移英日記（349）B1合格了！

 昨日去「淪噸性三一書院」考了B1 ，今早出成績合格了！

冇「趙博」、「Moon媽」咁威水有AA，只有AC，「歪芺」攞了AA，因為考官爆肚問我做乜，我答soul trader，靈魂貿易？人哋當然知我英文水皮，係指sole trader，但一定追問我做乜嘢？炒股用「講冬話」解釋當然冇問題，但一用英文，就臨時堆砌，只求意思，文法上兼顧不了，所以係衰Grammar。

我這一屆「低奴」，只求合格，CD也算合格冇問題，唔係要威，只盼「嬰國」首相「私己然」不提高英語水平至B2，俾條生路行下。

（提提各位，考試最好輕裝上陣，但別忘記帶上面物品。）

（準備很多，但用到很少，好多要臨場發揮。）

愛丁堡詠春：東施效顰

 有的所謂師傅為了強調自己如何正宗、正統，會刻意模仿「綜師」嘅動作，甚至出圖証明，呢啲小動作瞞得到普通人，豈能過得到我嘅法眼…

正所謂：「畫虎不成反類犬」，這裡有個人版，呢位所謂嘅「大師傅」，唔使左估右估，好快輪到你！九成詠春都係咁，點會冇你份，人人有份，永不落空！

留意「綜獅」動作，由於癌症末期，不能苛求。側身馬斜45度低膀手，望住個樁，中規中矩。反觀「大師傅」上半身明顯轉動過多，向著影相嘅人，攪清楚敵人係邊個？來自邊到？係個椿？還是影相人嘅方向？另外膀手伸展不足，雖然詠春有言：「以身補手，以馬補身」，手唔夠，就用身去就，但呢條友比「綜獅」高大，手腳比「綜獅」長，豈有用身補手嘅道理？再來，護手明顯飛㬹，沉㬹落膊啊！識唔識呀？有圖有真相，「綜獅」版本明顯較佳，如果護手離身一點就perfect了！

「將桌㷫」要做「午霉」師太以來，繼承「孽聞」嘅第八代宗師，「涼亭」又話繼承「孽聞」，講真呢啲人真係有一代宗師嘅質地麼？一個武術家在武林嘅地位，永遠唔係自封，而係江湖人士俾面，就好像當年有人稱「綜獅」為詠春掌門，「綜獅」立刻澄清，如果同樣有人吹捧佢哋做掌門，「將桌㷫」、「涼亭」之流，已經急急接受了！

講真，今日嘅所謂「詠春師傅」，大部分都係做戲即咩，全部都係戲子，真打全部都穿晒崩㗎啦！「天朝」已經有無數例子証明，真係有實力咪得嗰幾個。不過咁，太過苛求，只會失傳，三套拳再加椿、棍、刀，劇本有晒，交足戲、演好個角色，唔甩皮甩骨已經算數啦！

IB投資系列：唔輸已經贏

 點樣為之贏？

今個大浪，好多富豪都頂唔住。

貼地嘅生活才是贏家。

我哋成日要搵錢，所為嘅財務自由，如果日日睇住股價，擔驚受怕，那何來有自由呢？真正嘅投資唔係贏，而係唔好俾自己輸，當大浪冚到嚟嘅時候，仍然可以屹立喺市場，咁先係真正嘅贏，水退先知道邊個冇着褲。

當我們說「你超人」老矣！你睇下乜乜大王，你就知邊個係贏家。當AI熱潮，我們說「爸飛突」老矣！我想如果市場崩盤，邊個仲留係巿場呢？當然係揸住三千幾億尾元嘅「爸運」。

「涼亭」說自己詠春進到「以武入哲」，我唔相信打女人嘅人可以有此修行。我呢啲小人物，只不過以武論股，以膀手為例，膀手、護手都要做足，有兩手準備，因為黐手不用真力，日字衝拳做個樣，因此有啲門人為翻手快速，個動作做唔足，黐手練習冇問題，真打即刻出洋相。當年我做撘架，如果工程極短，我唔會揼實，方便拆架，早啲收工，做唔足一定快，但風險卻是存在。

投資有冇兩手準備？膀手係第一道線防禦，好比去槓桿化，將資產留在穩健部分。護手係第二道防線，係保留足夠現金，當危機出現，資金流動性會出問題，就好似「蘿結成」個名都借唔到千六萬，好景嘅時候，過億都肯借，唔好景嘅時候，一個仙都唔肯借，銀行都係做生意，唔係開善堂，都要衡量借貸人嘅風險，落雨收遮也是常見。

（如果人哋個拳已經在你面前一吋，即係buffer唔夠，俾人追數追到上門，護手應留有餘地，有充足資金，避免驚險嘅一幕。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

愛丁堡詠春：窒手衝拳

 詠春攔截方法大致有三：磨擦、改道、撞擊。

伏手一定係用磨擦之法，當阻力夠大，就能截停攻擊，就好像汽車嘅煞車皮同埋煞車碟咁樣。

攤手、擸手一定係用改道之法，對手個勢冇停過，不過帶風向，不朝向自己，威脅已經解決。

有的手法係界乎兩者之間，其實都無所謂，最緊要解決問題。

咁膀手呢？我嘅定義係改道。當然如果係「拋膀」嘅話，就加咗撞擊嘅成份。

請看「綜獅」及「聾哥」嘅示範，「聾哥」使出日子衝拳，「綜獅」用膀護手去消，留意正宗嘅膀手，手腕低於手㬹，使到攻擊手嘅外門產生阻力，因此力便會從無阻力嗰邊移去，造成改道嘅效果。

再看「瘟師伯」用自創「實用詠春拳」嘅膀手，我稱之為「水平式膀手」，手腕、手㬹呈水平，對付詠春嘅日字衝拳卻異常有效，因為佢唔係用改道之法，而係磨擦攔截之法，改道之法，對方嘅拳係可以伸展，磨擦之法，拳不能再伸展。

我驚訝傳統詠春都出現「水平式膀手」，不過某些派系嘅上一代師傅確有向「瘟師伯」請教及學習嘅傳聞，師傅跟師伯是同門師兄弟也經常黐手過手，但勝敗內容一概不談，因為這是禁忌！何況有些師傅跟其他詠春師傅學習呢？更是不能說嘅秘密，我唔係咁㒼塞，我都係雜種詠春，血統唔純正，終身不能被肯定、接納，只能永遠冠以垃圾詠春，bullshit! 正統，就去少林寺學少林功夫，詠春一早就不正宗。就好像「塵師傅」離開體系，也永遠不以「實用詠春」作宣傳，一樣道理！

手法只有合理、不合理，沒有正宗、不正宗。唔理傳統膀手又好，水平式膀手也好，如果對方突破了第一道防線嘅膀手，第二道防線嘅護手便要發揮作用，一旦發揮作用，膀手便功成身退，切忌存在別人用一手便牽制你兩手嘅狀態，膀手不停留，翻手要迅速，也是重要。

水平式膀手有個特效，個架有一定支撐力，第一時間窒唔到，往往會被實用詠春有機可乘。其實窒唔到就算，你嘅意思只不過管住佢，趁機反擊，木人樁法有一節就係窒手衝拳。

窒上打下，本是不合理，因為窒手會同時會消自己嘅衝拳，但對水平式膀手嘅阻力，剛剛係合情合理嘅反擊。

IB投資系列：太空心

 世界由地面，鬥到太空…

Heart of Galaxy (太空心）吹到咁大，在凡人嘅認知看來，似乎不是一代人可以完成。

我反而傾向落地啲嘅事，電車充電時盡用其算力，車主有錢收，咁嘅橋都諗得出，真係犀利！以後揸電車，等於免費充電，如果自動駕駛成功，駕車閒置時可24小時自己接生意，冇電自己去充電，提供算力繼續賺錢，買電車，就變成投資了。

由於大不列顛稅務問題，我不得不減少交易量，本星期除期權，一概按兵不動。

本星期賣16張期權，收1937尾元，即15108講元。

（如果我一早知道這些智者，早早投資「爸運」，人生嘅路就不會咁難行了。）

（我聽過前「爸運」副主席「茶你芒隔」生前分享，三十歲左右，兒子死、婚姻失敗、破產，生不如死，但不為不幸找藉口，不再自憐，努力向前，世界不會因你而停止…。這個人實力不在「爸飛突」之下，倘若沒有「茶你芒隔」，今日「爸運」股價只有一半了。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（348）B1最後衝刺

 現時仍是主力準備B1考試，包括：

真人演練…

軟件讀英文。某些字可以100%Native，某些很差，因為講式英語中毒極深。

AI學英文。

永遠都會有人話，好易合格，甚至攞AA，但要知道有七成移英講人有大專及大學水平，只因認證困難或費用貴，啲人寧願考，所以結果亮麗係理所當然，但我這三成低智、低學歷嘅低端人口，就唔係咁簡單。

這個考試根本係考功力：

係絕對有要求，唔好諗住蒙混過關，你要人家俾你合格，至少都要合乎上述要求，方為正路。唔好以為職場英文ok，低端人口都係從事低技術勞力工作，職員都係來自五湖四海，大家聽得明就算，文法、詞彙都錯，用之於考試，死路一條。

小說「三國演義」中，曹植能夠回答曹操嘅問題，因為楊修替他做「答教」。可見只要預期人哋點問，預早準備，取勝率極高，例如，Festivals，你準備了Christmas，跟其他節日都係一樣嘅，即係一味多食，舉一反三。

網上有人話60歲婆婆都考到B1，原來有高手為她做答教…

咁睇嚟唔係好難，而且考試只要有CD，即第一部分合格C，第二部分不合格D，也會合格。

移英日記（347）撥亂反正！

 當我用豬油、牛油、鵝油作煮食油，牛扒、蛋、菜作早餐，人人睇我幾時爆血管死…

尾國推出最新飲食指引，變成倒三角，死未！跟了幾十年死亡三角，身體已受影響，幸好及早醒覺，未有疾病前改變，或許長多幾年命吧！

牛扒，我都係買最平嘅薄牛扒，可能係西冷邊，最唔值錢嘅部分，Lidl「呢度」賣3.99鎊，唔係我喜歡嘅肉眼扒，只因夠平，牛奶一定買雪藏、全脂、有機，如果買到澤西島Jersey嗰隻金蓋奶，脂肪含量比日本奶仲高，更有營養，沖咖啡更滑，新鮮嘅全脂奶才是王道。UHT奶冇Q用，高溫燒晒啲營養，又唔洗冷藏，又可保存時間長，成本平很多，但冇營養，只不過是有味水。

健康，一定係有錢人嘅專利，但低奴也可逆境求存，食唔起牛冧肉、肉眼扒，如果烹調得宜，吃西冷邊也很好吃。牛油，香很多，但要2鎊，可用豬油，1鎊都唔使，平很多，但要用蒜頭起鑊，多些功夫。

記住，食野，唔洗理卡路里，只要天然、原生食物就可以！

移英日記（346）移民就有自由嗎？

 對我來移英最大問題係稅務，因我呢啲無業遊民，以炒股維生，trade太多，除了會計困難，要觸發佢哋嘅特殊計法，蝕大錢當你賺大錢，咁真係會死。

正正經經，我賺一球，佢收我24萬講元稅，我都算㗎啦，但操作就要好小心，沽清股票不能三十日內買回，以前高密度炒賣嘅玩法，一年幾千個trade，一定要停，如果唔係跳樓都唔掂！

現在距離四月頭財政結束仲有很少時間，條數應該搞唔掂，預咗至少十幾萬講元資產增值稅，如果當個人入息要Double，因為加埋預繳。

移民真係唔好玩，唔好以為去了十萬八千里，真係有自由，啲人反對embassy，都要蒙面，偷偷摸摸，就是怕「傷劏」啲黑科技：人面辨識，及混入人群嘅spy，只要你血緣係天朝人，終身都要受咒詛，終身不能作出忤逆天朝嘅事，任你取得外國國籍也好，除非你肯定一生一世不踏入中土及「壹戴壹露」國家。

如果去到外國也冇自由，何必要交重稅呢？如果小朋友讀書，中奴可以去「度罷」，低奴可以去「瑪萊篩啊」，佢哋嘅國際學校一定比嬰國嘅公立學校好，唔使交重稅甚麼學校也可以讀。

（唔好以為攞到外國國藉就係外國人，你嘅血緣是改不了。）

（這是「崩城」嘅國際學校，兩萬四至七萬瑪幣，折合十萬鬆啲講幣一年，交稅都唔止嗰條數，有得諗。「高地」嗰間最好，我嘅心水「大叻」排第二。）

移英日記（345）敗走英倫

 今日一眾家長返小學…

睇到個仔嘅功課，唉！嬰式教育就係咁！寫字寫到龍飛鳳舞咁！因為這裡沒有串字訓練及Copy book，所有字全靠拼音，好嘅係講到就寫到，壞嘅係拼音會唔準，所以會串錯字，字又寫得唔好，Capital letter、finger space…等問題。

我哋咁大個人，唔會只係睇一面，佢嘅優點就係缺點，反之亦然。最嬰式嘅口音，係完美嘅，如果唔睇真人，只聽聲音，係100%鬼仔，全無講式口音，但寫字就唔得，我安慰「歪芺」，今日寫字也很少，都是在電腦打出來，寫字唔係最緊要，未來世界，多點創意或許更重要。

HK就係死記、死做，就好似傳統功夫扎死馬，也有效果及作用。英式係用語景、拼音、唱歌、活動，就好似用深蹲這類動態訓練，今日嘅運動科學都証明動態訓練比靜態訓練有效，所以深蹲比扎死馬好。

我最擔心係稅務問題，「歪芺」用HMRC計法，仍有12萬幾鎊盈利，蝕到眼坦坦，都說你賺大錢，咁攪法真係會迫死人，唯有出皇牌，請耶穌打救，「除衪以外，別無拯救，在天下人間，沒有靠著別的名，我們可以靠著得救。」

我可以蝕到盡，一拍兩散，嬰國政府一個仙也收不到，咁樣我也大出血，這個「七傷拳」打出了，咁多trade，一個仙都冇賺，人哋一定查，我雖然我嘅心可昭日月，加上「歪芺」嘅謹慎，勝過這裡所謂專業人士嘅甩漏，沒有見唔得光嘅數，但俾佢麻煩也不值，正所謂「小不忍則亂大謀」，忍埋年半永居，再忍一年入藉，若果佢提升B2，咪即係叫你早啲走囉！

（古有關羽敗走麥城，今有鄙人敗走英倫，英雄無路，出師未捷身先死，長使英雄淚滿襟！）

（壯志未酬嘅感慨！）

移英日記（344）B1克敵制勝

 現時仍是主力應付月尾嘅B1考試，我不過一屆無夫，讀書唔得，做了地底泥多年，撈嚟撈去撈唔起，當年中學會考，我考了四次，才勉強考到個E，勉強合格，勉強讀高中，勉強考A level，最終做砲灰。

B1考試，聽啲YouTuber講，個個考A A，但你攪清楚，移英講人七成有大專或大學水平，就是未有認証嘅英語課程，至少會考成績唔差，A level唔差，英文都有番咁上下，有的更因為認証費用及麻煩，寧願考試，所以普遍合格及AA最高成績。

不過對於三成弱智低學歷嘅低奴而言，就唔係咁簡單。會話，人哋明就得，但考試就唔係咁，要complete sentence完整句子及文法正確，呢個牽涉到英語根底嘅問題，就好像詠春，我唔係睇你上面霹靂啪喇，而係睇你馬步是否扎實。

例如；Have you ever been to China（天朝）？

不能只答Yes或No，要完整句子及文法正確，人哋用現在完成式問，就要同樣時式回應，人哋用「擸手衝拳」，就用番同樣招數回應。

回答要用現在完成式：

Yes, I have been to China.

No, I have never been to China. 

HK學英文係文法、串字行先，所以讀得書嘅人，基本功都冇問題，但我呢啲讀唔到書嘅垃圾，英語根基唔扎實，問多幾問就出事，就好似齋黐手嘅詠春，一真打就出問題。

我知現在完成式係have/has再加past participle過去分詞，大部分都係加ed，如finished、decided，但許多重要動詞都係irregular不規則，如lost、done、written，一見真章就知龍與鳳！

所以考試係考功底，一係你功底好，人哋乜嘢武功、門派，一律唔怕，我呢啲笨友，唯有摸清對方套路、招數，預先熟練破解嘅招數，才能克敵制勝！不過如果「嬰國」提升要求至B2，就好似換上職業拳手，咁唯有走路了！

IB投資系列：人仲有乜嘢用？

 尾國軍力強大，對尾元霸權有密切關係，你只要夠強，就無人敢唔聽話…

這次尾軍在「萎耐萃喇」行動，不過是「項莊舞劍，意在沛公」，有兩個大國貸款和投資達170億及620億，肯定損失慘重！

投資環境益嚴峻，加上歷史告訴我們，債息倒掛九個月至兩年，就會出現崩盤，「魔根大桶」重注尾債，是否意味利息將大降？咁即係經濟將要崩盤？真係冇人知，我淨係知道現在嘅野已經唔係我哋可以預估，股、債、滙三者齊跌，甚麼經濟學也大跌眼鏡，可以跌到七彩，也可以軟著陸反彈。

AI及機械人發展迅速，生產成本嘅click位在人力，人類用蒸氣機、機器，已經令生產成本下降，倘若AI及機械人革命成功，生產速度加快，24小時運作，「馬屍黑」嘅機械人運作及維護成本只係幾尾元，主要係電力費用，如果有晚間儲能及太陽能，電費再平一點，加上全機械人運作，燈光、冷暖氣、厠所、休息室、飯堂一概不必，邊際生產成本接近零，物價平到你唔信，然而人類也發揮不了作用，也賺不到錢，今日AI工程師都失業，要送Pizza，明日送Pizza也會由機械人代替，唔好以為天方夜譚，全球最大電商「啊馬信」已大量用機械人取代人類，不出幾年已可無人化，如果我哋唔預早部署，粥水都冇得食！人類嘅價值係甚麼，也值得我們反思嘅問題。

（「王人芬」最新嘅晶片Rubin是食電怪，對比Blackwell差不多大一倍，對電力需求倍增，對電力相關股有利，但假設AI呢條橋仲可以玩落去！）

（這類股票要留意，但不是投資建議，各人要自己研究，再作定奪。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（343）自由空氣太貴

 一個人一生怎樣？在乎他怎樣審時度勢，六四走嘅人、九七走嘅人，都可能計錯數，今日我聽移英老師講，一些垃圾老師都可以做校長，証明留喺度嘅人，生活唔一定差，當然人也不一定睇錢或成就去衡量，價值取向也是重要。

稅務問題是我十分困擾嘅事，我已告訴教會不能奉獻，交稅交到破產咁滯。然而，得著牧師祈禱，這一關必定會過的。

每個人追求嘅野都唔一樣，今日要玩舊game，模擬器也可以，然而有人要求要舊嘅遊戲機、舊嘅遊戲帶、舊嘅電視，才可以原汁原味。

生活嘅要求也是一樣，我只要間中飲下茶、間中食下日本野，已經好滿足，要跟以前一樣係無可能，自由嘅空氣，從來不是免費，而且十分昂貴。

所以我都一直想，攞完UK，就去馬拉，因為兒子懶散慣，返HK死硬，一定要讀國際學校，才能適應。

IB投資系列：致富首重紀律

 面對大不列顛苛政重稅，日子還要走下去…

睇龍珠都知比達係悲情角色，即使怎樣努力，也只能做老二，永遠不能打敗孫悟空。但即使無能為力，仍要竭力爭取。這種精神嚟到大不列顛，尤其重要。

面對未來政策不明朗，仍要繼續報考英語考試，試前練習尤其重要，友人找到英文老師，去過她屋企一次，這次是視像，我哋學埋啲港式英語，聽本地人講，完全兩回事。一般溝通，文法差少少不緊要，但考試要計分，盡量要做足，例如UK，一定要加the UK，但China、Japan、France卻不要。

稅務問題未攪掂，但錢仍然要繼續賺，期權金賺11535講元。

我食粥？食飯？都係睇虛幣股，是否剔出MSCI指數及虛幣價格係關鍵。

（新車落地已經九折，貶值速度最快，買一些低里數，幾年嘅Approved Car係十分化算，致富非靠運氣，關鍵在於消費紀律。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

愛丁堡詠春：未來詠春必成垃圾

 如果我早點認識詠春，細細個便有機會跟「蝗公」，如果我早點學識投資，及早財務自由，有更多時間訓練，如果我早點知道用深蹲、臀橋練下裝，如果普遍巿民對功夫嘅認知增加，仆街師傅冇生意…

不過歷史沒有如果，學習及認知能力係需要時間歷練，即使我年輕時有高人教我投資，我太年輕也沒有足夠定力，即使我年輕時已學了至尊無上嘅武功，確實仆街師傅都唔敢開館，但可能打傷人、打死人，下半生也要在牢獄裏。

理想跟現實根本係兩回事，你有投資技巧，卻沒有定力，你有武術認知，身體卻跟不上，也是沒有意思。拳王泰臣嘅師傅卡斯達馬托，也只有寄望下一代去完成。

究竟純粹係賺錢？還是作育英才？宣傳上，個個都話「詠春傳正統，華夏振雄風」，實際個個都係掠水，就是有兩分功夫，也只不過以此呃神騙鬼，揸到你乾晒，都未攞到佢嗰兩分功夫，怎不教人失望！

真正嘅功夫，教咗你，自己練就可以，間唔中指點下就可以，又唔係要做世界拳王，只要界定清楚每一動作嘅要求，例如膀手，鎖骨與後臂成90度，㬹關節135度，手腕對著中線，任何人都可以做，那些所謂「師傅」束橋，你都可以知道！我都咁大個人，唔好當我傻啦！我每次都會記住大概嘅角度、高度、位置，次次所謂嘅「師傅」都係憑感覺，時高、時低、時長、時短，總言之你交夠幾年學費就差唔多，真係廢拉！

隨著AI及機械人普及，邊際生產成本接近零，所以任何產品及服務，價錢平到你唔信，不過唔代表「低奴」、「窮鬼」有好日子，因為絕大部分工作都唔需要人去做，人亦賺不到錢，賤物鬥窮人，真正富有仍是有錢佬。AI只需要輸入黐手及格鬥影片作訓練，只要訓練數據足夠，佢自己已可自動模擬對手作無限場打鬥，即使將AI機械人體力設定跟人類一樣，所有拳王、MMA冠軍、終極格鬥冠軍，全部短時間敗陣，詠春冇用㗎喇！功夫冇用㗎喇！所有唔服從統治者嘅人類，機械人唔需用刀槍，輕易將你們送到監牢。

(AI要入資料訓練，如果入埋呢啲詠春，戰鬥力當然有限。）

（唔知真傻定假傻，有自動駕駛、機械人的士，未來的士牌一個仙都唔值。）