如果你英文十分好，再學埋英國文學，當然係如虎添翼，更勝一籌。但如果你係我呢啲文盲低奴，但求B1考試過關，能夠永居、入藉，如果你叫我讀英國文學，咪玩喇！咁攪法，入藉也成問題。如果小朋友小學數學成績差，你叫佢做微積分，亂用重藥，虛不受補，只會加速死亡！
道理好簡單，係人都明，但放諸在功夫之上，所有師傅就立刻變成弱智，固然利令智昏，在利益面前，個個師傅甘願做低能仔又何妨，再者有比佢哋更低能嘅人，奉上錢去跟隨，能永續有人科水，一世做低能仔都願。當中更不乏飽讀詩書，更寫文章、出書，用科學力証所學，其實做科學研究嘅人，唔需要寫文章、出書，應該用實驗証明，唔係靠把口講，一試就知。
我以駕車做比喻，你架車係高性能車，入辛烷值高嘅汽油才有意義，一部「錢七」，入甚麼高性能汽油也沒意義，何況你都有眼見，甚麼準確詠春、正確詠春，盡是劣質汽油，正常人都俾佢攪壞…
（咁嘅詠春會有戰鬥力，我打死都唔信。）
有人話，人都死咗，唔好講咁多，以存口德。咁死了幾千萬人就可當冇事，咁讀歷史又有何用呢？擘馬、飛㬹、後傾…無所不用其極，學費就識收，但戲都費時做，即使注重少少，亦不過在黐手技術過度神化嘅擴張，甚麼招中有招，奇妙非常，我都被迷惑，如果一切街頭格鬥及衝突均以橋手反應作勝負，咁都算，最弊人人都以打倒對方為依歸，最後結果點，大家心照不宣。
黃公說：「勝利係目標，招式係手段，千萬不要本末倒置。」今日黐手競技，掂到對手就當贏，放在街頭打鬥，人哋唔會因為被你掂到就認輸，或者中了「飛機拳」就退縮，結果就敗陣不住。
（飛機拳打中人都無用，人哋如常攻擊。）功夫之道，要讓自己成為高性能汽車，甚麼改裝、調較就有意義，否則，在「錢七」身上，加定風翼、大包圍、死氣喉，都係浪費金錢，呃人就可以，實際功能卻沒有。
（如果所謂詠春師傅有咁盡心盡力，出晒汗咁訓練，今日詠春都不會如斯地步。懶惰嘅教練會教出拳王，我從來都未聽過。拳王泰臣嘅師傅一死，佢嘅拳就走晒樣，你話好嘅師傅幾緊要！）
沒有留言:
張貼留言