移英日記（69）大不列顛租房技巧

 今日正式搬到新居，返教會前已車幾轉，返教會後再車幾轉，幸好架車整好，雖然不似貨Van一車攪掂，總算唔洗靠人。

新居屋租較平，但有些電器欠奉，電水壺、多士爐也是新買，電飯煲、微波爐、氣炸鍋則早前已買，另外，電視機、層架之類遲些要買，雖然要用多一點錢，但相對每月租金平250鎊，也是除笨有精。

我地沒有靠中介也能租屋，証明「鄉講人」也可在大不列顛租樓，不過冇保證人就需要預交六個月租金，業主要求一年租金其實不合法，但有些人也無奈接受。最好有工作証明，如果冇就要晒身家，IB戶口的資產要俾佢睇晒，未輸晒唔算太難睇（那時份工剛做）。如果英文好，就講講自己的故事，動之以情，唔好以為有幾個嗅錢就大晒，如果英文弱智，就寫封信俾業主，我地都係「校長」俾了封範本給我們，修修改改，感動業主，不止租到，還允許我們養倉鼠呢？兒子想了很久了。

（業主都是委託公司管理物業管理，該公司更俾了迎新包給我們，有垃圾袋、洗潔精、曲奇餅、茶包等，服務總算細心。）

大不列顛有幾間中介講到明不會租俾「鄉講人」，故那些DJ Alexander之類的公司就無謂浪費時間，找那些業主自己出post的，佢地較等錢使，可迫「鄉講人」預交租金，反而有機會。