英國的生活一定不會像漁村的多姿多彩，但卻是另一種生活模式，最近與住在巿中心附近的漁村夫婦聚會，雖然他們居住的地方比我們更繁華，但他們異口同聲表示英國悶到抽筋，這裡只有Princes Street王子街，獨孤一味，他們也帶了香港的公路單車，我一睇跟我漁村的摺車，就知即使他說見到尾燈當我贏，我也甘拜下風，但咁又如何，愛丁堡又冷又凍又雨，早前更落雪，英雄無用武之地。
英國要擴展日活圈子，不是靠單車，要靠私家車，否則只會停留在步行的生活圈，公共交通係有，但都要步行十數分鐘，等候十數分鐘，跳了班冇通知，繼續等多十數分鐘，落車再行十數分鐘，基本上大部分人不會選擇這方式，只不過要去巿中心，冇位泊車，或價錢昂貴，才予考慮。
英國的玩法，如果有文化，應去參觀各式各樣博物館、圖書館，確實是增廣見聞，教會也曾有團，不過都係純英語導航及解說，與其一頭霧水，不如不去。如果像我這些低文化文盲一族，去郊野地方，欣賞大自然景物，反而是一個好選擇。
愛丁堡是沿海城巿，雖然較北，但比中部城巿暖和，試過-7度，落過一兩次雪，但整體都係幾度，有海水調和，唔會太凍。見到海，人都會開心點。
（沙灘不算美麗，但睇到自然景物，人都舒服的。）
（水清沙幼就講唔上，但怎也乾淨過漁村，得幾度，冇人落水。）
駕車去容易，走卻難，因左右兩邊泊滿車，變成單程路，幸好有前車開路，尚算通順。跟住去老麥開餐，兒子例飛要買開心樂園餐，最想有玩具。
蘇格蘭地廣人稀，許多地方也要駕車才能去到，例如尼斯湖，盛傳有海怪，駕車也要三小時，暫時不會考慮，某弟兄更試過駕車四小時去英格蘭列斯的Morley去探另一家庭，真係誇張，我自問頂盡一小時已是極限了。
沒有留言:
張貼留言