IB投資系列：蝕到攤攤腰

 最近蝕到攤攤腰，真係刺激！本來目標係蝕六十萬，最終蝕過百萬，超標完成。至明年三月應該也賺不了幾多，幾乎可以肯定交很少稅，或者唔使交稅。

交稅係每一個公民嘅責任，然而高稅下，投資失卻動力，資本撤離，咁攪法「嬰國」真係越來越倒楣！

「嬰國」既管治固然唔好，但某些地方火災死了過百人，也沒有人要問責落台，的確令人氣憤，炒人真係咁難咩？你做一間公司經理，下屬犯了嚴重錯誤，咪叫佢以後唔使返，會計出將支票，羞辱點叫保安睇住佢執野走。法家最重視信賞必罰，雍正如果唔殺年𡙡堯，自己就成了昏君了。

暫時係冇錢賺，但只要維持現金流，每星期賣期權金約攞番一皮左右，資產價格波動都唔需太恐懼。本星期收1596尾元，約12448講元。一個月有4皮期權金，一年約收半球，當收息囉！

早前我賣了十張四百幾日某核電看跌期權，跌到攤攤腰，如果今日要平倉，要蝕十幾萬，不過四百幾日嘅期權，唔使太心急，「皮褸王」也說核電對AI嘅重要，個心也定啲。本來歷史高位一百九十幾元時可以走，不過我發現平倉只得兩三萬，並不甘心，但跌就要蝕十幾萬，升卻只得兩三萬，贏粒糖輸間廠，令我反思長期嘅期權投資價值，表面上時間夠長，一定有位走（理論上），但係時間也是成本一部分，也佔用了戶口嘅信用額度。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

愛丁堡詠春：後傾

 本人詠春功力有限，想有一事請教諸位詠春同門，以下嘅詠春展示，念頭正唔正呢？

點啊！又唔敢講啊！怕得罪全球詠春同門，宜家「鄉講人」甚麼都唔敢講，怕有後果，唔緊要，呢個醜人就等我做吧！後腦向地下嘅垂直線超越腳㬹，明顯後傾，唔係頂天立地，念頭當然不正。

呢個世界有邊種武術會咁樣㗎！我孤陋寡聞，告訴我吧！後傾唔係唔得，當所有招式手法都失效，為了避開敵人嘅攻擊，也要後傾，相當於拳擊嘅後閃動作，我明白作為大師要左閃右避，並不高雅，我都唔係咁㒼塞㗎啦，要做都係要做，唔夠打都要認輸，有甚麼可恥呢？「留得青山在，那怕冇柴燒」，問題係後傾個動作，做定就冇用，人哋打你已經預咗個距離，係沒有任何意思！所有招數動作都要在有需要時才施展，才能發揮果效。有病才食藥，個病才會好，冇病先食藥，即係快啲去死！

每一種武術對重心也有要求，人體重心就在肚臍對落嘅丹田穴，如果唔拿捏好個重心，輕側企唔穩，重側被人摔下，自身也不保。點樣知重心是否正確呢？有所謂「前三尖」及「後三尖」，前三尖是指鼻尖、膝蓋尖不過腳趾尖，後三尖是後腦、尾龍骨尖不過腳㬹尖。

早前我說過，如果有人膽敢在「綜獅」及所屬授業師傅墓前展示詠春，即使如何不濟，既然人哋都唔要面，武不知恥（正名：恬不知恥），我也一概不談。今日竟然有人在「聾哥」父子墓前展示詠春，佢哋沒有授業關係，純粹打卡、搏流量，我都費事講。

「漿進」、「因子單」之流，不過是動作演員，佢哋唔係詠春派，做得唔好係理所當然，問題係背後教佢嘅師傅。我詠春知識淺薄，真係想知係乜嘢？

這個不就是「瘟師伯」嘅「水平式膀手」，由高足「塵師傅」展示，這是我自己改嘅名，以此分別傳統詠春嘅膀手，這種膀手係有蠱惑之處，㬹冇提起，前臂成水平之勢，但護手好堅，成快速翻手之勢，就好像古代打仗，分兵迂迴直擊敵人核心。人哋咁樣做係有佢嘅意思，胡亂模仿，只會畫虎不成反類犬。

究竟六七十歲嘅老人家，可唔可以展示精準嘅詠春呢？主要視乎佢生活檢唔檢點？識唔識得養生？我不過五旬嘅退休人士，每早準時車個仔返學，早餐牛扒、蛋、雜菜，咖啡係用有機牛奶沖調，沒有煙、酒，練深蹲、平板支撐、戴拳套練拳，練腳、拉筋等，一把年幾，每樣做少少吧！有充足蛋白質及刺激，阻止老化及肌肉流失。反觀如果又煙又酒，又曾吸食鴉片，又要徒弟陪你打通宵麻雀，唔好說功夫，健康也會出現問題，做唔做到？你自己諗吓啦。

（如果乜都唔敢講，咁你生存仲有甚麼意義，詠春做得唔好就要講，如果仲係只顧自己利益，怕人唱衰詠春，影響自己生意，咁將來詠春會變成點呢？）