終於撤辣，但來得太遲，病入膏肓，回天乏術，大好友羅奇說：Hong Kong is over，除非停止干預，好似以前一樣。）

我現在每日都用雅比斯的禱告，求神賜福與我，好像很無禮，但神就係賜福的神，人得不到，因為不去求，求也得不到，因為妄求。甚麼是妄求？

妄求就是順著自己情欲、肉體，並非自己位份的祈求，便是妄求。

現時面對世界局勢，俄烏戰爭、以哈戰爭…可以做都只有祈禱。魔鬼撒旦要做野，也要先得神的許可，聖經約伯記講得很清楚。我地與其任由撒旦在神的寶座前控訴人類，好像檢控官控訴人類，我地何不用禱告去到神的寶座前駁斥，好像辯護律師陳詞，點解人類經常打敗，因為控訴多，但辯護少、爭戰少，結果自然會敗陣。

早在多年前，教會講道，已經辭不達意、含糊其辭，今日咁嘅環境，更加變啞，何來爭戰？更有宗教人士建議掛Country Flag，咁要不要掛埋今上的畫像？冇人要「講毒」，只係要公平、公義，講咗的說話要算數，係承諾、信用，點解未經審訊就囚禁三年？（仲係無罪假定麼？）點解可以無陪審員？點解唔可以自由聘請律師辯護？點解異見人士要長期囚禁「水飯房」？（真係咁重罪？罪都未定）

神俾人有自由意志，你唔出聲（祈禱），就喺度挨打，我天天為Jimmy Lai、Tonyee Chow祈禱，祈求佢地有健康的身體及精神，Jimmy年幾已大，有糖尿病及高血壓，亦祈求佢地有公平的審訊，在傳媒及各國領事監聽下，法官都唔敢亂咁嚟。

（以前生活的故地仲有甚麼路可行？真係唔知。）

娶妻求淑女，買車求實際

 大不列顛講人買車有好幾派，「崇歐派」覺得黎到歐洲，唔買歐洲車好蝕底。「崇修派」覺得車好耐用，只要整番又可繼續上路。「崇慳派」最緊要平，唔捨得在車上花錢。我應該屬於「崇日派」覺得日本車最好。

天朝有人說：「豐田開不壞，福斯修不好」，並非全無根據，正確意思是日本車很少壞，歐洲車經常有小毛病。只不過佢地係代表牌子。

講真，真正玩車的人，一係用轉子引擎的萬事得，一係用水平對臥引擎的掃把佬，兩樣都係麻煩野，當自己想要的時候得不到，到自己有能力買的時候卻不會買（英國更加冇），因為心態唔同咗，浪漫的野唔實際，實際的野唔浪漫，到了這個年紀，仲買「飛仔車」咩！

買豐田，對很多人是老土的事，但事實佢股價反升，不過我冇買，因為我未見過一個巨人倒下仍會有生機，柯達、諾基亞、英特爾，見到都怕怕。但今日我堅持力排眾議，唔買電車、唔買歐洲車，就是我們用錢去投票，支持這個品牌，做一些自己認為正確的事。

混能車其實跟電車差不多，很多時都係用電，尤其怠速時，電油引擎效率最低的時，就會界入，引擎空轉就用來發電儲存，因此達到省油效果，巿區尤其適合。

當然電量及摩打力量不可能跟真電車相提並論，而為求省油，用CVT無段變速波箱，更不能抱太大期望，佢加速係慢慢上，比不上我以前六速手波Civic，但省油卻是無敵，以前部「錢七」Civic係廿幾mpg，即每加侖油可行里數，Yaris係41.6至84.4mpg，平均約50mpg(不專業測試）。

這部Yaris屬excel版，安全設備最足，盲點提示、線路維持、前後senseor及緊急煞制、後泊鏡頭…等等，雖然個軚輕飄飄，仲輕過我以前Xbox360軚盤，好似玩具咁，不過我喜歡佢夠安全、省油，實實際際。

終於買車了

 轉子引擎的浪漫，繼續活在幻想世界就可以了…

（萬事得RX7，轉子引擎，威力無窮，但如果要你日日檢查及補充偈油，日日煲車，讓引擎到達合適溫度，偈油黏合引擎內壁作出保護…一般凡人不會有心機咁做。）

人終歸回現實，做人實際點好。買車，唔係買豐田，就係買本田，豐田唔係買Corolla，就係買Yaris，還有更好選擇嗎？

Corolla長4370、闊1790、高1435、1800cc混能

Yaris長3940、闊1745、高1500、1500cc混能

Corolla雖然各方條件優勝，但考慮到英國窄路，兩邊泊滿車，中間變單程路，仲要找位泊車，明顯細車優勝，加上巿區車速有限，最快不過40英里的格拉斯哥路（來回線有測速鏡頭），大部分地區20英里，大馬力係冇用，只會食油，Aygo的999cc都夠用，只不過太細，放不了行李。

至於選擇Approved Used Car，價錢只次於新車，但較有保障，我之前部Honda雖然都係好車，但十幾萬公里，已經七勞八損，飛輪要整、離合器要換，前車軸都斷埋，架車即時冇動力，幸好不在高速，而是細街小路，否則早已客死異鄉了。舊車平買貴用，整了幾千元，年驗MOT又要整手制威也、迫力等，架車1700鎊（約17000港元），一年整車錢也等同車價，足足用了三萬幾蚊。

（車價18990鎊，加兩年原廠service及MOT，加supagard total protection，扣回「錢七」600鎊，要19181鎊。）

豐田Approved Car保你一年，如果每年用原廠service，每年保養會延續一年，最長是車齡十年或十萬英里，費用約三百幾鎊（三千多港元），幫你換晒油，百幾項檢查，有壞換埋零件，仲想點！如果每年三千多元買安心，總好過舊車整了萬多元都不覺得安全。

架車2020年，現在keep住原廠保養，保你玩到2030年，之後去「哈活」做保養，延續壽命，唔撞的話應該涯到十年，2035年禁售全新油車，到時才想吧！

IB投資系列：發達就預咗會一無所有

 賭枱上甚麼人會發達？第一類：贏了錢，將賺了的錢保留，只將一部分再賭，或者割禾青唔賭。第二類：贏了錢，all in加碼或相當佔比再賭。發達永遠是第二類人，但PK也是第二類人。

天朝地產公司就是不住高槓桿投資，在巿況好的時候，極短時間賺取極大的財富。漁村的炒鋪起家的家族也是一樣，巿況一逆轉，就全部死晒。

就是如日中天的華爾街，也有些人認為泡沫仍會去到2025，換言之，佢地認為現在仍可以炒，但邊個可以知道將來會怎樣？好像我以為寶島會不穩，總統選舉前放晒台積電，跟股神巴菲特，應該冇衰，怎知台積電升到135美元，見財化水，天朝不過紙老虎，講就天下無敵，做就有心無力。

風險管理就係在危機發生前，作出部署，減少損失，倘若危機沒有發生，一切部署就係多餘，甚至錯失賺錢的機會，太小心，就不會發達，但也不會PK，很公平。

剛報完稅，一個仙都唔使交，一則以落地英國才計，課稅年度得七個月，二則都是股票、債券、基金、現金分配，槓桿比例又不高，賺錢有限，下年報稅更有大筆撇帳，「講股」斬倉，走得快也蝕了不少錢，應該交不了幾多稅。

（這個辛時代，估唔到都有人講真話，珍惜生命，遠離「講股」。）

（天朝負債嚴重，奄奄一息，「講虎」死到唔肯徹辣，因財赤嚴重，卻不肯停基建，有說不出的因由。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：無商不奸，投資要選擇

 要知道我們活在籠裡，只有一點兒自由，意識、文化各方面都被操縱，我地讀經濟學都知，要用有限資源滿足無限欲望，商家佬從來都唔會死錯人。

以前煙草是被認為有益健康的東西，醫生都吸，即使今日大不列顛也是這樣，二戰以後，女權益起，有選舉權，吸煙有平權意義，鼓勵女性吸煙，賺更多的錢，後來病的人，死的人日多，這條路不能長賺長有，就轉移至食物，加多D附加劑，令你食多D垃圾食物，上晒隱，周身病，就用醫藥幫你，要你食一世的藥，直到你肝腎都頂唔住D化學野，步向死亡。

人一世要為幕後玩家賣力，仲要俾佢賺一世的錢，良心更是欠奉，賣肉，要用四公斤植物飼料，才可以換一公斤肉，加了抗生素，兩公斤飼料換一公斤肉，甚至低於二換一比例，已經好平，咁仲未賺夠，要一換一，整植物肉，加化學劑當肉，又話環保，又話愛護動物，又話健康，真係咁益你麼？做人唔好咁天真，牛放屁真的可以令地球溫度上升？就算工業革命後的人類都沒有這個能力，夜郎自大！講咁多都係一個錢字。

要你食麥皮、飲牛奶、豆漿、植物肉、植物油、人造牛油、垃圾食物，最終周身病，何時健康過…

要你環保，全英換了紙飲管，開頭太軟，加硬後不能回收，又要斬更多的樹，何時環保過…

要你減碳，多用天然氣發電，多用可再生能源，發電成本上升，是否環保冇人知，但能源費用卻急升，要俾更多的錢…

其實商家佬唔在乎你是否健康，是否環保，是否愛護動物，只在乎金錢，只不過會用各種宣傳、教育、政策，將這樣事合理化，令你甘心樂意奉上你的金錢。

所以對某些人而言，商業係邪惡是十分理解。我以前在某教會工作，某同工十分正氣凜然，股票一概避談，但強迫金推出後，就無問題！我都拗晒頭，你買MPF基金，一樣係買股票，有甚麼分別？因為強迫，就會變得正氣麼！霎戇！我實實在在告訴你們，如果股票係邪惡，用甚麼形式買也不會改變其本質，反而你自己投資，你可以選擇，我自己會避免投資毒品股，如大麻股、煙草股，另外賭博股也避免，陰騭錢，無謂賺，君子愛財，取之有道。

（某世界首富，放蕩不羈，令股價波動，甚至影響NASA合作，曾公開吸食大麻。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

在大不列顛，日本車是最好？

 我們這些被日本文化洗腦的一群，就算沒有睇過數據，沒有見識過日本匠人精神的造詣，也深深認定日本車是最好的。

(日產GTR大戰萬事得RX7，全日本車對決，豈能不興奮！）

睇過「頭文字D」，由豐田，至本田、日產、萬事得、掃把佬、三菱…所有日本車都是獨當一面的好車。（被洗腦，中毒極深）

（故事中，庄司慎吾所駕就是本田civic EG6，雖然跟我所駕「錢七」並非一樣型號，但在腦海已認定是好車。）

黎到大不列顛，人人唱好歐洲車，友人介紹法國「獅王」2008，平、靚、正，性價比高，又話鋼水好，大大架，夠安全…。

雖然睇過資料，人們試駕的短評，雖然講不出甚麼壞話，但真的沒有買這架車的衝動。

一架車安全與否？不是大大架或主觀上覺得鋼水重就安全，而是結構鋼性及通過歐盟撞擊測試。不過我對1200cc渦輪增壓引擎的耐用性有保留，喜歡自然入氣引擎，反正1800cc、1500cc都係差不多，170至180鎊一年，何必冒險，引擎壽命有20萬公里，十分耐用，渦輪增壓肯定冇，中間一定有問題。

（日本引擎技術高超，不得不佩服。）

以我們這些「窮鬼」，年輕時怎可能有錢買汽車雜誌，那時又沒有互聯網聽龍sir講解，汽車認知都是由遊戲、漫畫而來，正規課堂又不會講，漫畫怎講就怎信，AE86這些舊車都會贏，對我地這些地底泥，多麼勉勵，萬事得RX7怎樣威風，也令我們對這品牌改觀，反而性能最好嗰部日產GTR，就成日輸，唔知係咪冇俾廣告費。

（中里毅所駕日產GTR R32成日輸，唔知以為部車冇料到，這架車平時是FR，加速過灣時偵測後輪重量增加，會將驅動力傳至前輪，成為4WD，車又重，十分貼地，穩定性極高，可謂無敵戰車。）

豐田在北美就玩晒，通用、福特都企埋一邊。但在大不列顛，沒有一個品牌有壓倒性優勢，鹹魚青菜，各有所愛，德國車（平治、寶馬、歐廸、福士）、日本車（豐田、本田、日產、萬事得…）、韓國車（現代、起亞…）、美國車（福特、特斯拉）、英國車（Vauxhall、MG偽英國車)、法國車（標誌、雷諾）、東歐車，「天朝」車「肶訝敵」都有，不過極少人買，街上未見一架。這裡是大愛包容，你喜歡甚麼就買甚麼車吧！

（我做人實際點，可靠耐用，才是正路，有甚麼比這架「地獄腳車」更好呢？）

（本田思域操縱更好，更型，也是不錯選擇。）

移英日記（133）終於報到稅

 經過幾番波折，終於在「Loong」年前收到激活碼可以報稅了…

已經過了一月尾最後限期，希望唔會受罰吧！因為全是大不列顛行政問題，黎到這裡只能適應這裡吧！

黎緊可能有長征活動，由愛丁堡殺到去修咸頓，全長449英里，要用7小時半，講起都驚，中途應會在曼徹斯特停一停，食個飯，以我嗰部「錢七」Honda Civic應冇可能涯到，變相提早買車。

友人提議買法國「獅王」2008，係細SUV，家人坐得舒服，又話去到歐洲唔買歐洲車係好笨，只不過我不認識這牌子，加上1200cc渦輪增壓，對機器有很高要求，故日系車避得就避，以自然入氣為主線，避免故障問題。以前做野搭檔都揸過豐田Hiace，柴油渦輪增壓引擎，也是可靠的，人地係世界第一大廠，「獅王」都唔知排到第幾，豈能相提並論！

（日系車、德系車是正路選擇，其次是韓國車，銷量已經是人們用錢去投票，法系車屬冷門。）

其實唔駕車是可以的，撘飛機來回，點對點，或倫敦再轉車，也要好幾千，全火車轉幾程也平不了幾多，仲貴過飛去德國，我都唔知點解？駕車係最平方法。

（部車得唔得，副偈好重要。）

終極的籠：罪的牢籠

 你去到邊度，也困在不同的籠，你以為有自由，真係太天真，只不過由一個籠，搬到另一個籠。「漁村」的籠，是全球最細的籠，但這不過範指居住空間，營商自由、文化自由、表達自由…以前也是相當廣闊，但今日已窄到唞唔到氣，如果唔係就唔會咁多人移民了。

籠有很多種，國界的籠、知識的籠、宗教的籠、道德的籠、文化的籠、歷史的籠…。當我年少時，被困在讀書才出人頭地的氛圍，你幾唔想讀，讀得再差，也要你讀到讀唔到為止，突然有一樣野令你以為突破這個籠，多暢快啊！（其實從來沒有離開）

說得誇張點，我今日記得的一切知識，都是由漫畫而來…「足球小將」教你越位陷阱，「男兒當入樽」教你搶藍板，「聖鬥士星矢」教你甚麼是光速、絕對零度，「頭文字D」教你灣路漂移…

（光速每秒299750公里，可圍繞地球七週半。）

（絕對零度是攝氏零下273.15度。）

學校課堂的知識，不過培訓工廠工人，二戰以後轉移至不同level的管理人才或專業人士，人的一生，就是工作，古今如是，服侍背後的幕後玩家、終極大佬。跟著灌輸一些佢地想要的價值觀，希望你們跟著去做，以便獲得最大利益。

（大愛包容真係咁爽？地獄的火會溫柔體貼麼？）

麥皮唔係人食，BB才飲奶，植物油係機械潤滑油，那理真相係點，佢地會影響學術界，廣告宣傳，總言之要你們繼續食，賺更多的錢，當你們失去健康，再用醫藥賺你更多的錢，椎間盤突出會自然康復，糖尿病會逆轉，從來沒有人告訴你，只會話有病一定要做手術，食藥要食一世，如果唔係咁，點賺盡你一世的錢。

古代遊牧轉至農耕，真的是文明的進步嗎？建長城真的為了保護人民嗎？更重要是透過國界去圍困臣民，要他們永世服役自己，今日的國界也有同樣效果，所以「強迫金」不會輕易被人提取，因為你一走，就繳稅給別國、為別國勞動。

（某漁村最大銀行「強迫金」明知某些巿場崩塌，仲建議人們偏高比重，人唔醒覺，真係冇辦法，最離譜是來到大不列顛的「天朝人」，個人有自由，但思想仍是活在牢獄，天天做醜事、出洋相。）

今日我們都是活在籠中，當然大不列顛的籠一定比「漁村」的籠大，這裡也有超速鏡頭促人超速，商店有閉路電視促人偷竊，監控鏡頭只針對犯罪行為，並不限制人生自由，歌衰英皇（佢有癌症應為他祈禱）、高呼蘇格蘭獨立都冇人理你，不過你說：「炸了大笨鐘」，會立刻有警察促你，因為對恐襲十分緊張。那些日夜講country安全，其實好dangerous，唔係個country，係個party。

（「天朝人」大鬧大不列顛，反令Dr K紅起來。）

終極的籠是罪的籠，除了控制了所有人的心思、私欲，更操控了幕後玩家，再支配野心家、獨裁者、政客、金融家族、有錢佬、政客、知識分子，控制全世界。這個籠最終極是要你一生迷失，帶著罪孽去死亡，最終與終極大佬撒旦一同永墮硫磺與火的地方。

（獨裁者自己都知自己要去那裡，但要攬住全人類一齊死，因為要遵行終極大佬指示，透過戰爭及一切手段，促發人類大量死亡。）

IB投資系列：輸錢皆因贏錢起

 有些人買了基金唔理、「強迫金」唔理，任由他們上上落落，如果買的是巴郡，這招暫時都合用，但普遍企業都不會長存，生意有生意的周期，沒有一個生意可以長做長有，以前的龍頭，諾基亞、柯達、英特爾，已經今非昔比。今日要追都是蘋果、微軟、英偉達、超微吧！

經濟週期也是一樣，同樣的股票，股價1元，100股，本來值100元，經濟衰退跌至0.7元，只值70元，如果未到衰退前沽貨，等到衰到貼地，彈返0.8元再買回，原先的錢，持股提升至125股，若股價彈回1元，資產便有125元（未計現金賺取利息或中間購買其他資產的盈利）。如果甚麼都唔做，多年後仍是100元。（好彩的話）

經濟週期不可怕，人類歷史都是重重複複，而最大問題是人類從來都學不到教訓，過往獨裁導致幾千萬人餓死，於是出現集體領導，今日又再度發生，倘若未亡party亡country，集體領導又會再發生。歷史給予人類的最大教訓，就是人類從來都沒有接受教訓。

月圓則虧，物極必反，當人們憧憬某某股票升破700元、800元、900元，幕後玩家已準備好鐮刀割韭菜，問題是現在埋單？還是炒到年半最後一刻間？當大難臨頭以前，所多瑪、娥摩拉，人們如常買賣、嫁娶，只有羅得一家逃出生天。

你可以留在「漁村」繼續賺錢，賺到最後一刻，到時走唔走到，也成問題。早年我已寫一篇網誌「走得快好世界」，如果那時變賣資產，在大不列顛5+1躺平也可以，現在跌了幾球，走鬼走馬咩？

人永遠想賺多一點，輸錢皆因贏錢起，過大海賭錢，磨爛蓆最終都係輸，見好就走，永遠是最好，但永遠沒有人聽入耳。我已在大不列顛一年鬆少少，俾你在「漁村」賺多年幾錢，也比不上股、樓蝕個條數。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。