移英日記（167）選民被重視

 臨近英國大選，選民開始感受到被重視嘅感覺，這是漁村「完善」選舉制度所失落，有人親自送信，信件係親筆書寫…

回想對上一次收到親筆信件，已是中學年代，真係好誇張，使唔使咁認真啊！

對於已日落帝國，已經不可能再強起來，人民只不過希望日子過得容易，通脹嚴重，如果肥波領導，保守黨重有機會，廢柴辛偉誠要續任首相，真係難過登天，工黨重新執政，只是回應人民求變心切，係咪有效管治，令大不列顛重現生機，仍未可知。

（以民調所見，工黨要輸也難了。）

（某些地方投票率極低，巿民覺得投票冇用。）

IB投資系列：俾錢攞貼士正戇居

 常言道：「人不為己，天誅地滅」，假使我知道六合彩嘅號碼，會告訴你讓更多人分薄個奬金嗎？如果你要逃命，但講俾更多人知，會減少你求生嘅機會，你都會自己走先，你可以話係自私，但亦係人性。

所以任何投資嘅野，一係你無私告訴我，YouTube 賺錢就算，我用VPN都唔使睇廣告（將地域改在阿爾巴尼亞即可），對我冇影響，如果要披闖課金，聽甚麼堅野，精闢嘅分析，咁我就覺得大可不必，大家都係估估下，好像賭徒以前買馬經、今日面書買貼士，都係多餘，馬房、馬主、練馬師一早有共識俾邊個出就邊個出，就算你相馬能力好像伯樂，都係冇用，股巿也是一樣，幕後玩家要升就升，要跌就跌，唔係你話事，只不過我哋根據過往歷史，妄想預測幕後玩家嘅做法及喜惡，預早作出部署。

（幕後玩家嘅心思，唔係我哋凡人可以識透，最初我以為拜登會退位俾賀錦麗，最終冇咁做。）

以前教我經濟學嘅老師，佢都話成日輸錢，經濟學只不過以果推因，用過往歷史推敲因由，作出預測，但準確度也不高。就算做過投行，以前幾威也好，冇了背後強勁嘅backup及資訊，都變回凡人，既然大家都係凡人，都係同一個level，有野就講，有屁就放，大家分享、交流，ok冇問題，要俾錢就No way。

幕後玩家，第八層嘅人（The 8 show嘅分法），唔會喺呢度出現，佢地嘅財富遠超嗰啲世界首富，你永唔會知道佢地姓甚名誰，網上、資訊世界嘅野只係愚弄你哋這些低下階層，辛辛苦苦為佢地賣命。

所以公開得嘅野，如果係堅野，一定有以下條件發生：分享不會分薄利益，分享不會減少生存及逃生機率。所以網上嘅野，無論俾錢或免費，都唔會係堅野，包括我講嘅一切。

（我都係賺一千蚊左右，正一窮鬼。有人換車、換樓、換名錶，快啲跟佢學，披闖攞貼士…戇居！炒股票唔會一定贏，但披闖課金就一定堅，就好像美國淘金唔一定淘到，故醒目的生意人就不會淘金，而係賣淘金設備、牛仔褲，因為賺這些錢就一定堅。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：攞貼士唔會發達

 成日講冧巿，但遲遲未發生，成日講牛尾，講咗半年都未發生，確實令人奄悶，正所謂：「阻人發達，猶如殺人父母」，這讓我明白聖經中挪亞嘅光景，一路建方舟，一路宣講要人悔改，神的審判會嚟到，要進入方舟，才得救贖。當時間一長，人就會傾向不信，眼見人人買樓、買車、買名錶，你自己僅僅自保，係幾冇癮！我明嘅！

炒股票最難係按照既定嘅原則做事，你係人海咁多年，即使最唔識做人，好似我咁，都會知道生存嘅方法。股海也是一樣，高風險高回報，低風險低回報，道理好清楚，如果有絕對嘅把握，善於操盤嘅人何需要拍YouTube？要想出下名，show下自己幾叻，都明嘅，又要人撳鐘仔、俾讚、留言、披闖課金…

（真正勁人，根本不在乎Youtube嘅錢，會用番啲錢攪制作及攪遊戲派錢，最緊要出名。）

俾錢攞貼士最無聊，人人都係估估下，試想下：如果你係第八層嘅人，「譜驚」跟你說會做大單野，你會點做？你都會做晒所有沽空操作，然後才會跟你第七層嘅朋友分享，每次大跌巿，佢地都發財，你認為呢啲資訊會分享俾下等人嗎？呢啲價值億兆嘅資訊會因披闖少少錢話俾你知麼？練馬師、馬主有堅料，都唔會話俾你哋呢啲下等人。

披闖課金會發達？做人唔好咁天真啦！全部都係我哋這些下等人估估下，隨口噏當秘笈，鄉講人幫鄉講人？我呸！我在大不列顛最深切體會：鄉講人專呃鄉講人，幫人睇樓收1000蚊，咁叫做交易，唔係幫。有的又話幫鄉講人置業，點佢買日本虎杖樓，一鋪清袋…

（「鷹屍」物業專幫鄉講人置業，認住呢條友。）

公開嘅資訊係冇專家，只有撞板過嘅人嘅經驗之談，嗰啲經濟師、專家，咁掂就唔使講，自己all in發咗達好耐，上電台、電視台、YouTube講到口水都乾埋…使鬼咁辛苦咩？有的更說三、四萬點，講出嚟自己都唔信，我只會叫人避險，唔可以令你發達，真係抱歉，要發都自己發咗先，咁簡單道理都唔明，YouTube 100萬view先得五皮，肯冒險、有少少常識、識炒美股都一定賺到，牛巿嘅時候個個都賺幾皮，倒不如花時間研究下仲實際。

（我都係賺1918元咋！咁易發達，做人唔好咁天真。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（166）英國生活要適應

 正所謂：「一樣米養百樣人」，移英講人，每一個人也有佢哋嘅故事，做倉又好，執房又好，炒股又好，又唔係去偷、去搶，又報足稅，合情、合法、合理，有甚麼被人睇唔起呢！最睇唔起人永遠係鄉講人自己。

讀幾多書又如何？好巴閉麼？餐廳嘅侍應何嘗唔係大學生，這裡藍領薪水比白領高，只因我們係新移民，永遠起步係攞最低工資，如果做IT等絕對可以跟本地人同工同酬。

（天朝經濟崩潰，幾高學歷一樣沒有工作，有的人甚至放棄讀大學，去送外賣，也是悲歌。）

這裡最大娛樂係睇Netflix韓劇，嗰套皇冠，都係好戲，讓我們認識英國皇室，但顯然吸引力不及韓劇，睇了幾套韓劇都睇唔完一個系列嘅皇冠。

又或者去下郊野地區…

跟小朋友去下公園…

不同地方嘅玩法係唔同嘅，這裡係欠咗以前嘅飲飲食食，有待家中「歪芺」廚藝升級才能改善。

去唔到泰國、日本、台灣，可以去歐洲，仲高級！不過說實話我寧可選擇前者，睇古老建築、教堂等文化野，對於低文化嘅我，仍要適應。

IB投資系列：各有前因莫羨人

 繼早前有人賺了一間英國樓，跟住又有人賺到架名車，咁又如何？

鋪王波叔留下七、八百億遺產，子孫打跛腳都唔使憂，現在輸突，資不抵債，你會羨慕嗎？

我現在不過租英國樓住，揸日本車，賺嗰雞碎咁少，人哋買樓、買車、買名錶…但係，假使這一刻所有股票價值變為零，我嘅生活係不會改變，唔使瞓街、行路，亦唔需要改住治安差嘅平區、換部錢七…因為五分之三都係現金，美元、英鎊、日圓、坡紙、港紙。

波叔可以成功，因為冒險，子孫仆街，因為繼續冒險。高槓桿高風險投資，只有在樓巿不住上升，才能成立，一旦逆轉，立刻仆街。

冒險嘅事，被迫為之，偶有為之，可以理解，經常使用，死期必到。講得冒險，就是成功率低嘅事，九死一生，如果你工作，九成都出唔到糧，你重會做嗎？當然打死都唔做，咁點解當年波叔會搏？因為漁村樓巿升多跌少，即使跌少少調整，最後都會升番，成功率較高，回報又驚人，當然值得去搏。現在漁村結構性環境已改變，而且可能無法逆轉，再不收手，一定自取其亡。

美股也是一樣，牛巿當旺，我也借日圓買美元、美股，槓桿投資，賺錢更多，因為牛巿，升多跌少，機會率高，值得去搏。現在已經牛尾，我都一早還晒日圓，去槓桿化，變賣股票，轉持現金，等佢冧巿，現在唔係搏嘅時候，投資必須審慎。

好像搏擊，要抬高拳套，護住個頭，保命要緊，失少少點數，錯過Nvidia破頂，唔緊要，間唔中出一下刺拳，快速收回成防禦姿態，拳賽有排都未完，要繼續站在擂台，待對方氣力不繼，露出破綻，使出致命一擊，然後可以圖也！

（今日賺2324港元，185美元揸，191美元沽。我這些二打六嘅三流交易員都賺到錢，我絕不懷疑有人贏到層樓，贏到架車，但小注可以，大注切勿。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：賺到錢就係好投資

 許多人認為正規嘅投資係睇財務報表、圖表分析之類…炒即日鮮、短炒係旁門左道、係異端，不受正道中人所尊重，要知道投資係為咗乜嘢？唔係玩遊戲，係賺錢，許多講人為炒美股，犧牲睡覺時間，影響埋日頭份工及健康，最後都係得個吉，我想問下為咗乜嘢？

(炒美股，買埋啲「畏來」、「褲涂」等天朝股，又或者GameStop等妖股，唔死都冇用，不如買重人壽保險，準備隨時跳樓好過。我即使短炒，也會買好嘅股票，進可攻、退可守，賣唔出，keep住都冇問題。）

就好像學詠春，當然係為咗打交可以贏，贏唔到都可以自保，要甚麼正規嘅招數、手法，拳要用拳嘅正前方去打，由自己嘅中線打去敵人，才是正宗日字衝拳…你叫啲詠春師傅食屎吧！

就好像我年輕時都曾在社區嘅野雞學院，學過企業管理、工商管理，當然唔同大學嘅，但去到實際環境，永遠係隨機應變，好像當年在某快餐集團工作，那時分店冇生意，公司推嘅產品唔得，咪用分店嘅食材，一晚出七個即炒粉面飯，干炒牛河、楊洲炒飯、菜遠肉片飯、芙蓉蛋飯…不知幾好生意，點知俾區域經理插到七彩，你自己開檔做生意呀，如果你間鋪大旺，間間鋪唔掂，人地一查數據，知道並非公司推廣產品嘅成功，咁即係反証上面班友廢嘅！你會有甚麼好結果？最後我呢啲人當然做炮灰，成為權鬥下嘅犧牲品，咁點解企管課程冇教權鬥？呢啲陰濕嘢點上大雅之堂呢？如果個講師有料，你又同佢friend，私底下食飯就會醒你幾招，否則在講壇，一概不談。韓非被李斯害死，係權術不及李斯，並非法家學問嘅優劣。

勝利係目標，招式只不過係手段，千萬不要本末倒置。街頭搏擊係咁，投資也是一樣，唔理黑貓定白貓，只要促到老鼠就係好貓，唔理甚麼詠春，只要打倒人就是好詠春，唔理投資甚麼，只要賺到錢就是好投資（要合法）。

(Dell電腦，我都唔需要介紹，以前在漁村都透過直銷售賣，不會在百老匯、豐澤見到，Dell值這個價，因為佢有份參與馬斯克嘅xAI。今日賺764港元，想發達唔係買50股，係500股，但唔需要咁冒險，賺夠茶錢咁可以了，佢已升了，分分鐘摸頂入市，不能冒險。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：唔係你財唔入你袋

 我在網上聽過黃仁勳嘅講話，佢英文講得極快，加上我英文水皮，根本聽唔到。講野講得極快，又有條理，即係轉數快，佢嘅管理團隊有60人，直接向佢滙報，咁佢處理能力都極高，難怪英偉達（NVDA)升到破頂。

我也曾經投資投資這股票，但危機股價下跌就放晒，每次升到破頂都怕摸頂入市，最終都冇買過，真係唔係你財唔入你袋。

算吧！我都唔係做大事嘅人，何必強求。大錢就賺唔到，小錢倒是賺到的。

某電車我已賣晒800股，等唔到佢出勁野，避免股巿隨時崩盤，好像我早前沽晒台積電，然後佢升至破頂，歷史可能會重複發生。現在買番50股，少少玩下，180揸，186沽，賺6美元，50股即300美元，扣除IB買賣手續費各1美元，淨賺298美元，即2324港元，每個交易日賺少少茶錢就可以了。

所以股巿興旺，我喺英國唔做嘢，因為白交IHS、Pension，半年返工交兩萬稅，唔化算，炒股扣稅，我當打個八折，OK夠生活就算，早前教會要清潔、維修，時間許可，我也會參與，人生苦短，做啲有意義嘅事仲好。

你話我長氣都係咁講，而家唔係搏嘅時候，小炒怡情、大賭亂性，玩下係冇問題，只要你買嘅野，價值變做零，對你生活絲毫唔會受影響，就可以了。

（重有12日上郵輪，炒股係完全唔會影響心情，買了上網計劃，繼續炒，幫補下。下星期二會自駕遊去布里斯托、雷丁，然後再去修咸頓上船。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

詠春要妥協就難維持尊嚴，其實做人也一樣

 我有一次練功，忽發其想，放一個膠水樽，用side kick踢過去，位置是準確的，但竟然踢唔跌個水樽，第二次都唔得，原來以往訓練有數，隻腳伸盡剛好有少少距離，永遠唔會踢到。

這套功法，教拳真係一流，永遠唔會打倒徒弟，又能完美示範，就好像以前空手道嘅「吋止」，出拳打在對手身上，保持一吋距離，就當打到得分，這套規則原意係好，大家練習不會傷到對方，但後遺症也不少，真人慣性也留手，距離太遠，拳也無力，我地都知，出拳要幻想打穿對方身體，唔係保持一吋距離，或掂到當打到，冇用㗎！

詠春黐手訓練也有同樣問題，掂到當打到，主要係訓練你橋手反應，如果有其他訓練配合，問題係不大，然而黐手佔了九成時間，其餘一成係套路，都係遠離實戰嘅訓練，怎可能打交有用呢？

我知道講呢啲野，傳統詠春老屎忽一定唔鐘意，我亦知道教真拳係搵唔到食，要有泰臣教練嘅嚴格才能教出一代拳王，試問有幾多人真係肯接受艱苦嘅訓練呢？許多人學拳，不過滿足自己小小求知欲、小小虛榮感，如果早知咁辛苦，寧願唔學了，人就係咁現實，以前詠春拳館，擂台搏擊係必修，後來都冇晒了，面對現實，咁趕客法，自取其亡，食屎咩，做生意，一定係投其所好，佢地要虛榮，咪俾虛榮佢，嘩黐手好勁啊！黐得開心咪繼續俾學費，師傅繼續搵真銀，佢地係咪學到真功夫，根本不重要。

唔係個個都似我咁瀟灑，鐘意教就教，唔鐘意教就唔教，以前有個後生仔話想學詠春，是一名學生，我咪免費教佢，但次次都遲到，係公園教，又介意人睇到，要去到好遠，公園個個人都做各式運動、武術，詠春真係咁羞恥麼？最後我就選擇唔教了，我又唔係靠詠春搵食，重可以有少少堅持，重有少少風骨，倘若你要靠詠春食飯，連功夫僅有嘅堅持、尊嚴都冇晒，詠春也變為垃圾。

IB投資系列：美股即日鮮

 以前在漁村有爛樓自住，一個人賺錢，三人食飯，完全冇問題，重有錢儲，買下股票，十分風流。

嚟到大不列顛，真係人都顛，通脹十幾個%，租金升得勁，能源費又貴，股票下跌時曾工作，又要扣稅、又要扣IHS、又要扣Pension，做半年已交兩皮稅，股巿升番即刻唔做，唔係懶惰，而係根本唔值，一則IHS我地移英已俾了五年，再俾冇意思，二則pension要供十年才會有，睇個勢都係白供。

倒不如炒下股，即使交稅，也唔使白供IHS及pension，條氣順啲。現在小注小注玩下就可以，只要買了嘅股票，即使價值跌到零，對你也是絲毫無損，就可以了。

即日鮮係乜？炒過港股都知，不必多作介紹，不過美股交易費低，更有利可圖。每個交易日，賺幾百蚊又好，一千幾百又好，積少成多，以前喺地盤做老雜，八舊水，一個月有兩皮，撘架有千二蚊，一個月有三皮，即日鮮道理也是一樣，昨日賺2250元，今日賺763元，有時冇錢賺，再有利息包底，一個月賺兩至三皮，夠英國生活了！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

英國車一定要加追蹤器

 最近我收到移英講人失車消息…

這是一架四年嘅凌志，果然係醒目嘅「鄉講人」，不受盲毛影響，又話：「嚟到歐洲，梗係買歐洲車」，買歐洲車都唔係錯，最重要自己有獨立思考能力。

這個世界，係冇偷唔到嘅車，你只要唔買巿場最受歡迎嘅車，已經較安全，再加裝一定保安裝置，在取易不取難條件下，再安全多一點，不過所有防禦，只能防君子，不能防小人，就好像學詠春，人地用武器、群抽、使橫手，你已經冇得玩了，正如一切保安裝置，只係令賊人偷車用多一點時間，並不能阻止這件事發生。

我再三提醒移英講人，一定要裝追蹤器，賊人唔會亦不可能立刻運走架車，醒目嘅賊亦不會將架車泊在賊竇或運走架車嘅碼頭，以防被追蹤，一網打盡，所以一定泊在偏僻地方一段時間，冇人去追蹤，然後才做野，所以架車一被偷，立即找個Friend駕車幫你，即日找回駕車返家。

關鍵是追蹤器擺放位置，始終唔係德國三大品牌嘅高級型號，拆唔走，或十分麻煩。偽裝成鎖匙扣掛在車上，或者好似我架車嘅fuse box，其中一個很少fuse，有空位擺放，由於放電子野，一定防水，偷車賊一定唔會打開車頭蓋檢查，可保平安。

IB投資系列：冇價值嘅野，幾平都唔會買

 新能源車，永遠係cap水嘅最好辦法。政府要出錢資助，人們要俾更貴嘅價錢。但唔代表造車就會賺錢，因為要大規模生產，才可降低生產成本，一日做唔到量產，一日都要蝕錢。

如果一個企業嘅創立，源於一個騙局，希望借環保嘅勢頭，藉著上巿賺錢，創辦人都被判詐騙，當日嘅卡車也是由斜波滑下來，咁繼任嘅CEO真係可以排除萬難，戲假成真麼？

創辦人一開始就冇心造車，全架車大部分都是零件都是外判，將巿場有嘅野左拼右貼，就當造了車，而且從未打算大量生產，只求出到個產品，呃到人投資，但當資金用到七七八八，公司重可以涯到幾耐呢？

股價跌至0.33元，歷史新低，這類股票也不宜沾手。

Nikola Tesla是出色科學家，其絕密技術，更被美帝據為己有，拒絕公開，今鋪真係俾佢整衰晒！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：雞碎都唔放過

 現時放晒某電車，內心好平安…

總資產都沒有大波動，持有大量現金，處於防守狀態，小注短炒可以，重鎚出擊免問。

INTC原先我打算俾機會佢，但後來醜聞出現…

咁攪法，英特爾都有排衰，無謂搏！31元放晒。賺雞碎咁少都好，幫補家計，20個月移英用了1球（100萬港元），多少錢都照殺，今日幾個trade賺2250港元，好過冇。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（165）20個月用了一球（100萬）

 移英不知不覺差不多兩年，已經20個月，粗略估記已用了一球，真係冇誇張。

屋租每月皮一，巿政租Council tax一年兩皮幾，每月兩千幾，單單住屋就皮三幾，連埋生活費，兩皮半冇走雞，20個月，半球，50皮。車20皮、每年旅遊5皮，兩年10皮，移英所有費用及雜費20皮，合共1球（100萬港元）。

（郵輪假期兩皮幾，於修咸頓book個車位一星期都要125鎊，自駕遊嘅油錢、酒店費用…。）

我都不住反思，係咪太浪費呢？一家基本生活費兩皮半，都減不了幾多，租及巿政稅都佔過半，省不了。車最初是「錢七」，只不過1700鎊，但整車及過Mot又整，都等同車價了，為了安全及英語不佳，交流發電機「打南磨」都講唔到，很難形容到架車嘅問題及專用述語，買approved car是穩妥做法，我想唔到點解要用自己及家人嘅命去搏呢？

至於每年旅遊預算，要遷就小朋友暑假，旺季出發冇得平，單單返漁村來回機票，三人都要三皮，用兩皮消費唔算多，因為許多野英國沒有，至於隔年嘅歐遊，最多縮皮變本地自駕遊，駕轉去格拉斯哥，即日來回？又或者野外紮營？慳唔到幾多。

與其節流，不如開源，YouTube 100萬view可以賺5皮，即係每月要做10部片，每部10萬view，確實唔容易，移英話題講到爛晒，詠春功夫玩到垃圾化，投資咁多「百萬富翁」、前投行、前經濟師、前講師、前學者、類似Coco哥呢啲口水佬，我這些二打六，再塞入去，根本係浪費時間，倒不如專心投資好過。

（功夫係天朝人、漁村人玩臭晒，唔係別人唱衰。）

（就係呢啲功夫片唧美化，有啲功夫傻佬真係以為可打敗泰臣，最後求其找個業餘拳手都打唔贏。）

IB投資系列：小心睇路

 當睇到以下事情，經濟將出現衰退，小心睇路…

（倒掛出現6至24個月，便要留意。）

（大戶退巿，轉持大量現金。）

以前漁村要睇誠哥個頭投資，誠哥說：「山雨欲來風滿樓」，重唔醒目散水，大戶由於資產雄厚，走資需時，往往未到最高位就要走，散戶往往可玩多一陣，但切記懂得走人，漁村攪成咁，由溫水煮蛙，變成大火燒，識跳都走晒，俾晒信號你走，仲樂不思蜀麼？

等到變了地獄，就變得困難，要走也不容易。

末世嘅時候，會有假先知迷惑眾人。股巿都有妖孽，迷惑眾人，又話天朝經濟會強，天朝幣會強，單單這兩點，最淡都3萬點，2024年彈至4萬點，股票係睇未來，唔係睇𠵱家…呢啲人不過係小丑，唔死都冇用。商家佬話：「人人處身地獄」，某大師話：「彈至4萬點」，你信邊個？

不會人人處身地獄，只有未有配置資產嘅人，才會面對困境。變賣資產，變為現金，10萬美元放在IB，可取得4.83%活期利息，買短期美債有五厘鬆少少，綁你三個月，崩盤都唔會死，隔岸觀火即可，小注買下冇問題，保持巿場觸覺，迫自己睇住個巿，贏唔會發達，輸也唔會破產。

（小注買下，短炒賺幾舊水茶錢即可，這個時候唔需要搏。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：水退才知邊個冇著褲

 今日賣埋某電車所有持股，資產五分之三都係現金，其餘都係收息基金、債劵、REITs 等。

面對巿場嘅不確定性，氣氛熾熱，某些人已賺到一間英國樓，確實所言不虛，普普通通巿民都賺幾皮，股價過高，巿盈率高得離譜，脫離現實，最終股票價值都會回復真實價值，出現崩盤，水退才知邊個冇著褲。

歷史俾人類嘅教訓，就是人類從沒有吸取教訓，聖經士師記，以色列人犯罪得罪神，遭到外族欺凌，尋求神拯救，神興起士師帶領以色列人戰勝外族，得享太平。跟著以色列人又再犯罪…歷史都係重重複複發生。

從圖表可見，只要夠長命，持有可靠嘅資產，最終也是升的，因為各國印銀紙，錢嘅購買力只會越來越低，資產才能保值。如果在沙士時買了漁村樓，即使今日樓巿跌到一扑一碌，你都仍然冇事，施施然離場也可以，問題是危機發生時，你是否擁有充足現金買平貨。

 （漁村係悲歌，但往事只能回味。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。