IB投資系列：炒股不要仆街

 當面對每一次波動，高奴也要解釋…

當AI估價太高，就自然轉到其他行業，就係咁簡單。不過大行用啲專業名詞，再作個「HALO」交易，咁大家咪接受囉，從來舞高弄低，從來都是幕後玩家想點就點，只不過今日資訊發達，人們都需要理性嘅理由，咪作得勁啲。

現在人們有兩個矛盾，一係怕AI泡沫，一係怕AI取代人類，但實際只會發生其中一樣，AI泡沫，就代表它取代不了人類。AI取代了人類，咁它就肯定不會泡沫，而且以今日估價計，仲好便宜㖭！

只不過我哋低奴，永遠想唔到幕後玩家嘅劇本怎樣玩，要清空股票，日後升浪跟自己無關係了，持有股票，倘若泡沫，財富有極大損失。你只能其中一邊壓注，一係發達，一係瞓街，分散嘅話，就按現金與股票比例，出現賺多、持平、蝕多等不同結果。

我嘅建議，跟據「爸飛突」、「茶仔芒隔」嘅投資法則，一定唔可以俾自己輸錢，咁資產嘅部署就是1/3現金、1/3穩健收息或穩健股票、1/3主攻股票，去槓桿化，咁樣你固然唔會發達，但亦唔會仆街。

我賺錢都大減，得6013講元，以前每星期嘅期權金至少一萬講元，多過一萬係常見，最近幾星期都係只得六七千，記住大不列顛，四星期有一個星期嘅錢用來交稅，24%資本增值稅，三個星期得嗰兩皮左右，正常要節衣縮食了，我就如常運作，發達時我冇住豪宅，落難時都唔使住劏房、瞓街，好公平！凡事唔去到咁盡，永遠都可留有餘地。我都係開電筒去厠所，開燈嘅人冇資格同我講個窮字，我暖氣只較16度，室溫約12至14度，起床即關，長開暖氣嘅人冇資格同我講個窮字，沒有遠遊或探訪，我兩個月架車才入一次油，費用40鎊，平均20鎊一個月，去巿中心泊車貴就撘巴士，去TK Max嗰邊商場次次都行路去，來回步行兩小時，當做運動，你交通費貴過我，冇資格講個窮字，一個人變成點，自己永遠離不開責任。

（對我而言，駕車係一個選擇，唔係一個必然，但有選擇先係老闆，今晚明知要帶電磁爐及買飲品至友人家中聚會，大廚整盤菜，咁咪駕車囉，唔需要迫自己，用最好嘅方法及途徑。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

愛丁堡詠春：詠春師傅都唔知自己做緊甚麼

 我自己年資尚淺，拳係可以曲起食指或中指，變成鳳眼搥，增加威力。但係曲起尾指，真係聞所未聞，「蝗公」整個武術生涯，從未有一個視頻、截圖，有曲起尾指嘅日字拳，微握係冇問題，維持拳型，至力盡將拳扼實，擊打目標，方為正路。

武術其實跟廚技也是一樣，只要有心得、技巧，加多減少唔係大問題，但總唔會離開一定範疇及法則，例如粵菜、川菜也有不同style，用甚麼香料，口味也唔會偏離太遠，川菜唔辣仲甜嘅，就唔係川菜喇，也唔會放洗潔精、厠所水、山埃混入食材之中。

任何有用嘅功夫，拉筋、熱身、體能，至少佔一半時間，你想想你學嘅功夫，究竟是甚麼？外家拳可能好一點，扎馬已可訓練你下盤（雖然不是最好方法），格三星練你橋手（雖然不是最好訓練），反觀內家拳，講求呼吸吐納，最緊要放鬆，用意不用力，如果你係打得之人，內外兼修，當然係最好，就好似全科醫生，再進修專科，一定係更好，但如果唔係呢，你根本唔知自己做咩？洗潔精、厠所水、山埃煮埋一碟。

（真正嘅強大從來都不是來自力量本身，而是源於你為何而戰，當一個人忘記了揮拳嘅理由，就算佢擁有再強大嘅力量，他都只會淪為一個被空虛所囚禁，記憶嘅囚徒…這是「鬼滅之刃」猗窩座嘅悲歌。）

(One man’s extraordinary fight to save the family he loved.這就是電影「擊動心情」主角打拳嘅目的。)

移英日記（357）賊船

 AI將智能變得廉價，人力變成高成本負債，AI越省錢，就越減少人力，越省人力就越用AI，惡性循環。

軟件及白領先死，跟住保險經紀、中介又死，自動駕駛出現，司機又死，當人冇工作、冇消費，咁個世界會點呢？通縮嚴重，但生產成本大跌，物價平、服務平，用很少錢就可生存。

AI未發力，天朝通縮，也讓講人也紛紛北上，一對年老夫婦，沒有收入，靠長者生活津貼，合共八千多元，在「帶環區」，兩千多元已租到屋，生活過得不知幾好，使乜走去大不列顛？這個故事也讓我們看到，AI讓成本大幅降低嘅效果。

好老實講，如果你生活檢點，有儲蓄、有投資，一個月攞幾千元至一萬元利息或回報，根本唔係難事，已可提早退休，返工！霎戇！工都好返嘅！繼續工作只不過為了提升退休時嘅生活質素及水平，俾得起錢，天朝係可以唔使吃預制菜，買Tesla仲平啲添。

有時咁諗，在天朝生活比漁村更好，漁村為了示忠，比天朝還嚴，管制更廣更大，寧左勿右，唞唔到氣，點解唔去一個令自己生活得較容易嘅地方？當初去大不列顛，人們嘅初心都係咁，但如果政策浮游不定，人心思變，生活冇安全感，稅又高，最慘係有子女將讀大學，你唔俾永居及入藉，如何支付國際學生學費呢？感覺好似上咗賊船咁，咁又何苦呢？

移英日記（356）失信

 許多人都後悔移民，不是因為這裡困難，而係政府沒有履行承諾，以前離開「漁村」，因為沒有履行承諾，2047年怎變也算，溫水煮蛙式漸變也算，當突然間大火猛煮，許多人也受不了。

「講人」紛紛投奔自由，然而，不單「嬰國」，「寶島」、「楓葉國」也收緊政策，如果所有國家都係咁，那走與不走有甚麼分別呢？「講人」可以堅持，因為睇住目標，頂硬上，睇住子女，繼續升學，如果話俾你知，政策隨時會變，咁堅持仲有意義麼？你辛勞工作，然後告之出糧與否係未知之數，視乎老闆嘅心情，你怎樣可努力呢！怎樣可堅持呢！如果信耶穌，得救與否係未知之數，主要視乎當時嘅政策或上帝嘅心情而決定，信仰都會崩潰！

出得嚟行，係講個信字，做生意，又係講個信字，就算劉備死咗，諸葛亮也秉承「興復漢室，還於舊都」嘅遺願，做唔到係一回事，也要努力去做。「燉小萍」嘅伍拾年不變，即使佢已經死了，佢嘅繼承人都應該堅持，如「肛擇文」、「鬍感塗」繼承，盛極一時。BNO5+1係「寶狩黨」嘅承諾，「公黨」取得執政，「私己然」也應繼承。

對我而言，就算終極冇永居、冇入藉，也不會後悔，也算一個體驗。個仔讀完「嬰式」教育，轉去「馬拉」讀國際學校應該完全無問題嘅！能夠脫離嬰國稅嘅掣肘，可以自由咁投資、賺錢，反而係一種解脫！

（「今上」做到九五之尊又如何？）

愛丁堡詠春：好唔好打，力量係關鍵

 這個世界係重視權威、科學嘅年代，但唔係所有野都要引經據典，因為許多都係普通常識Common sense，並不需要科學數據証明。

有人批評「蘿拔金奶滴」沒有接受接受醫學訓練，因此「使尾國再健康」MAHA有問題。不過想深一層，「尾國」科技領導世界，但人均壽命卻低過許多國家，一定係出了問題。MAHA運動標誌著「尾國」人民從加工食品轉向更多天然食品，食天然嘅牛油勝過人造牛油，食天然肉類勝過加工嘅香腸、午餐肉、煙肉，有甚麼需要爭議，需要甚麼嚴謹嘅科學研究及數據呢？人類只有男及女，這不過是普通常識common sense。

在絕對力量以下，一切技巧也是花拳繡腿，道理也是一樣。我再用誇張例子比較：

力量最大，也是最好打嘅人，在絕對力量之下，任何武術，包括巴柔，都冇用。

有的所謂「師傅」，身型都冇優勢，又煙又酒，成個肺黑晒，身體好得去邊！體能好得去邊！力量好得去邊！握拳握成咁，尾指突出來，日字拳係用下三骨，拳重得去邊！得把口吹，吹到天花龍鳳。

（又要請「聾哥」示範正宗嘅日字衝拳，力點在下三骨，免得俾嗰啲古靈精怪師傅搞到混洧視聽。）

活了幾十年人，仲唔明、仲唔化咩！所謂「武館」，不過係「戲棚」，所謂「師傅」，不過係「戲子」、演員。

打唔打得？要觀察幾樣野，係男？定女？白人？黑人？定係我哋最弱嘅黃種人？身型如何？年齡如何？有沒有不良習慣？如煙、酒、叫雞，性沉溺之類，有沒有良好習慣？如跑步、健身之類，學甚麼功夫？如果係巴柔、泰拳、拳擊，都要忌佢幾分，如果係廢拉國術或廢拉詠春，九成都係騙子，叫佢食屎啦，面都唔使俾。

（兩個人，邊個健康？邊個早死？一眼就知，這是普通常識common sense，不必科學數據，驗完身才知。）

（有氧、無氧運動也是有益。）

睇樣唔可能透視佢學甚麼功夫，但「天朝」樣貌，都要避忌，不能盡信，「鄉講人」專幫「鄉講人」，霎戇！在大不列顛，「鄉講人」專呃「鄉講人」就真，要賣虎杖樓，唔搵「鄉講人」羊牯麼？甚麼「鄉講人」律師幫「鄉講人」，律師費係本地律師兩倍或以上，會維護你權益？霎戇！叫你出高啲價、早啲成交、費事浪費佢保貴時間，又話眾籌打官司推翻政府修例，咁請甚麼律師打官司呢？我可唔可以一定要請英國本地人律師呢？

（「天朝人」有幾邪惡，大家心照不宣！善有善報、惡有惡報，最終受傷也無人敢救，失救而死嘅人有多冇少。）

愛丁堡詠春：學功夫要有智商

 其實，一個人打唔打得，睇外表都估到幾成，這不是高深學問，只不過普通常識common sense。

俾一些誇張例子比較…

年輕一輩可能唔識他是誰，但睇佢身型及肌肉線條，應估到戰鬥力如何？

再睇睇這個，如果係SUMO相撲手，都係偏肥，但全身肌肉、體能極佳，這個白衣人，只有大肚腩，身型在成班鬼佬之中，毫無優勢，但唔知點解會俾佢老點？

點解成日有詐騙？因為十六型性格碼有F、J，另外缺乏認知能力，也是關鍵。

我去過無數「戲棚」，一定擺放各式兵器，如果係詠春「戲棚」，一定有八斬刀交叉擺放，又左右貼上對聯：「詠春傳正統、華夏振雄風」之類…扮得似模似樣，不過演員最唔得，一係奀挑鬼命，一係大肚腩，戲子連戲都費事演。

（演員要入型入格，要肥就肥，要瘦就瘦，「女娘位」飾演嘅跛豪，為此增肥，真係入型入格。）

健康有健康嘅樣睇，當營養師都要特登減肥，建立專業形象，唔係鬼信你咩！

（其實都係戲子，教埋啲偽科學，營養金字塔，幫商家佬賣工業產品，殘害人類，今日已變倒三角了，如果學嘅野係真，食得啱，卡路里都唔使計，唔需要特別減肥也不會肥，營養師要減肥係咪有啲詭異呢？）

偏偏擔當詠春師傅嘅戲子，戲都費事扮，沒有修身，動作求其。如果普遍觀眾對功夫有真實認知尚好，偏偏佢哋主要睇功夫電影，睇埋啲假野，自然唔知真野係點，我話俾你知幾十年前要睇外國拳擊、終極格鬥，要買外國錄影帶來睇，當年都要數百元一盒，而且仲要有N線錄影機，既然普遍人冇睇過真野，怎會有辨識能力？反之幾十年功夫電影洗腦，於是我們咪以為「成膿」、「你蓮杰」、「唔驚」之流好打得，「功夫」嘅神秘感，加上「甘溶」武俠小說嘅迷惑，更讓人覺得不能用外表判斷，一個老頭子嘅內功分分鐘會打死人之類。

今日互聯網咁普遍，大把真實搏擊免費睇，打假亦不少，如果仍然咁無知，咁都冇辦法，咁唔係認知嘅問題，係智商嘅問題。

移英日記（355）要諗定後路

 移英講人最關注係移民政策會否改變，看到以下資訊，個心定啲。

律師會強調：不可追溯適用。

追溯適用對已移英人士不公平。

政府必須確保對所有人公平。

以此觀之，法律人士普遍認為不可追溯，要確保政策對所有人公平，似乎係有利。加上諮詢期間，講人積極回應，也聯絡國會議員，在議會發聲，按道理首相「私己然」唔會聽唔到，如果政策只不過為搶改革黨嘅支持，效果已做到，唔需要嚟真！

不過「私己然」嘅行動，並非我哋想象，醜聞滿佈也堅佢下台，發癲上嚟都唔知佢會做甚麼，可能誤中副車，講人受害。

要睇睇係咪想留，若是，可積極讀英文準備B2考試，若時間不足提升，續多五年簽證，俾多五年錢，應該可以掛！如果續多十年都唔得，續到65歲，就沒有語言要求，錢可以解決問題，就唔係問題。

不過如果大選中，改革黨執政，反移民，出手更毒辣，你想留也留不了。再者這裡稅又高，人哋又唔喜歡你，係咪要苦苦哀求要留低呢？

IB投資系列：沒有分散風險

 有的人買幾隻ETF，以為分散風險，其實買嘅野係差不多。

上表顯示幾隻ETF最Top持股係完全一樣，不過如果將頭七隻顯示出來，都係嗰幾隻，因為尾股七雄在巿值極大。

因此買了VOO，再買QQQ意義不大，或者再買「木頭姐」嘅「荒州基金」，配料都係差不多，就好似叫Pizza，都係麵粉、茄汁、芝士，只不過有的加菠蘿，有的加火腿，有的加香腸，味道也差不多。

高奴「王人芬」爭持墮落股：「落機啊」、「嬰突耳」，真感意外！這些都是以前嘅大佬，手機大佬、晶片大佬，莫非有甚麼內幕？或持有甚麼關鍵專利？放「手臂」ARM，因彼此方向不同，放RXRX，可能做唔到成績，「王老闆」唔高興。

尾股七雄跌了7%，拖累「彪譜伍佰」冇升，因為其他部分升了，總算係平衡了風險，不過如果再調整兩成，就一定造成虧損，因此跌嘅時候再爭持，方為上策。

我拜讀了已故高奴「茶你芒隔」嘅投資，明白好的投資永遠係慢、穩、無聊，買嘅時候要小心謹慎，但之後最好唔記得去理，多年以後睇一睇便有豐盛成果。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

愛丁堡詠春：甚麼係師傅？

 我回想以前師傅真係好變態，雖然咁講係好唔尊敬，不過我成個詠春界都得罪晒，又有甚麼可怕呢？我又唔使靠「扮師傅」呃飯食，又在十萬八千里嘅大不列顛，有甚麼可怕呢！

當年師傅仲可以駡已經成為拳王嘅文國安、陳俊賢唔得、懶散、垃圾…如果拳王都係咁嘅評價，我哋冇上過擂台嘅，又算甚麼？豈不是垃圾都不如，甚至連再循環再造或堆肥、填海嘅價值都冇？真係好唔應該生存在世上啊！

師傅當年可以咁講，因為佢對自己訓練嘅要求，絕不會低過我這些拳王師兄，不過對自己有要求係好，但過份嘅要求，卻只會令自己唔能夠與人和諧共處，無辦法容納自己在天地之間。

我環顧世界上嘅所有師傅、教練，冇人會要求自己已過巔峰之年，仍然可以做得最好。

「廢隔信」就是足球員生涯，成就也是普通，但沒有人懷疑他是最佳教練，許多球星都是由他發掘、培訓出來。

拳王「太神」嘅教練「腐屍達馬托」，這個老人家唔通佢會好打過拳王嗎？

最近日本雙人花式滑冰冠軍，佢哋嘅加拿大教練，就是年輕，也絕對做唔到他們嘅動作。

師傅能夠訓練出拳王，已是最好嘅証明，唔需要太辛苦啦！

武俠小說中張三豐雖然年紀老邁，但仍然係最好打，但這不過是武俠小說，叢林法則仲有一項，年輕必剋年老，這是我們不能抵抗嘅，我都一把年幾，唔需要跟年輕人比較，唔需要跟他們鬥，有靚女都一定跟年輕俊男，唔通跟我呢啲老野咩！正所謂：「寧欺白鬚公，莫欺少年窮」青春係無敵嘅，無得鬥，我繼續練詠春只不過興趣及養生，唔係要跟你哋嗰啲所謂師傅爭飯食，呢啲「扮師傅」呃人嘅勾當，唔啱我做。

（一把年紀，人哋唔係貪你嘅錢，唔通貪你陣「老人除」咩！）

（就是當年嘅萬人迷「木村托腮」都老了！仲後生咩！）

愛丁堡詠春：只有錦上添花，沒有雪中送炭

 你要打人，都要握實拳頭，這不是高深拳法，而係基本常識common sense。

請看「蝗系」大師傅展示：

（日字衝拳係用下三骨打人，請問這拳會在那裡接觸先呢？抱拳嘅手也要呃緊，在胸嘅level，唔可以求其。）

（這個「師傅」最喜歡鬆手指尾，握拳最緊要手指尖屈入掌心，形成拳型，再用姆指扣住食指及中指，咁樣鬆晒嘅拳型可以打倒人麼？恐怕手指已經受傷了。）

（「瘟師伯」展示，未出拳前可放鬆微握，至接觸一刻才握實重擊。）

（「蝗公」展示，拳未盡，拳型都係維持。）

（「綜獅」展示嘅日字衝拳，係斜45度日字衝拳，還是放鬆未用力狀態，我唔敢肯定，但至少可見拳型係維持。）

好多師傅成日講要放鬆，咁樣先打得快。放鬆係無問題嘅，但可以微握維持拳型，至打盡一刻才收緊，咁先make sense。

我從不要求詠春拳可以做到拳王，好老實講以現時嘅水準，業餘拳手都打唔贏，因為興趣班就係興趣班，只不過學完詠春拳，至少比普通人好打，又或者面對較強嘅人，至少可保護自己或者減低傷害，這是好基本，如果個拳都握成咁，唯一反擊嘅能力都冇，你想有甚麼好結果呢！

我唔怕再講個殘酷現實俾大家聽，詠春只有錦上添花、沒有雪中送炭。如果你係好打，詠春會令你更加好打，你係唔得嘅話，詠春都幫唔到你幾多，我唔怕再得罪咁講，好多師傅奀挑鬼命，又唔肯操下肌、增下磅、練下體能，唔通真係打得咩？叢林法則係唔會變㗎，重量級必尅中量級，中量級必尅輕量級，喺絕對力量之下，技巧已經唔重要，男必尅女，成人必尅小童。又有的重則重了，不過有大肚腩及脂肪，而非肌肉，你做得師傅，都要注重下、節制下，我都知大家係做緊戲，扮做師傅搵食，至少都有番啲功架，唔可以太離譜㗎！

（國家隊體能及技巧一定最頂級，但竟然被15歲𡃁仔打敗，因為男必尅女，肌力及爆炸力係兩回事。）

（陳之輝係動作演員，但都有功底，有功架，交足貨，演廖師傅，深入民心。）

移英日記（354）唔係你唔夠好

 最近有一個感人故事…

一個原本退役，返到滑冰場工作，了其餘生，卻在一次意外下，被加拿大教練睇中，佢嘅低馬步竟與另一女運動員完美配合，最後組成隊伍再次比賽，奪得冠軍。

問題唔係你唔夠好，只不過你未搵到屬於你嘅戰場。我對這個故事特別有感覺，因為我就係一事無成嘅人，細個讀書又唔得，運動又唔得，出嚟做野，又唔識做人，做甚麼也不成功，做學護，沒有成為護士，做福利工作員，沒有成為社工，做教會同工，沒有成為牧師，做地盤，沒有成為師傅、判頭，學詠春，永遠都覺得咁垃圾，永遠都係垃圾詠春，死咗都要寫明係詠春垃圾師傅之墓。

點解要咁樣呢？人哋富貴係人哋嘅事，做到護士，佢真係有南丁格爾既心麼？做到牧師，真係人人都有耶穌基督嘅心麼？做到釘板師傅，真係工藝卓越麼？做到詠春師傅，真係功夫超凡麼？大家都知唔係！

（以前在武館，如果黐手個馬攪成咁，俾師傅「吊」死了！）

（詠春只有正身二字箝羊馬、側身馬、進退馬、退角馬，而家嗰啲古靈精怪嘢真係唔識啦！）

活了大半世人，我已經唔需要為生活而工作，每星期只需花數分鐘，按幾個按鍵賣幾張期權合約已夠生活，就更要用時間想清楚未來日子點行，B1考咗，但自己有幾多斤両自己知，仍繼續玩下「度零高」學英文，繼續練下詠春，或許將來有用吧！如果搵到屬於自己戰場的話。

IB投資系列：轉碼

 除了神以外，無人會知道未來，因此人人也有不同睇法：

有人朝傳統板塊，有人買大巿嘅「彪譜伍佰」，有人繼續在AI及科技板塊，完全找不到共通點。

有人睇淡後巿，全部清倉。

有人組建AI下層產業。

就是科技公司，也有不同部署。

就實際情況，資金確實由「尾股七雄」轉移至其他公司，這是不容否定嘅事實，因此AI嘅回調係機會？還是衰落？真係無人知，大家都係估估下！

我將資金買了某保險股UNH，「爸飛突」用312元買，我用289元買，現在雖回調，但應該十分安全。至於「彪譜伍佰」指數基金，應是安全之選，我沒有買傳統嘅SPY、VOO，卻劍走偏鋒買「愛已難」註冊，「淪噸」交易所上巿嘅基金VUAA，管理手續費雖較高，但佢嘅股息稅係尾國嘅一半，除笨有精，而且佢係累積型基金，不派息回饋在股值，對於大不列顛嘅低奴，股息係當收入稅，過了免稅額要交稅，不化算，這是最好嘅部署，這是長期投資，並非短炒，要有揸幾年嘅打算。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。