平買貴用現代H1客貨車的駕後感

 以往周街的貨Van都是豐田Hiace，現在多了其他牌子，平治、標誌都有不少Gogovan司機採用，但數量最多是韓國現代H1，銷量僅排在豐田Hiace之後。

許多客貨車司機在放假時，都會用部車接載家人，如果部貨Van好像Suv一樣，卻兼有柴油的省油好力特點，是十分吸引的。

先講H1優點，駕駛艙闊落，對比舊Hiace就立刻高下立見，難怪豐田也出新車，一改盒仔車設計。另外，不必入尿素也合乎歐盟要求，減省麻煩，豐田Hiace怕你忘記入尿素去中和廢氣的毒素，當尿素減少時，汽車電腦會限制引擎效能，越行越冇力，當冇尿素，分分鐘開唔到車，你都咪話唔大件事。另外，韓國車通常跟歐洲制式，軚盤左指示燈、右水潑，這次現代H1跟足日系車左水潑、右指示燈，駕開Hiace轉駕H1完全沒有適應問題，值得一讚。

駕駛豐田Hiace，座滿人及貨，同時開冷氣，完全冇問題，但H1有點勉強，馬力似乎差少少，而且，車闊穩定性應提升，但當上西九快速公路行100公里時，穩定性跟舊Hiace差不多，似乎要在車架剛性及避震上要多下功夫，再者，後座沒有獨立冷氣輸出，空間又闊落，天氣熱時，後座乘客便會較辛苦了。

至於車頭突出，有別於舊Hiace，好處是若前方有意外時可頂一頂，司機生存率較高，但由於習慣駕舊Hiace，運用前方魚眼鏡，車頭可攞到盡，反之，駕H1，有車頭，但駕駛卻看不到車頭，又不像SUV有感應器，故便要小心一點。