IB投資系列：走資

 面對世局嘅不穩…

本來諗住涯埋個復活節假期才入油，都要排隊去油站入油，以前剩返一格油，打爆個油缸，都唔使40鎊，現在兩格油，打爆個油缸，竟要41.23鎊，真係時勢艱難。

正所謂「一鳥在手，勝過兩鳥在林」，在「歪芺」催促下，急急由IB電滙5萬鎊。

嗱嗱臨過兩萬鎊俾「歪芺」，塞住佢把口。主要是用在新財政年度，每人可注資兩萬鎊至免稅投資ISA戶口，另外一萬鎊作交稅準備，真係冇誇張，這裡保護費特別貴。

尾股Strategy跌到阿媽都唔認得，幾乎要敗走嬰淪，減持蝕了成球，解決了稅務危機，另一半未實現盈虧也蝕不少，慘過弟弟！

未來虛幣大約只值七萬幾，沒有十二萬，我都好難翻身。只有靠賣期權吊鹽水，暫時未死得！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（370）窮人生活

 理論與實踐係兩種東西，有些人可以做銀行家，賺很多錢，但對理財一竅不通，一旦收入減少或辭退，立刻出現問題。

「大魔」係數一數二嘅投資銀行，做到咁高級，才華、能力不必懷疑，但一旦冇咗份工，維修熱水爐也冇錢要眾籌。失業對普通人確實是困境，但作為銀行家，連一年流動資金都冇？股票、債券、基金都冇？要好像乞丐咁眾籌嗎？

AI工程師，裁員咪去送Pizza，有甚麼高不成、低不就？馬死落地行，沒有工作，甚麼也要做，沒有收入，就要減少支出，我最睇唔起係那些失去厚職、或冇錢，卻仍然要堅持自己生活質素嘅人，呢啲人係抵死！就算跳樓都唔值得去可憐！

我哋移英二等公民，嚴格上公民也談不上，只是苦寒之地嘅窮鬼，甚麼也要慳。

Tesco超巿特價，全部一鎊唔使，0.75鎊。

Lidl超巿，也買特價野。

Spring Onions三棵只需0.21鎊，Carrots只需0.04鎊。

咁都未夠慳，仲要種埋，自食其力。

除了一定用超巿會員資格去購物，更要用Coupon。

出面打緊扙，大家都知道，油價係咁升，大家都知道，這個時間仲唔節衣縮食仲可以點做呢？本來嚟緊復活節假期唔使返學，涯到打完扙才入油，點知俾了保護費嘅油王不肯罷休，尾帝局住打下去，友人復活節假期又話駕車至較遠處有活動，兩個星期喺屋企都唔係辦法，放假最頭痕，唔入油都唔得！

商家佬一定加快減慢，賺取最大收益，壓榨窮人。但我們使錢卻是加快減慢，試問點樣適應呢？一定會週轉不靈。

IB投資系列：大陰謀

 巿場並非認為AI無前途，而是不再相信AI股能無止境維持極高增長與極高估值。業績好，但股價下跌，反映巿場質疑資本巨額開支嘅盈利能力。但這疑慮不足以令尾股步入熊巿，問題係尾衣戰爭是否延續？

經濟差卻高通脹，這是幕後玩家嘅超必殺技，經濟差，物價不減反加，超級割韭菜，你點都要死，你唔投資，要死。你投資，股票跌，要死。你揸現金，超級通脹，要死。你買黃金，黃金也跌，一樣要死。

究竟點樣可以死得冇咁慘？就是買尾債。鵝污戰爭攪勾洲，尾衣戰爭攪阿洲，這世上唯有「尾利堅」最安全，尾元最安全，尾債最安全。這也是世界要打扙嘅理由。

咁買尾債就可慘勝麼？咁又太天真了，死始終要死，只不過斬首死，死得瀟灑，定係腰斬死，痛不欲生，個巿死到咁上下，再印銀紙，溝淡你嘅價值，名為刺激經濟，實際係要還嘅錢貶值，減低財政負擔。股神「爸飛突」係老狐狸，只買短債，佢早知尾元要落地獄，等巿場崩盤，賤價買入股票，然後才可以浴火重生。

（「同人唔同命同遮唔同柄」，人哋打扙勁賺錢，我哋蝕到仆街。）

（本星期賣了14張期權，賺1576尾元，即12292購元，頂住先，資產你一定跌到仆街，有現金流唔會死住，或被迫變賣資產。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（369）保護費（二）

 高保護費背後，都包括以下：

係Poll card選票，係權力制衡劑，以下情況不會出現。

如果我係賣書，係統治者唔喜歡嘅人物，書名如下…

「泥志嬰」傳（The Trouble Maker），講到明係麻煩製造者，竟然係犯法。如果我賣「雜近駢」傳（人類史上最偉大領袖），你估會有甚麼結果，我想結果也是一樣。

問題喺邊度呢？最大問題就係你唔清楚個準則喺邊度？紅線喺邊度？嚴厲唔係問題，你咪唔俾人睇政府以外嘅書、禁學英文、禁外國電影、音樂、文化，等你無法勾結外國勢力，好似「不寒」一樣，

人係有良知、智慧，表面順服，非心服也！當他倒下失禁，係唔會有人救他，因為這是醜事，一旦救番，老羞成怒，所有在場知他失禁嘅人，全部都要死。

人要交保護費都係買個安全、安心。海灣各國向尾帝交了龐大保護費（買尾國武器、劃地建尾軍基地、以尾元為石油結算貨幣、投資尾國、購買尾債等），最終被「衣郎」攻擊，「突郎浦」想收手，各國當然唔想，要趁此機會消滅政權，方能安心。

（大部分「偽人」（藝人），全部都係黃皮膚、外國心，今日所作所為，不過為賺錢。）

（這些三流特務，都係為錢，唔通愛國咩！霎戇！）

移英日記（368）保護費（一）

 移英三年多，不住反思是否要留下，因為天氣、食物、稅務、語言…不住縈繞喺我心裏面。

保護費係升了，但諗深一層邊度唔使收陀地呀？只不過收嘅方式、方法不同，對某些人有利，對某些人不利，最重要是自己想追求嘅生活與保護費之間攞個平衡點。

要想清楚點解會走？唔通「漁村」好過頭，要去啲落後地方體驗麼？都係為了下一代教育，我哋已經過了大半世人，唔通仲會影響到我哋咩？你話唔出聲，咪唔出聲，唔通會影響到我嘅價值觀、幸福感麼？只是下一代沒有經歷過這事情，很多野唔明白，我哋仲可以堅持唔打毒針，就算冇咗份工也沒所謂，當我到了大不列顛，唔使戴口罩，嗰一刻知道甚麼是自由。

當然自由嘅代價就是要俾更多保護費，如果佈滿紅線而永遠冇人知道紅線喺邊度？睇書、上網、打機、做生意、食飯…都可以犯法，手機唔解鎖又犯法，唔夠左你都要死，你怎會有自由及快樂呢？有人說返mainland 住仲好，因為清楚知道甚麼可做，甚麼不可做，只要搵到個平衡點，仍然可以快樂生活。

早前我蝕夠數，HMRC計法也是賺大錢，攪到蝕到出血才處理到稅務問題，自問未識這裡玩法，都搞到好大鑊，講真，只要知規矩、計法，稅率雖高，但理論上賺錢才收稅，問題不大，玩法係有難度，但規矩清晰，沒有睇唔到嘅紅線及規則，應該是較容易。

點解有些國家治安又差、又凍、又冇啖好食、又賺唔到錢，人們咁貴嘅保護費都願意俾？所為不過是一刻嘅安寧及平安。

作為「低奴」，我哋何德何能可以做出「罪行滔天」、「惡貫滿盈」嘅事？但我哋都可以做生意，可以賣書，可以買「尾股」，但永遠唔知自己有冇犯法，如果我買「突郎浦」隻股票，會否視為支持「尾帝」呢？

經過與「歪芺」商量，我哋決定繼續交大不列顛保護費，小朋友由Nursery讀到University，點解要斷呢？MM2H去馬拉，讀國際學校係好爽呀！但大學又要再搵，又要再搬多次，又要去「奧周」、「尾國」，定返回大不列顛呢？如果最終又返回，咁又何必呢？而且馬拉保護費也不少，代理費用、簽証費用、外國人買樓印花稅，政策變異可以唔續簽，一生一世也冇居留權，佢要你買樓做定期，但從來沒有俾你任何保障，真係咁值麼？真係要諗清楚！

（全世界都要交保護費，國與國要收，所以作為蟻民也需要繳交。）

移英日記（367）健康之路不易行！

 本來我打算用酸種麵包取代有害麵包，又芝士、牛肉、雞蛋，真係認真製作。

但「歪芺」又話貴，個仔又話皮硬唔肯食，局住要放棄。人都是喜歡垃圾食物…

去完教會，例飛去「平民大家樂」Wetherspoon食野。個仔次次要食lasagna（千層麵），喜歡食咩？咪食乜嘢囉！人生苦短。

但我們都有責任去讓自己健康，蘋果醋超難飲，沖水都搶喉。

希臘乳酪，超有益，但要超小心買，希臘出產，成功了一半，小心字眼，如果有style，都不是真。

再睇清楚成分，Strained濾乳是傳統希臘乳酪最核心製作方式，應該係真，但蛋白質得6g，低於8-10g，唔算極優質，但Lidl野，1.99鎊，算係咁！

天然食物歸A類，不收銷售稅20%，價錢實惠。但要食健康食物，也要牽涉家庭嘅接受程度，不能操之過急！

愛丁堡詠春：垃圾詠春師傅

 任何工業產品都有說明書，清清楚楚話俾你知點用，要注意啲乜嘢，但偏偏做人卻沒有說明書，只有父母去教、學校去教、社會去教，好坦白講學校係訓練工人，就好像「嬰突耳」請唔到人，咪與大學合作開辦課程訓練晶片相關嘅人才，這方面往往偏重專業技能，小學、中學偏重學術。社會係偏重賞罰，其實父母係最重要，但偏偏佢哋有佢哋嘅限制，於是才有厚黑學、權力的48法則等暗書。

我發現叻嘅人係教唔到你野，因為他們天賦已經做到，或許我太笨、太平庸，我要清清楚楚才明白，好像駕車，啲教車師傅話靠感覺，霎戇！車係一部大型機械，你叫我憑感覺去操縱佢，咪等於自殺。要靠客觀嘅環境數據及條件去操作，例如，我怎確定架車在馬路兩條白線之中，要靠駕駛座A柱貼近前玻璃嘅角，以及前玻璃嘅中位，再望左右鏡。

可能我太笨、太平庸，我甚至說這個世界好嘅詠春師傅都唔係好識教，明明有準則，卻不能明言，永遠依靠「口傳心授」，馬開步半，雖然不是絕對標準，好似「搖名」當年在NBA最高，但腳比「澳離耳」細，準則俾九成以上人合用就可以。

這個不就是八斬刀嘅「一字刀」，點解個一字咁核突？好似我個仔寫字咁樣呢？甚麼係準則？你至少似個一字，一條直線，識唔識啊！

「孽問」女徒弟李居安師傅示範正宗八斬刀法，可以用尺去度一度，無可指責，完美無瑕。

「孽問」個仔「孽政」，肩膀緊，持刀又唔穩，又唔係真刀，有幾重啊！咁嘅詠春拳，食屎喇！父親都想你「正」，你卻左歪右斜。大家都知所謂「師傅」都係做戲，做戲都唔跟劇本，唔係要你做金馬影帝，你連茄喱啡都講唔上。

有的「師傅」係詠春模仿王，吸收係好，都要識篩選，有的自稱「孽問系」，實質摻雜咗「瘟系」，跟得足嘅話，都唔算差。這下側身撳手，一睇就知跟「孽政」那裡學，係對係錯，你哋自己諗啦！小念頭係基礎課程，尋橋係進階課程，小念頭嘅撳手係點打？尋橋那個就配合轉馬動作，講完！

對我來說，準則係重要，練功如是，做人如是。咁詠春嘅準則是甚麼？我經歷了武館幾個時期，我發覺師傅講嘅野不住咁變，最初教抌間，中期教抌圈間，最後又變回抌間，到我走了之後又變了甚麼，已經無法知道。對我來說，是即是，非即非，人就太複雜，俾你學晒「權力的48法則」，也不過是職場生存之道，但詠春離不開人類嘅結構法則，你唔會遇到一個「三頭六臂」，有，你都走喇！當中嘅道理，變化有限，我們可以用今日對搏擊嘅認知說出來，怕會變唔講，就永遠唔使講。

我淨係知「一字刀」夾角係180度，兩刀要呈直線，「十字刀」夾角係90度，一直一橫，講真邊個有用過八斬刀殺人？只不過憑空想像，套路做得好便算，大家都知做戲，八斬刀也不過道具，當藝術展示，好像跳舞也未嘗不可，既係藝術，都要做得好，跳舞跳得好，才可做舞蹈老師，八斬刀、套路、手法都操唔好，憑甚麼叫自己做詠春師傅呢！垃圾！

IB投資系列：借錢俾人慘過契弟！

 又話斬雞頭、燒黃紙…

但事實呢？

看來甚麼「斬雞頭、燒黃紙」嘅事都唔使太認真。以前有所謂「兄弟」借了我兩皮，如果人哋唔掂，唔還都可以理解。你跟我講清楚，或做場大龍鳳，扮嘢做戲又好，哭哭啼啼，我都唔使你還啦！玩失蹤，WhatsApp唔覆，冇錢咪免息分期，一個月1000得唔得呀？再唔係500得唔得呀？100得唔得呀？最大問題係態度、無責任感，我當然可以找「收數佬」追數，就算所收全作收數佬酬金，也冇所謂，又或者向法庭申請佢破產，告到佢甩褲，等佢做唔到生意，唔係為錢、為啖氣，只係教精佢點做人。

不過咁，這樣對我有何益處呢？人哋唔還錢，已經將以往一切恩情、關係，通通變賣了，我又何必再糾結呢？

現時永居及入藉費用急增，一人成本已達4935鎊，一般家庭差不多要兩萬鎊，有些家庭無錢應付，我也不敢輕言幫助，固然我為稅務問題已攪到剩返半條人命，我也要應對未來通脹及加費嘅永居及入藉費用。

不過更唔想，因錢銀睇到人性嘅黑暗，你借錢俾人容易，叫人還錢，慘過契弟，甚麼「斬雞頭、燒黃紙」，嘥氣啦！

呢個世界係講利益，唔係講道義，做人唔好咁天真！如果真係要借，就唔好預佢會還，佢哋想變賣這個關係情誼，令我感到詫異嘅，係估唔到關係咁平咁賤。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：小心中伏

 現時個巿係好難玩…

有人說這廿隻股票在五至十年可以升3-5倍，假設有十分之一真係跑出，巿值升五倍，其餘全部仆街，也是沒意思。假設你投資100萬，每隻投5萬，最後跑出嗰兩隻升值至25萬，合共50萬，其餘虧損，仍然蝕50萬。

何況你要促，何止廿隻，每間大行也有他們嘅清單、心水，你根本無法估中。

某富二代最清醒，唔做生意、唔投資，單單收息躺平，然而要本金巨大才可單靠利息維生，我哋這些窮鬼無法模仿。

如果指數基金，分散至500間公司，分散了風險，也是可以。但倘若大巿跌，都有可能跌三成至五成，如果係定投，長遠投資無問題，但如果是一大筆錢，要分注入。

正所謂：「人之將死，其言也善」。股神「爸飛突」對妻子投資嘅遺言，也是對不善投資嘅建議，10%短期「尾債」，90%「彪譜伍佰」指數基金。

（移嬰講人係無法投資尾國上巿嘅ETF，唯有買「愛已難」出品，「淪噸」交易所買賣嗰啲，管理費高啲，但股息稅減半，有著數。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。