移英日記（64）搬屋辛酸

 新居沒有足夠傢俬，所以租金才會平，但要添置物資可沒有這麼方便，一係去大型家品店。

如不想花費太多，買二手也是十分普遍的事，通常在marketplace都會找到好野：

跟賣家傾好，一係約時間去攞，一係送埋俾你。

說時遲，那時快，個賣家更幫手搬，否則不知怎算了。個sofa只需40鎊，租盤不值得投資太多，夠住就可以了。

（隔離屋鄰居知我架車打柴，也幫我車一轉，總算人間有情。計埋早前螞蟻搬家式搬運，都搬了七成，因仍要在舊屋住到月尾，仍要保留一部分物資。）

（月租1100鎊，兩房兩厠，一大廳，最重要是有校區，兒子可讀90+讀寫數的小學。）

Honda思域，壞的時間多過揸的時間

 對於喜歡一樣事情的人，會傾盡一切去喜愛，即使有問題，亦覺得是樂趣，讓你發掘她另一面，這是很好的，因為愛佢好，亦要愛佢壞。但對於車而言，只不過代步的工具，以我們這級數的下等人所擁有的車連炫耀的功能也久奉，只求它生生性性，小點壞，就可以了。

自從上次壞極力子、飛輪以後，某資深汽車的弟兄向我保證，車是耐用品，整過的地方，已換上新零件，可涯好幾年，絕不會在同一個地方壞，上一手都換了不少野，故即使用了數百鎊，可以用幾年，計番條數，也很便宜，Approved Car或較新的車，都不代表唔會壞。

不過一齊試車十數分鐘，我發覺架車冇晒動力，開頭也以為自己揸得衰，但換了人去試都唔得，最後某弟兄溜後泊至路邊，才知前軸幹斷了，一定要拖車，AA來救車，兩間車房都唔收，可能車舊冇零件，最後拖了去最大嗰間，之後致電要三個月後才有零件，還要八百幾鎊。

某弟兄建議我自己上網買零件，才找整車佬裝，冇咁嬲，一定平過八百幾鎊。

條軸Driveshaft 105.99鎊，找整車佬百零鎊，確實是精打細算的玩法，跟住某弟兄再約多個弟兄，黎一招「老漢推車」，將車推離車房，去到路邊，再約整車佬。

某弟兄駕車廿多年，佢話Driveshaft 斷根本冇可能，架車打柴，條野都唔會斷。就好似上次極力子壞，飛輪要換埋都係冇可能，柴油車就會，但事實這些事卻發生在我身上，某弟兄廿幾年駕車經驗及專門知識不會是假，但我個人主觀經驗也是真的，幾個月，壞多過揸，仲貴過租車，牌費、燕梳也要照俾，最慘是沒完沒了，自己又有工作，十分困身、疲勞，真係唔想放假仲要為架車的事繁忙。

（AA拖車，拖到爆埋軚，要準備埋個後備軚更換。）

（正所謂：「大雞唔食細米」，如果我地這些行外人都可輕易買到零件，為何大車房要三個月，真係要由日本Honda訂貨再運過來？零件百零鎊、裝工百零鎊，大車房收四百鎊，我都算，收八百多鎊，是要我知難而退，大公司不能說唔整、唔識整的。）

移英日記（63）又要搬屋了

 由漁村搬到大不列顛的愛丁堡，由「疏聲A準」用了1500鎊代價，千里租樓，讓我們一落地，就有居所，唔使租Airbnb，奈何沒有校區，小學不太差，我都接受，但會直升至較差的中學。

雖然我們已申請候補心儀小學，但最後不成功，唯有使出超必殺技，以新移民言語不通、又是細B等理由延期一年入小學，今日收到Council信，批準延期，免費多一年Nursery，同步也搵租盤，已經找到，並同時今日去地產代理俾錢及攞鎖匙，可謂雙喜臨門。

由semidetached搬到flat，有花園變冇花園，雖然好似降格，但冇校區根本係冇意思，再者以往租金1350鎊，現在減至1100鎊，經濟壓力也減輕一點，絕對是好事，一個月省2500港幣，一年省30000港幣，而且每樣屋也住過，也深入了解，對日後置業也有幫助。

（黎到英國，不為兒女讀書，唔通貪這裡夠凍麼？）

（有些學校，讀、寫、數均達90%+，成績相當好。）

（認識入學原則及方法，才是成功之道。）

移英日記（62) Ridacard縱橫愛丁堡

 由於返工，架車又長期壞，巿中心也難免費泊位，局住日日撘巴士，這裡主要由一間公司經營，收費也不便宜，每日來回要3.6鎊（約34港元），所以預計會長撘，就不如出張Ridacard。

要出巴士咭，要去巴士公司指定的三個地點辦理，俾個名、出生日期及俾錢，即時影相出咭，全程都係數分鐘。

Ridacard出咭手續費3鎊，有分一星期（20鎊）、四星期（60鎊）、一年（600鎊），亦可選擇自動轉帳充值月咭（56鎊），但要手續費25鎊。詳請可去巴士公司網頁：www.lothianbuses.co.uk/ridacard

我就選擇了四星期巴士票，因份工唔知做得長唔長，加埋出咭費3鎊，合共63鎊。日後要增值一星期或四星期票，不必下下去巴士辦事處，去paypoint增值即可。詳情可看：www.paypoint.com

一張咭，可無限任撘Lothian巴士、Airlink機場快線、Trams輕鐵，如果有朋友黎愛丁堡玩，帶佢出張星期票，去那裡也沒問題。

移英日記（61）Portobello

 工作放假，去到愛丁堡東部的Portobello，某弟兄家中聚會，漁村人走埋一齊，圍爐取暖，互相支持，尤其重要。

Portobello見到海，又有沙灘，地理位置一流，好像漁村的西貢，某弟兄租住的單位(Flat)，屬於新樓，三房兩廳，除了房較大，廳跟漁村差不多，租金港紙約一萬五千元，居住面積這裡是較細，勉強容納三個家庭，一齊去下公園、食下中式食物，甚是溫暖。

傾談間，每個人來到英國，原因也有異，但至少為自己或下一代多一個選擇，並不是因為十分喜歡英國的戀殖情結，這是大家清楚不過的事，將來退休去那裡？到時才算，子女讀完書，去那裡發展，隨他決定吧！今日作出移民決定，將來才有選擇機會。

（Portobello見到海，又有沙灘，許多遊客，買杯熱飲或小食，甚是寫意，投資物業放租俾遊客，倒是可以，只是旅遊有淡旺季之分，有的人寧願長租，有更穩定收入。）

（這裡有公園，景色也是美麗。）

（喂下鴨仔、鳥兒，小朋友倒是十分開心。）

移英日記（六十）英國工作不易

 英國脫歐，自身難保，其中勞動力更成一大缺口，這些工作，本土英國人都唔做，所以雖然肯定有工做，但不代表好做。雖然肯定出糧，但不會賺大錢，只得最低工資9.5鎊一小時或多一點，博士都係去工廠整餅，校長都係執房，真係絕無誇張，始終唔係自己主場，冇辦法。最近知道校長做到教學助理，已經笑晒咁口，可以做番自己專長，但已經不知降了幾多級了。

好多人唔明點解咁笨，有皇帝唔做，做乞衣。如果仍有人問這個問題，証明有些事漁村是看不到，我在大不列顛一樣可看漁村的新聞，但許多事係沒有報導，例如美帝對今上的批評，冇傳媒敢報導，如果資訊不完全，是冇辦法對大局作出判斷，對這些small pink係沒有討論空間，有些人比你我還清醒，攞盡著數，甘心為「正拳」效力，為「正拳」涂脂抺粉，相對之下，用勞力賺錢有甚麼值得批評地方？

（某些地方，大學生可能都要務農，唔一定可做自己專業工作。）

英國人做野係hea，工作辛苦有限，但這些工作永遠由本地人霸晒，新移民永遠只能做英國人唔做的工作，即係所謂下攔野，攞最低工資9.5鎊左右，工作辛苦、沉悶，莫說我地低學歷、低技術，就算高學歷、高技術，也優先請本地人，任何地方也是一樣。

其實靠自己勞力賺錢養活自己及家人，冇人可以睇唔起，又唔係乞食，又唔係靠政府，又唔係作奸犯科，反之，我還有能力做十一奉獻、提一點錢，隨時按感動幫助人，最重要係你自己點睇自己。

移英日記（五九）英國有排衰

 大不列顛人經歷高息、高通脹、經濟衰退，開始後悔脫歐了。有一次「歪芺」叫我買蕃茄，去到超巿竟然沒有，勉強還有一盒有機蕃茄，比較貴，又不太靚，局住買，如果還在歐盟，商人早早已運來了。

俄烏戰爭本來對歐洲大陸影響比較大，英國能源入口只佔幾個%，但點解歐洲各國今年經濟已復甦，英國反而退衰呢？因為歐盟集合去買液態天然氣、石油，可用東歐勞動力，用德國科技，互保不足。反觀英國有工冇人做，有人冇工做，經濟點會起呢？

之前農作物沒有人收割，損失難以估計，沒有東歐勞動力，各行各業也難運作。我以我自己親身工作說明，執房係冇英國人做的，上司又好似西班牙人，同事有巴基斯坦人、烏克蘭人、東歐大媽等，總言之冇英國人，因為工作辛苦，冇停冇休息，趕住做，中間半小時食飯，落得去得15至20分鐘，食都消化唔到，跟住又趕，5.5小時要執18間房或以上，冇可能準時收工，英國人準時收工，根本不會做這些工作。房未執好，點租俾人，有錢都賺唔到，唔衰退才奇！放在其他行業也是一樣，下攔野冇人做，無法100%運作。

我都想緊繼續做唔做，計番港紙每月一萬幾千，雖然最低工資比漁村高一倍，工時也較短，不過迫你用效率平番條數，20分鐘做一間房，鏡、玻璃要完全冇水漬，銀色的要「靚立立」，床鋪要平、直、順，摩打手慘過練詠春，辛苦過漁村「屎畏沙」洗厠所，或者我這些經歷，就好像以色列人出埃及，走曠野之路，上帝苦待以色列人，看他們是否肯守戒命，四十日走完的路，足足行了四十年，神人摩西也衰了一次，令他不能到應許地。

（英國長期處於下遊，要重拾大不列顛光輝，恐怕不太可能。）