移英日記（102）全職湊仔公

 做了七個月執房佬，都係時候休息一下，一則英國稅率高，每月扣三千港元，又稅、又國民保險、又Pension，確實工作意欲有限。二則股巿上番軌道，連續幾個月靠炒賣、股息、息差都搵到食。三則要部署考life in UK、報英文班、做英國義工，融入英國人生活，這也是重要。

現在第一步係全職湊仔公，專車接送兒子返學、放學，下午天氣好，就落去陪玩踏單車、滑板車…

又去Tk max買了新衫及禦寒冬裝給兒子，年年都長高，年年都要買，省不了。

都考慮買部新車，有三個選擇：第一，最平電油車：起亞Picanto，1000cc，七年保養，咪即係香港嗰架morning，香港都揸過，入窄狹停車場都ok，雖然都操熟棍波，但城巿都係自動波好，做人實際點，浪漫試過就算，約15萬幾港幣。第二，最可靠混能車：豐田Yaris，1500cc，五年保養，如果維持原廠service，可延至十年，質量可靠不必懷疑，約25萬幾。第三，最平電車：MG，七年保養但要大電及有型的MG4，都要約32萬左右。

首相辛偉誠已不再堅持2030年不再出售全新燃油車，燃油車仍有巿場及繼續，再者電車至少比混能車貴十萬八萬，即使暫時免牌費，價格差距已夠俾油錢，如果你要環島遊，一定要用私人快充，與入油差別不大，而電池壽命也是七至十年。

混能車又比電油車貴，如果駕駛量不多，省的油錢是比不上車價，再者愛丁堡車速，不過20、30英里，我部本田思域棍波推到六波，只出現在70英里的環迴公路，或者格拉斯哥路40英里，勉強推至六波將轉速減少省油，但很快就到迴旋處降波，所以細車已足夠，Picanto比Yaris更省油，更實際。15萬幾，七年保養，除番每年兩萬鬆D，跟我部舊車維修及過Mot差不多，點解唔買自動波新車？

（買車唔使貴，夠用就可以，最合乎經濟效益。如果你經常上高速，就十分飄，不太適合了。）