移英日記（93）財務自由？

 由於美股興旺，投資戶口收入增加，但酒店工作卻不住增加，以致經常遲放工，非但不能幫手接仔放學，減輕「歪芺」負擔，連美股也冇時間睇，做到腰都伸唔直又為了甚麼呢？於是辭職，反正咁辛苦都係八成支薪，二成交稅，倒不如專注家庭、股巿。

但老細極力挽回，願意減少工作，星期六第一次試行，果然九點返工，下午兩點收工，美股一至五早上九點半至四點，東岸時差五小時，即英國時間兩點半，放工即可投入股票巿場，不會錯過賺錢時刻。

（員工表現好，老細當然開心。）

本來我的如意算盤是我全職家務及炒股，「歪芺」去工作，咁樣就可用盡免稅額，然而「歪芺」沒有出面工作多年，似乎未得，唯有維持現狀。

現時總收入多於總支出，出現盈餘，但整體仍過重依賴股票買賣所得，利息、股息、息差收入仍未能獨當一面，不能財務自由。美帝今次加完息，今年仍可加多一次，經濟狀況仍未可知，吊住份工加埋D息係穩陣的。